Ikuyaka Maanda aa Bwami Kwamasi mu Masi Aamwi Aaku Europe
1 Mumakumi aamyaka aayinda; mulimo wa Bakamboni ba Jehova mumasi manji aaku Europe, kubikkilizya a Eastern Europe, wakalilesyedwe. Ikanji-kanji, zisinkilizyo zyakali kubikkwa zyakali zyalunya kapati. Cakali ciyumu kucita miswaangano antangalala, alimwi ikuba a Ŋanda ya Bwami yakucitila miswaangano tiicakali kukonzyeka pe. Pele mumyaka misyoonto buyo yainda, “Jehova watucitila milimo mipati, aboobo twabotelwa.”—Int. 126:3.
2 Ikutalikila mu 1983, ikudyaaminina Bakamboni ba Jehova kwakatalika kuyaabumana. Mu 1989, Bakamboni ba Jehova bakazyibwa mumulawo mucisi ca Poland a Hungary. Mu 1991, Bakamboni ba Jehova bakalembesyegwa mumulawo mucisi ca Russia. Ikuzwa leelyo, imulimo wayaambele mu Russia amumasi aakali kweendelezyegwa a Soviet Union. Akati ka March 1996 alimwi a October 1998, Ikabunga Keendelezya kakazumina kukweletesya mali aakalombwa amaofesi amitabi aalanganya mulimo mumasi aali 11 mu Europe kuti ayake Maanda aa Bwami aali 359.
3 Nomulanga zifwanikiso mupepa eeli lyamukati, amuzinzibale kuyeeya milimo mipati alimwi iigambya Jehova njaacitila bantu bakwe. (Int. 136:4) Mulakonzya kubotelwa kumvwa kuti zyakusanga kuzwa kubunyina bwanyika yoonse zili mukubelesyegwa kabotu, ikutondezya Jesu ncaakaamba, kweelana ambokulembedwe kuli Johane 13:35 kuti: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.”
4 Akati kamasi aali mukugwasigwa abubambe bwakugwasya kuyaka Maanda aa Bwami mumasi aatasumpukide kuli cisi ca Romania, ooko Maanda aa Bwami aali 36 nkwaakayakwa kuzwa mu July 2000. Kwiinda mukubelesya mapulani aabikkilidwe limwi mukuyaka Maanda aa Bwami oonse, mu Ukraine kwakayakwa aali 61 mumwaka wa 2001 alimwi aambi aali 76 mu 2002. Kwiinda mukugwasigwa amali aasangwa ku Mali Aakugwasilizya Kuyaka Maanda a Bwami, Maanda aa Bwami manji ayakwa ku Bulgaria, Croatia, Macedonia, Moldova, Russia alimwi a Yugoslavia.
5 Ikuyaka Maanda aa Bwami mumasi aamwi tiicali cuuba-uba pe. Kusolekesya kapati kwali kuyandika kautanatalika mulimo wakuyaka. Ikanji-kanji kulibambila kutalika kuyaka kusowela ciindi cilamfwu kapati. Kuyungizya waawo, ikuyaka Ŋanda ya Bwami kucibeela eeco caku Europe kuladula kapati kwiinda mumasena manji aamu Afulika naa South America. Nokuba boobo, akaambo kamweelwe uuyaabuya aambele wabaabo ibakomba Jehova, Maanda aa Bwami manji alayandika kumasi aaku Europe aatasumpukide kapati.
6 Elo kaka cilakkomanisya kubona ikuvwula kwa Maanda aa Bwami aaya aayakwa mukaindi kasyoonto buyo! Kweelana ambozitondezya zyakuluula zinji, bumboni bubotu bwapegwa kumasena maanda aaya nkwaayakidwe. Mumasena amwi, beendelezi balabotelwa kapati amuuya wakulyaaba uutondezyegwa kwiinda mukutobela malailile aapegwa aatondezya mbwaayelede kuyakwa maanda.
7 Isaya wakasinsima kabotu-kabotu ikuyaambele mubukombi bwakasimpe mazubaano. Mboobu Leza mbwaakasinsima kwiinda mumusinsimi ooyu: “Mebo nde-Jehova njoofwambya makani aya kuciindi cao ceelede.” (Is. 60:22) Masimpe, myaka iili kkumi yainda cakali ciindi ca Jehova cakutola ambele mulimo mu Eastern Europe. Jehova aazumanane kututilila zilongezyo zyakwe, mukusolekesya kwesu kuti tufwambaane kuyaka Maanda aa Bwami mumasi manji mbotuzumanana kusanga Mali Aakugwasilizya Kuyaka Maanda aa Bwami. Eeci ciyoopa kuti kuyakwe Maanda aa Bwami manji mumasi aatasumpukide. Alimwi ciyoopa kuti bukombi bwakasimpe buyaambele mumasena manji aaku Europe akuti bantu banji bapegwe bumboni “mane kusikila kumamanino aanyika.”—Inc. 13:47.
Zifwanikiso izili apeeji 3]
Buyake bwa Ŋanda ya Bwami Moscow, Russia
Zifwanikiso izili apeeji 4-6]
Maanda aa Bwami mapya ku Eastern Europe
Strumica, Macedonia
Daruvar, Croatia
Bitola, Macedonia
Sokal, Cooko ca Lviv, Ukraine
Mladost, Bulgaria
Kurdzhipskoye, Maykop, Russia
Bački Petrovac, Yugoslavia
Plovdiv, Bulgaria
Tlumach, Cooko ca Ivano-Frankivsk, Ukraine
Rava-Ruska, Cooko ca Lviv, Ukraine
Stara Pazova, Yugoslavia
Zenica, Bosnia alimwi a Herzegovina
Sokal, Cooko ca Lviv, Ukraine
Zhydachiv, Cooko ca Lviv, Ukraine