Ikusololela Ziiyo Zya Bbaibbele Zyaaŋanda Ziya Kumbele
1 Ino nasi umwi waku Tanzania, musimbi umwi waku Argentina, alimwi amutumbu umwi ku Latvia bakozyenye buti? 1997 Yearbook (mapeeji 8, 46, a 56) iluula kuti boonse botatwe bakaya kumbele cakufwambaana kapati muziiyo zyabo zya Bbaibbele zyaaŋanda, akaambo kakusungwaala kwabo kwakulisungula kubaa ziiyo ziinda aali comwe ansondo mubbuku lya Luzibo. Kwaambwa kuti cili kabotu kufwumbwa kuti kacikonzeka, kuti basikumwaya basoleke kubandika cibalo comwe cabbuku muciiyo cimwi acimwi. Pele bamwi bajana buyumuyumu kucita boobo. Nokuba kuti cili kubukkale bwa sikwiiya ambwakonzya kubamba nzyaiya, aabo bacibwene kuyiisya bazwidilila kwiinda mukubelesya nzila mbuli zeezi zitobela.
2 Mbuli mbocakabandikwa mupepa lyamukati lyamu Mulimo Wesu Wabwami lya mu June 1996, ncintu ceelede ikuyiisya basikwiiya kulibambila kuciiyo. Kumatalikilo kwini-kwini, inga cabota naa mwapandulula akubatondezya mbokulibambilwa. Amubatondezye kkopi lyanu lyaciiyo lya bbuku lya Luzibo. Antoomwe amulibambile ciiyo cakusaanguna. Amubagwasye basikwiiya kujana mabala naa twaambo tukugama kwiingula kwamubuzyo uusimbidwe mpoona mwaayenge naa kwaazila. Basikumwaya bamwi basikaa ntaamu yakupa basikwiiya mpesele kuti babelesya. Amubakulwaizye kwaabala magwalo oonse ciindi nobalibambila. Kwiinda mukucita boobu, muya kubayiisya kulibambila kujanika a Ciiyo Cabbuku Cambungano a Ciiyo ca Ngazi Yamulindizi.—Lk. 6:40.
3 Mwiiyi mubotu uyakucitya sikwiiya kulyaambilila lwakwe kataambi zinji walo. Tayandi kuleya akunjila mutwaambo tutayi koomoonga. Kanjikanji taleti twaambo tutamo muciiyo. Pele, ulatondezya makani mapati-pati muciiyo. Bamwi bapa basikwiiya mabbuku ambi aakubagwasya kujana kwiingula kumibuzyo. Alimwi, ibayanda bayakujana bupanduluzi bwa ziiyo zisiyene-siyene kwiinda mukujanika amiswaangano yambungano.
4 Tamuyandiki kwaabala magwalo oonse aali mucibalo aambidwe buyo nomwiiya. Twaambo tupati-pati inga twapandululwa kwiinda mumagwalo aazubulwidwe aali mumuncali. Ciindi nomwiinduluka, amutondezye magwalo aajatana kapati aciiyo ngomwabandika alimwi amumukulwaizye sikwiiya kunikwaayeeya aaya.
5 Ciiyo Cimwi Acimwi Ceelede Kulampa Buti?: Iciiyo takuli kuti lyoonse ceelede kumana muoola lyomwe buyo. Bamwi basiŋanda bajisi ciindi cinji alimwi inga bayanda kuzumanana kwiiya. Antela sikwiiya inga wayanda kunikwiiya mazuba aainda kuli bomwe mumvwiki. Eci inga cabagwasya kapati boonse bakonzya kucita boobo.
6 Mbuli mbokutondezedwe kuli Isaya 60:8, mazubaano myaanda yazyuulu zyabasikutembaula Jehova bapya baboola kabazya “buuluka mbuli ijoba, mbuli inziba ziya kuzipulo zyazyo” banjila mumbungano zyabantu bakwe. Toonse twakulwaizigwa kuyumuna mukuli wesu mukubelekela antoomwe a Jehova muciindi cino nalimukufwambya kuyobolola baabo bali mbuli mbelele.—Is. 60:22.