Balamuzimba Buya!
1 Cimwi ciindi tulalovwa kumiswaangano katuyeeya kuti ‘kwiina autibikkile maanu; kunyina buya autizibe kuti tandiko.’ Aayo taali masimpe! Umwi aumwi wandiswe ulayandika kapati mumbungano mbweena mbuli mbociyandika cizyo cimwi acimwi camubili. (1 Kor. 12:12) Bamwi balakonzya kunyongana munzila yakumuuya twatajanika kumuswaangano umwi wansondo ansondo. Mwatajanika, mweelede kamuzi kuti—balamuzimba buya!
2 Mbomuyandika Kapati: Paulo wakali kuyandisya kapati kuyanzana ababunyina. Ilugwalo lwa Baloma 1:11, 12 (Ci) lulapandulula kuti: “Kutegwa nkamwaabile cimwi cipego camuuya kuti nkamuyumye-yumye . . . tukayumizyanye mulusyomo mebo ndikayumye ndinywe anywebo mukayumye ndime.” Tulayumizyanya kapati kugwasyanya kuzumanana mulusyomo kwiinda mukwiingula nkotwiingula amuswaangano, mukutola lubazu muzibeela zimwi zyamuswaangano alimwi akwiinda mukubako buyo kwesu amuswaangano.—1 Tes. 5:11.
3 Sena mulalangila kubona beenzinyoko kumiswaangano yambungano? Mulaswiilila cini-cini nobaingula alimwi akuyandisya kumvwa majwi aabo aalusyomo. Izipego zyabo zyakumuuya zilagwasilizya kumuyumya-yumya. Ikuti kabatako amuswaangano, inga mwalimvwa kuti kuli cimwi cintu cipati ncomubulide. Oobo mbobalimvwa abalo ibanyoko abacizi kuti kamutako.
4 Mboiyandika Kapati Miswaangano: Kayaamba mboiyandika kapati miswaangano kutugwasya kuti tuzumanane munzila yakumuuya, Ngazi Yamulindizi imwi yakati: “Munyika eyi iizwide manyongwe alimwi abantu batalilemeki, imbungano ya Bunakristo nciyubilo cigwasya kapati munzila yakumuuya . . . , nciinga caluumuno alimwi aluyando. Aboobo kamujanika lyoonse kumiswaangano yoonse yambungano.” (w93 8/15 11) Buzuba abuzuba tulwanaa zintu zitoongezya munzila yakumuuya. Twatajatisya, tulafwundilizigwa amapakasyo abuumi cakuti tulaluba azintu zyakumuuya ziyandika kapati. Toonse tusyoma mubeenzuma kutegwa batuyumye-yumye tuzumanane kubelekelaamwi cabusungu mumulimo wa Leza.—Heb. 10:24, 25.
5 Tulayandika kapati kuti katujanika kumiswaangano. Cimwi ciindi tulakonzya twaalilwa akaambo kakuciswa naa zintu zimwi zitakwe ambozicitwa. Cataba boobo, atukanze kujanika akati kabaabo baswaangana ibatembaula Jehova antoomwe!—Int. 26:12.