Bakamboni ba Jehova—Mbakambausi Beni-Beni
1 Jesu Kristo wakabapa mukuli wakukambauka basikwiiya bakwe boonse, wakabalailila kuti bakambauke makani mabotu aa Bwami. (Mt. 24:14; Inc. 10:42) Basikwiiya bakwe bakusaanguna bakaba cikozyanyo cibotu mumakani aaya nkaambo bakaamba makani aa Bwami cakutaleka—ikutali buyo nobakali mumasena aakukombela pele kufwumbwa nkobakajana bantu, mumasena aakubuleya anobakali kuunka kuŋanda aŋanda. (Inc. 5:42; 20:20) To Bakamboni ba Jehova mazubaano, twalitondezya kuti tuli bakambausi Banakristo bakasimpe, ibakambauka mulumbe wa Bwami mumanyika aali 232 alimwi akubbapatizya basikwiiya bapya ibainda kukaulunzuma komwe mumyaka eyi yotatwe buyo yainda! Nkaambo nzi mulimo wesu wabukambausi ncowazwidilila boobu?
2 Makani Mabotu Alatukkomanisya: Ibakambausi, mbatumwa bamakani mabotu. Aboobo, tujisi coolwe citaliboteli cakwaambilizya Bwami bwa Jehova—imakani mabotu meni-meni alikke buyo aakonzya kukambaukilwa banamaleya bali mumapenzi. Tulisungweede cini-cini muluzibo ndotujisi kale lwa julu pya litikayendelezye nyika mpya yabantu basyomeka mubululami mu Paradaiso kumbele. (2 Pet. 3:13, 17) Tolikke swebo, ndiswe tujisi bulangizi obu, alimwi tulayandisisya kubuzibya kuli bamwi.
3 Iluyando Lwini-Lwini Ndolutukulwaizya: Imulimo wakukambauka mmulimo uuvwuna bantu. (Rom. 1:16) Nkakaambo kaako ncotujana lukkomano lunji mukumwaya mulumbe wa Bwami. Mbwaanga tuli bakambausi beni-beni, tulabayanda bantu, alimwi eci ncocitukulwaizya kuti tubaambile makani mabotu—banamukwasyi, basimukoboma, ibalongwe besu alimwi abunji bwabantu mbotukonzya kusikila. Ikucita mulimo oyu camoyo woonse ncimwi cazitondezyo ncotunga twacita citondezya kuti tulaaluyando lwakasimpe kuli bamwi.—1 Tes. 2:8.
4 Muuya wa Leza Nguutugwasya: Ijwi lya Leza litusyomezya kuti ikuti naa twacita mulimo wesu wakubyala akutilila mbewu zya Bwami, Jehova ‘nguumenya.’ Eci ncecili mukucitika mazubaano mumbunga yesu. (1 Kor. 3:5-7) Imuuya wa Leza nguutugwasya mumulimo wesu wakukambauka akutucitya kuti tuzwidilile kapati.—Joel. 2:28, 29.
5 Akaambo kaluyando lwesu kubantu boonse, atukulwaizigwe kwaambilizya makani mabotu aa Bwami kufwumbwa notwajana ciindi, kweelana akukulwaizya ikujanwa kuli 2 Timoteo 4:5 ‘kwakusungwaalila milimo yabukambausi,’ kumwi katusyomede kuti Jehova ulazumanana kulongezya mulimo wesu.