Amukukkomanine Kupa Bumboni Cakulomya
1 Toonse tulakkomana kucita zintu nzyotukonzya kucita kabotu. Ikujatikizya Jesu, lugwalo lwa Maako 7:37 (Ci), lwaamba kuti makamu-makamu aabantu akapozya kaati: “Amulange mbwazicita kabotu zintu zyoonse!” Anu Jesu ncaakakukkomanina kucita kuyanda kwa Jehova! (Amweezyanisye Intembauzyo 40:8.) Kwiinda mukulanga-langa inzila zitobela, andiswe tuyoojana lukkomano ciindi notutobela mulawo wa Jesu wakuti “tukambaukile bantu akupa bumboni cakulomya.” (Incito 10:42, NW) Mu January tulimukumwaya bbuku kufwumbwa lijisi mapeeji aali 192 ilyakamwaigwa musyule lyamwaka wa 1985 imbungano ndyoicijisi naa mabbuku aa Mankind’s Search alimwi a Munthu Wamukulu. Mbuti mbotunga twabelesya mabbuku aaya kupa bumboni cakulomya?
2 Mbwaanga bantu boonse balaalanganya makani aabuzumi, mulakonzya kwaamba kuti:
◼ “Nokuba kuti kuli kuzwidilila kunji kwacitwaa abasimisamu yacikuwa, ikupenga kunji nkokucili akaambo kakuciswa. Muyeeya kuti nkaambo nzi ncokuli boobu? [Amulindile kwiingula.] Jesu Kristo wakasinsima kuti imalwazi cakali kuzooba citondezyo camazuba aakumamanino. (Lk. 21:11) Pele Ibbaibbele alimwi lilapandulula zyaciindi kuciswa koonse nokutakabiwo. [Amubale Isaya 33:24.] Amubone bbuku eli mbolikulwaizya kubaa bulangizi munjiisyo ya Bbaibbele eyo.” Amututondezye itwaambo tweelede tuli mubbuku ndyomuli mukumwaya, mpoona amulisiye.
3 Ciindi nomupa bukambausi bwamukwiizya mumasena aamakwebo, mulakonzya kupa mooni akubuzya kuti:
◼ “Sena zintu muzibona kuti ziyaabwiindila buya kudula mazubaano cakuti cilakatazya kuzyuula akaambo kamali masyoonto aavwolwa? [Amulindile kwiingula.] Sena muyeeya kuti kuli ciindi zintu zyoonse nozitikakonzeke kujanwa amuntu uli woonse?” Amulindile kwiingula. Mpoonya amubabalile Lugwalo luzubuludwe lweelede luli mubbuku ndyomuli mukumwaya. Amuzumanane kwiinda mukwaamba kuti: “Ibbuku eli litondezya kuti kwiinda mu Bwami bwakwe, Leza uyoowagwisya mapenzi oonse aapa kuti bukkale bukatazye mazubaano.” Amubasiile bbuku elyo. Mulakonzya kwaamba mbuli mbomwaukkomanina mubandi alimwi akubuzya kuti: “Sena kuli mbotunga twaswaangana alimwi kuti tukazumanane amubandi ooyu?” Munzila eyi mulakonzya kupegwa inamba yaluwaile naa ikkeyala yakuŋanda kwamuntu ooyo.
4 Mwamana kulibanda izina lyanu, mulakonzya kwaamba kuti:
◼ “Mbwaanga kuli zikombelo zitalivwulili mazubaano, sena kuli nomwakayeeyede mbotunga twaziba naa cikombelo cesu cilamukkomanisya Leza? [Amulindile kwiingula, mpoonya amutondezye cifwanikiso cili a peeji 13 mubbuku lya Mankind’s Search for God.] Eeci cifwanikiso citondezya zintu zyacitwaa zikombelo munkondo zinji zyanyonyoona bantu akuleta mapenzi aataambiki. [Amubale Matayo 7:17-20, kuzwa mubbuku mumuncali 19. Mpoonya amubale mabala aamba zyacifwanikiso eco.] Kwiinda muzintu nzyotubona muzikombelo alimwi azintu nzyaakaamba mucikozyanyo Jesu, tulakonzya kwaamba kuti ikulilemeka kwamuntu amuntu kulajatikizigwa kapati, munzila imwi aimwi acikombelo cakwe mbocibede. Eelyo, ikulingaula kwabbuku eli kujatikizya kuyandaula Leza banamaleya nkobacita kwiinda muzikombelo zyamunyika inga kwamugwasya kwiingula mibuzyo yanu imwi.” Amulisiye bbuku.—Kutegwa mujane inzila zimbi zigwasya mbomunga mwasiya bbuku lya Mankind’s Search, amubone kupeeji lyakumamanino lya Mulimo Wesu Wabwami wamu June 1992. Kujatikizya bbuku lya Munthu Wamukulu, amubone apeeji 4 mu Mulimo Wesu Wabwami wamu June 1993.
5 Ciindi nomupilukila kuli baabo ibakatondezya luyando, mulakonzya kusoleka kutalisya ciiyo ca Bbaibbele kwiinda mumakani aantalisyo aaya:
◼ “Ciindi cainda notwakaswaangana, ndakakakkomanina kapati kaambo nkomwakaamba. [Amukaambe kaambo muntu oyo nkaakaamba.] Ndali kukayeeya lyoonse, alimwi ndiyanda kuti ndimuzibye makani ngeekajana mukuvwuntauzya kwangu aakaambo aka. [Amubale anguwe lugwalo lumwi lweelede.] Tupa ikkoosi lyaciiyo ca Bbaibbele ilyagwasya tuulunzuma twabantu kumvwisya njiisyo zya Bbaibbele zipati-pati muciindi cisyoonto buyo. Iciiyo cili boobo cilakonzya kukomezya lusyomo lwanu mukuzuzikizigwa kutadoonekwi kwazisyomezyo zya Leza.” Amubuzye mibuzyo imwi iiyooingulwa. Ikuti muntu oyo wacikaka ciiyo ca Bbaibbele, amupandulule kuti tulijisi alimwi ikkoosi ifwambaana kapati yaalubazu iitola buyo maminiti aali 15 ansondo kwansondo zili 16. Amutondezye ibroshuwa ya Ncayanda, amuye kucibalo 1, akubuzya naa inga bayanda kuti mubatondezye mbocicitwa ciiyo eco mucibalo cakutaanguna.
6 Mutalubi Kubelesya ma Tulakiti: Nokuba kuti ntupepa buyo tusyoonto, tujisi mulumbe mubotu kapati alimwi uukonzya kubazula bantu. Mbuti ciiyo mbocinga catalisigwa mukatulakiti? Nkwiinda mukwiile kupa simunzi katulakiti kakonzya kumukkomanisya. Mpoonya, amutambe simunzi kuti abale kamuswiilizya muncali wakusaanguna. Amwaabale magwalo aali mukati, alimwi amupandulule mbuli mbwaayendelana amakani aabalwa. Ciindi cakusaanguna, ambweni inga mwaile kulanga buyo muncali omwe naa yobile. Simunzi mbwayaabuziba kuti uli mukwiiya zintu zyamu Bbaibbele zibotu, mulakonzya kuyungizya ciindi ncomutola mumibandi yanu.
7 Amusongwaale mumulimo wanu, elyo muyooukkomanina. Lyoonse amubikkile maanu kukupa bumboni cakulomya, alimwi amukukkomanine kutola lubazu muzibeela zyoonse zyamumuunda.—1 Tim. 4:16.