Amuyobole
Inzila Zimwi Zikonzya Kubelesyegwa Mumulimo Wamumuunda
Amubelesye nzila eezyi zikonzya kumugwasya nomulibambila mbomukonzya kumwaya bbuku lyaabwa mumwezi ooyo.
Amubaa Cilongwe a Jehova
“Bunji bwabantu basyoma muli Leza balayanda kuba acilongwe anguwe. Sena mulizyi kuti Leza ulatutamba kuti tube acilongwe cini-cini anguwe? [Amubale Jakobo 4:8.] Ibbuku eeli lyakabambilwa kuti ligwasye bantu kubelesya Bbaibbele lyabo kutegwa babe acilongwe cini-cini a Leza.” Amubale muncali 1 apeeji 16.
“Mazubaano ikutalulama kwavwula kapati. Cili mbuli mbokupanduludwe aawa. [Amubale Mukambausi 8:9b.] Ibanji baladooneka kuti Leza ulalanganya. [Amubale mizila yakusaanguna yobilo mumuncali 4 uuli apeeji 119.] Icibalo eeci cilapandulula ikaambo Leza ncaazumizyila kutalulama kwaciindi cili mbocibede.”
Is There a Creator Who Cares About You?
“Ino nkuli nkotukonzya kujana malailile aali kabotu aakonzya kutugwasya kumana mapenzi ngotujisi? [Amulindile bwiinguzi. Mpoonya mubale Matayo 7:28, 29.] Eeci citondezya mbubakautambula bantu Mulumbe wa Jesu waa Cilundu. Amuswiilile bamwi nzyobakaamba. [Amwaambe twaambo tuli apeeji 152.] Eeci cibalo caamba buumi bwa Jesu ambwaakali kuyiisya.”
“Sena kuli nomwakalibuzide kuti: ‘Ikuti naa Leza nkwali, sena kuli nayakwaamana mapenzi akutalulama kuliko munyika?’ [Amulindile bwiinguzi. Mpoonya amubale Ciyubunuzyo 21:3, 4.] Eeli bbuku lilapandulula ncayakucita Leza kutegwa akamanizye mapenzi akugusya yooyo wakaatalisya.” Amumutondezye cibalo 10.
Amulangile Lyoonse!
“Bantu banji balalibilika amapenzi manji alimwi azintu zigambya zicitika mazubaano. [Amupe cikozyanyo cizyibidwe mucilawo.] Sena mulizyi kuti, izintu eezyi zili akati kazitondezyo ezyo zitondezya kuti imfwulumende ya Leza ili afwaafwi kutalika kweendelezya nyika? [Amulindile bwiinguzi. Mpoonya amubale lugwalo lweendelana ancomwaamba mbuli lwa Matayo 24:3, 7, 8; Luka 21:7, 10, 11; naa lwa 2 Timoteo 3:1-5.] Eeyi broshuwa ilaamba ncociyandika kapati lino ikubikkila maano kuncozyaamba zintu eezyi.”
“Bantu banji mazubaano balinyongene azintu zicitika zigambya naa zibacitikila zibyaabi. Bamwi balagambwa Leza ncatabwezeli ntaamu kulesya zintu zili boobu. Ibbaibbele litusyomezya kuti Leza ino-ino uyoomana mapenzi aakatazya bantu. [Amubale Ciyubunuzyo 14:6, 7.] Amubone Bubetesi bwa Leza ncobuyakwaamba kubantu. [Amubale 2 Petro 3:10, 13.] Eeyi broshuwa ilijisi twaambo tunji kujatikizya makani aaya aayandika kapati.”
Luzibo Lutola Kubuumi Butamani
“Ikuti naa mwatambwa kukkala mubusena bubotu buli boobu, sena inga mwabuzumina bwiite oobo? [Amutondezye cifwanikiso cili amapeeji 4-5 mwamana mulindile bwiinguzi.] Amubone Jwi lya Leza ncolyaamba kuti ncecintu cipati cikonzya kupa kuba abuumi buli boobu bwakupona kukabe kutamani. [Amubale Johane 17:3.] Eeli bbuku liyakumugwasya kuba aluzibo lutola kubuumi butamani.” Amubaambile kuyakubandika mincali iili yosanwe yamu cibalo 1 mwaakupilukila.
Amujalule acifwanikiso cili amapeeji 188-9 amubelesye majwi aasindikizya aaliko awo, amumubuzye mukamwini ŋanda kuti: “Sena mulangila kukkala mu Paradaiso ciindi luzibo lwa Leza noluyakuvwula anyika? [Amulindile bwiinguzi. Mpoonya mubale Isaya 11:9.] Eeli bbuku liya kumugwasya kwiiya ncolyaamba Bbaibbele kujatikizya Paradaiso alimwi ambotukonzya kuyoojanika mumo.” Amwaambe kuti mwaakupilukila muya kubandika mincali 11-16 yamu cibalo 1.
Amwiiye ku Mwiiyi Mupati
“Sena muyeeya kuti nyika niyali kabotu ikuti bantu nibali kucitobela caambwa aawa? [Amubale Matayo 7:12a. Mpoonya amulindile bwiinguzi.] Ibbuku eeli lilijisi ziiyo zinji kuzwa kumwiiyi mupati kwiinda iwakaponede.” Amutondezye zifwanikiso amajwi aasindikizya mucibalo 17.
“Bazyali banji mazubaano balasola kuyiisya bana babo mbobakonzya kulilemeka. Sena muyeeya kuti eeci cilayandika? [Amulindile bwiinguzi. Mpoonya amubale Tusimpi 22:6.] Amubone kuti bazyali bakulwaizyigwa kutalika kuyiisya bana babo kabacili baniini. Ibbuku eeli lyakalembelwa kuti libagwasye kucita oobo.” Amutondezye zifwanikiso amajwi aasindikizya mucibalo 15 naa 18.
“Kanji-kanji bazyali balagambwa kumibuzyo bana babo njobabuzya. Imwi yamibuzyo eeyo miyumu kwiingula, sena taali masimpe aayo? [Amulindile bwiinguzi. Mpoonya amubale Ba-Efeso 6:4.] Ibbuku eeli lilakonzya kubagwasya bazyali kwiingula mibuzyo yabana babo mazubaano.” Amukankaizye zifwanikiso zisyoonto amajwi aasindikizya muzibalo 11 a 12 naa 34 kusika ku 36.
Life—How Did It Get Here? By Evolution or by Creation?
“Toonse tulalibilika akaambo kamilandu alimwi akulwana kucitika nkotubede. Sena kuli ngomuyeeyela kuti inga waamana mapenzi aaya? [Amulindile bwiinguzi.] Leza inga wacita oobo.” Amuvwunune kupeeji 196; amubale akwaamba ncolupandulula lugwalo lwa Tusimpi 2:21, 22 luli mumuncali 19. Amutondezye mutwe wacibalo 16 akwaaba bbuku eeli.
Amuvwunune kupeeji 6 akwaamba kuti: “Bantu banji bayeeya kuti inyika yesu mbotu abuumi zyakaboola kakunyina wakazilenga. Ino mbupanduluzi nzi mbomubona kuti mbwamaano bwaamba mbozyakatalika zyoonse eezyi? [Amulindile bwiinguzi.] Ibumboni bunji buliko bulasinizya zyaambwa mu Bbaibbele kuti kuli Mulengi singuzu alimwi uutuyanda kapati. Ngu Leza wakasimpe alimwi zina lyakwe ngu Jehova.” Amubale Intembauzyo 83:18 mpoonya amupandulule mubufwaafwi mbwaali makanze aakwe aakucinca nyika yoonse eeyi kuti ibe paradaiso.
Mankind’s Search for God
“Akaambo kakuvwula kwazikombelo mazubaano, sena kuli nomwakalibuzide kale mbotukozya kuzyiba cikombelo cizumizidwe a Leza?” Amana kwiingula amujalule apeeji 377. Amukankaizye kaambo kanamba 7 akumubuzya mukamwini ŋanda naa ulazumina kuti cikombelo cakasimpe ceelede kukamantanya bantu bamisyobo yoonse. Amulange lugwalo lumwi akati kayaayo aatazubuludwe alimwi kweelana aciindi inga mwabandika atumwi twaambo tundandamikidwe. Ikuti kali aluyandisisyo, amumwaabile bbuku. Akuunka inga mwamusiila mubuzyo wakuti, “Ino mbuti cikombelo cakasimpe mboceelede kubujatikizya bukkale bwamuntu?” Amumwaambile kuti muya kupilukila kutegwa mukawiingule mubuzyo ooyo.
Ikuti muntu umwi walyaambilila kuti uzulilwa kucikombelo cimwi, mulakonzya kwaamba kuti: “Cilakkomanisya kuswaangana abantu bazikombelo ziindene-indene. Bantu balamuyandaula Leza munzila zinji-zinji. [Kuti kacikonzyeka amubale Incito 17:26, 27.] Kanji-kanji bantu banjila cikombelo cabazyali babo. [Amubale muncali 12 apeeji 8.] Ikwiiya nzyobasyoma bamwi muzikombelo zimwi kulayandika kapati alimwi inga kulagwasya. Eeli bbuku lilapandulula mbuzyakatalika zikombelo zinji ziliko munyika, zilengwa zicitwa anjiisyo zyayo.” Amutondezye ncolyaamba bbuku eeli kujatikizya cikombelo camuntu mbuli mbokutondezyedwe amapeeji aatobela aalembedwe: ba Siki (100-1); ba Hindu (116-17); ba Budda (141); ba Tao (164-6); ba Confucian (177); ba Shinto (190-5); ba Juda (220-1); alimwi aba Islamu (289).
Revelation—Its Grand Climax At Hand!
“Ndiza mwakaamvwa kale makani aa [amwaambe makani aayo]. Ibantu nobafwa mubunji cakutayeeyelwa, ibanji bakatazyigwa kuyeeya ncobakonzya kwaamba kutegwa bayumye-yumye mukwasyi wasweekelwa. Ino nywebo muyeeya buti?” Amulindile bwiinguzi. Mpoonya amujalule apeeji 299 akumutondezya cifwanikiso cabantu babuka citondezyedwe aawa. Amuzumanane kwaamba kuti: “Banji balalamwa nobayiiya kuti bantu baluleme abataluleme bayakubusyigwa mu Paradaiso anyika. [Amubale Incito 24:15 mbuli mboilembedwe mumuncali 9 apeeji 297 mpoonya amupandulule mbuli mbokulembedwe mumuncali 10.] Eeli bbuku lilijisi itwaambo atumbi tubotu kujatikizya ncayakucita kumbele Leza.”
Baibulo—Kodi Ndilo Mawu a Mulungu Kapena a Munthu?
“Tupona muciindi bantu boonse nobasikilwa mapenzi mapati. Banji bayandaula lugwasyo kuli koonse nkobakonzya. Bamwi ilugwasyo balulangauda kuli baabo bakaiya mbwabeleka maano. Ino muyeeya kuti nkuli nkotukonzya kujana lugwasyo lwini-lwini lukonzya kutugwasya ncobeni? [Amulindile bwiinguzi.] Ibbaibbele lilaamba kaambo kapati kalo kayandika kuti toonse tukamvwisye kabotu. [Amubale 2 Timoteo 3:16. Mpoonya amumvwunune apeeji 187 akubala muncali 9.] Eeli bbuku liyakumugwasya ikuti mwazitobela zyaambwa mu Bbaibbele alimwi zintu zinoomwendela kabotu.”
Muntu Mupati Kwiinda Iwakaponede
“Ciindi cino ca Kilisimusi bantu banji balamuyeeya Jesu. Nokuba boobo, akaambo kazintu zinji zibyaabi zicitika nyika yoonse, bamwi baladooneka kuti naa Jesu ulatulanganya ncobeni. Ino nywebo muyeeya buti kukaambo aaka?” Amulindile bwiinguzi. Amujalule kucibalo 24 akubandika mubufwaafwi Jesu ncaakaboolela anyika. Mpoonya amubale Johane 15:13, kusinizya luyando Jesu ndwajisi kuli bamwi.
“Bantu banji ciindi nibamvwa umwi kaamba ali Jesu Kristo, ciboola mumizeezo yabo ncakuti ucili muvwanda naa ulipengede cakuti uyanda kufwa. Nobamuyeeya Jesu bayeeya buyo kuzyalwa akufwa kwakwe. Izintu zibotu zyaakacita azyakaamba naakacili kupona zyoonse tazibikkilwi maano. Zyaakacita zilabajatikizya boonse bantu bakaponede abacipona anyika. Nkakaambo kaako ncotuyandika kapati kuziiya zintu zibotu zyaakatucitila.” Amubale Johane 17:3. Amujalule kupeeji yakutaanguna kumatalikilo akubala muncali wane.
Ncinzi Leza Ncayanda Kulindiswe?
“Sena muyeeya kuti Leza wakali kuyanda kuti katupona katuzingulukidwe mapenzi mbuli yaayo ngotuli angao mazubaano? [Amulindile bwiinguzi. Mpoonya amubale Matayo 6:10.] Sena kuli nomwakkala aansi kuyeeya ncobwaamba Bwami bwa Leza?” Amujalule kuciiyo 6 akubala mibuzyo iibuzidwe kumatalikilo aaciiyo. Inga mwatalika mubandi muciiyo naa kubaambila kuti muyoocita oobo mwaakupilukila.
“Nokuba kuti kuli kuyaambele mazubaano, kuciswa akufwa zyazumanana kupenzya bantu akubaletela buumba. Sena mulicizyi Jesu ncayakucitila bantu baciswa, bacembeede abafwide?” Amulindile bwiinguzi. Ikuti naa muntu uyanda kuzyiba bwiinguzi, amujalule kuciiyo 5, akubala mibuzyo yamincali 5-6. Amubandike zili mumuncali naa kubamba bubambe bwakucita oobo mwaakupilukila.
Amukombe Leza Mwini-Mwini Uuli Alikke
“Ino nkuli nkomuyeeya kuti inga twajana lugwasyo kuzintu zitupenzya mubuumi? [Amulindile bwiinguzi. Mpoonya amubale Ba-Roma 15:4.] Amubone kuti Magwalo aasalala alatulailila, kutuyumya-uyumya akutupa kuba alusyomo lukonzya kutuyumya ciindi notuli mubuyumu-yumu. Eeli bbuku lilijisi nzila zikonzya kutugwasya kwiinda mukubala Bbaibbele.” Amukankaizye twaambo tupati-pati tone tundandamikidwe apeeji 30.
“Kuzwa ciindi Jesu naakali anyika, bantu banji balikupailila Bwami bwa Leza kuti buboole. Sena kuli nimwakalibuzyide ncobuya kucita kubantu Bwami oobu bwakuboola? [Amulindile bwiinguzi. Mpoonya amubale Daniele 2:44.] Eeli bbuku lilapandulula ncobwaamba Bwami bwa Leza ancobuya kuzuzikizya ambotukonzya kugwasyigwa abweendelezi bubotu.” Amumutondezye cifwanikiso cili apeeji 92-3.