Luzibo Luzwa Kuli Leza Lulaingula Mibuzyo Minji
1 Nomwatakaningabaa luzibo lwini-lwini lwakasimpe, mulalangilwa kuti mwakalaa mibuzyo minji iijatikizya buumi njomwatakali kukonzya kwiingula. Mwakakkomana kaka kutambula bwiinguzi bwamu Bbaibbele kumibuzyo eyo! Lino mulakonzya kugwasya bamwi kujana bwiinguzi mbubwena obo. (Amweezyanisye 2 Timoteo 2:2.) Mulakonzya kubandika ambabo luzibo lwa Leza lusololela kubuumi butamani. (Joh. 17:3) Pele mbuti mbomunga mwagwasya umwi kuziba mboluyandika luzibo olu? Amuyeeye mibuzyo njokakamwiinguda kasimpe. Ncinzi ncobayanda kuziba abo bayandaula kasimpe? Ikuyeeya twaambo otu kulakonzya kumugwasya kumwaya bbuku lya Luzibo Lutola Kubuumi Butamani. Inzila zitobela zilakonzya kumugwasya ciindi nomulibambila kukambauka mu June.
2 Mbwaanga bantu banji balakankamana ncokuli kupenga kunji boobu munyika, eyi nzila ilakonzya kubeleka kabotu:
◼ “Ciindi ntenda noicitika naa milandu akulwana nozivwula, kanjikanji bantu balabuzya ncozicitikila zintu zibyaabi boobu. Inga mwaingula buti?” Amulindile kwiingula akulumba bwiinguzi bwamuntu oyo. Mpoona amujule kucibalo 8 mubbuku lya Luzibo akulanga cilembedwe mumuncali wa 2. Amupandulule kuti eli bbuku lipa bupanduluzi bwa Bbaibbele kujatikizya ncozicitikila zintu zibi, akwaamba kuti: “Ikuti kamusyomezya kuti inga mwalibala, inga ndakkomana kumusiila kkopi eyi akusanga kwa K1,000.00.”
3 Mwapilukila nkomwakasiya bbuku lya “Luzibo” mulakonzya kwaamba kuti:
◼ “Ndiyandisya kapati aakamanina makani kujatikizya kaambo ncokuli kupenga kapati munyika. Sena mulabuzumina bwiinguzi bwa Bbaibbele bulembedwe mubbuku?” Amulindile kwiingula. Amubale muncali 17 apeeji 77 mubbuku lya Luzibo, mpoona amulombe kubala bbuku lya Ba-Roma 9:14 kuzwa mu Bbaibbele lyasiŋanda. Mpoona amwaambe kuti: “Makani mabotu ngakuti Leza kunyina naleta macise akupenga munzila iitaluleme pe. Wasyomezya kutupa buumi butamani muluumuno alukkomano. Icibalo cakusaanguna mubbuku eli cilaamutwe wakuti ‘Mulakonzya Kukondwa Kumbele!’ Ndiyanda kupandulula mbocinga cakonzyeka eco kulindinywe akubayandwa banu.” Amujule ku cibalo 1 akutondezya mbuli mbotucita ciiyo. Amubandike cibalo eci mbuli mbokukonzyeka kweelena abukkale.
4 Mulakonzya kusala kubelesya matalikilo aali apeeji 14 mubbuku lya “Kukambitsirana” amutwe wakuti “Kukalamba/Imfa”:
◼ “Sena kuli nomwakabuzide kuti, ‘Sena lufwu ngamamanino aazintu zyoonse? Naa kuli cimbi cicitwa muntu afwa?’ [Amulindile kwiingula.] Ibbaibbele lilausalazya mubuzyo uli oonse ngotunga katujisi kujatikizya lufwu. [Amubale Mukambausi 9:5, 10.] Alimwi lilatondezya kuti kuli bulangizi bwini-bwini kuli baabo balaa lusyomo. [Amujule kumuncali 13 apeeji 84 mubbuku lya Luzibo; amubale akupandulula majwi aa Jesu aali kuli Johane 11:25.] Cibalo coonse eci ncakwiingula mubuzyo wakuti, Ninzi cicitika kubayandwa besu bafwide? Kuti kamuyanda kulibala inga ndaisiya kkopi eyi akusanga kwa K1,000.00.”
5 Ciindi nomupilukila mulakonzya kuyeekezyanya akwaamba kuti:
◼ “Ciindi cakamana twakabandika cicitika muntu nafwa. Bantu banji basyoma kuti buumi bwamuntu wafwa bubeda kujulu naa kuhelo. Pele sena kuli nomwakayeeyede kuti kulakonzyeka kuti bafwide bapone alimwi mpoona anyika ano? [Amulindile kwiingula.] Kweelana a Bbaibbele ibayoobusigwa bayooba akati kababombe myoyo bayookona anyika. [Amubale Intembauzyo 37:11, 29, mpoona amubandike muncali 20 apeeji 88 mubbuku lya Luzibo.] Obo bulangizi bwapa luumbulizyo kumamiliyoni aabantu bakali kupona kabayoowa lufwu. Eli bbuku liyoomugwasya kuteelelesya kaambo ako. Sena inga ndamutondezya mbocicitwa?”
6 Ikuti kamuyanda nzila nguba-uba mulakonzya kusoleka nzila eyi:
◼ “Ndiyanda kumutondezya cifwanikiso mubbuku eli lya Luzibo Lutola Kubuumi Butamani. Sena tacili cibotu cifwanikiso eci?” Amujule bbuku kutegwa siŋanda abone mapeeji 4-5. Amulindile kwiingula. Mpoona amubale majwi aali apeeji 5. Amumanizye akwaamba kuti: “Eli bbuku lilakonzya kucaala kulindinywe kutegwa mubale akusanga kwa K1,000.00 buyo.” Amubuzye naa nciindi nzi cikonzya kuba kabotu kutegwa mukapilukile.
7 Tulijisi luzibo luzwa kuli Leza ilwiingula mibuzyo iiyandika kapati mubuumi. Amulibambile kabotu, elyo Jehova uyoolongezya kusoleka kwenu akaambo kakwaamba makani aaya aapa buumi kuli baabo bayandaula kasimpe.