Amulibambilile Limwi!
1 Imbunga ya Jehova lyoonse itubambila mulongo wazyakucita zyateokrasi zyakutugwasya kuzintu zyakumuuya zyoonse ziyandika kulindiswe. Ikuti katuziyanda zintu ezi, tulasola kujana lugwasyo kuli zyoonse nzyotubambilidwe, mbuli kuswaya kwamulangizi weendeenda, miswaangano mipati amisyoonto alimwi abubambe bumbi bulibedelede ibukanzidwe mumbungano yanu. (Mt. 5:3) Pele bamwi balaindwa zintu ezi zinji zyakumuuya nkaambo kamapakasyo amwi ngobajisi. Ino ncinzi cinga cacitwa kutegwa tutabi muciimo eci? Mbuti mbotunga twacita kuti zintu zitali zyateokrasi zitasinkili “zintu ziinda kubota.”?—Flp. 1:10.
2 Ikulibambila Kwamaanu Kulayandika: Ibbuku lya Tusimpi 21:5 lyaamba kuti: “Makanze aabasungu alaleta zilyo zinji, pele uufwanzya makani ulajana bucete buyo.” Ikutegwa tujane “zilyo zinji” zyakumuuya tweelede kulibambilila limwi cabusungu katuyeeyede bubambe bwakacitwa bwateokrasi. Izintu zyesu zyakucita tatweelede kuzibikka aciindi nozinga zyapa kuti twiindwe zilongezyo zyakumuuya. Ikuti naa twabinda kubaa makanze aakucita zintu nzyotuyanda kakunyina kuyeeya zintu zyateokrasi nzyotweelede kucita kumbele, tulalangilwa kujana “bucete buyo” munzila yakumuuya.
3 Mutaindwi! Toonse kuli zintu nzyotukanza kucita kumbele, izijatikizya kulomba ciindi cakulyookezya kumilimo, kucita nyendo zyamakwebo, kuswaya basazima alimwi azimwi-zimwi. Kamutanasala kucita cintu cimwi naa kugozya makanze anu, amulange-lange mulongo wazintu zyakumuuya nzyomubambilidwe kumbele. Ikuti naa mwajana kuti ciindi ncomulibambide kubweza lweendo nceciindi nokuboola mulangizi wabbazu naa nokunooli muswaangano, amusole kubucinca bubambe bwanu kutegwa mukajanike. Twaambililwa limwi zintu zipati zilangilwa kucitwa kumbele. Ibaalu mumbungano yanu inga bamwaambila bubambe buliko mumbungano yanu.
4 Ikuti katuyeeya zyakumbele alimwi akulibambilila limwi kujatikizya zintu zipati, ‘tunoozwide micelo yabululami iileta bulemu alutembauzyo kuli Leza.’—Flp. 1:11.