Amucibelesye Kabotu Ciindi Ncomujisi
1 Luyando lwesu lwakukkomanisya Jehova lutupa kubikkila maanu kumilimo yakumuuya. Ijwi lyakwe litulailila ‘kusaanguna kuyandaula Bwami’ alimwi ‘akusalulula zintu ziinda kubota.’ (Mt. 6:33; Flp. 1:10) Ino mbuti mbotukonzya kuzandula ciindi cakucita ziyandika zya Bwami alimwi akubikka milimo iitayandiki kapati mubusena bwabili?—Ef. 5:15-17.
2 Amubikke Milimo ya Bwami Mubusena Bwakusaanguna: Amubambe mulongo wazyakucita kutegwa ciindi mutacisoweli kukucita zintu zitakwe mpindu. Ibamwi kumatalikilo aamwezi aumwi balabikka bubambe bwaciindi cigaminide camulimo wamumuunda akkalenda yabo. Mpoonya kunyina nobazumizya cintu cili coonse kunyonganya bubambe oobu. Andiswe tulakonzya kucita mbubonya kutegwa tuzandule ciindi cakwiinka kumiswaangano, kucita ciiyo cesu alimwi akujanika kumiswaangano yacooko. Ibanji bakabikka mulongo wakubala Bbaibbele abuzuba mafwumo-fwumo naa kumangolezya. Amubikke ciindi cigaminide kumulimo uuyandika aumwi alimwi mutazumizyi zintu zimwi kumunyonganya.—Muk. 3:1; 1 Kor. 14:40.
3 Mutazibelesyi Cakumaninina Zintu Zyamunyika: Mumasi amwi, zisobano, kulikondelezya, kulikatalusya alimwi akucita zintu zimwi muntu nzyayandisya, kulazumizyigwa. Banji balatola ciindi cinji kapati kweebelela cipekupeku naa kubelesya kkompyuta. Nokuba boobo, kujata bubi kukulikondelezya alimwi akukubelesya zibelesyo zipya nyika eeyi nzyoipa, cakutadooneka kuletela kutyompokelwa. (1 Joh. 2:15-17) Aboobo, Magwalo atukulwaizya kuti tutazibelesyi cakumaninina zintu zyamunyika. (1 Kor. 7:31) Kwiinda mukutobela lulayo lwabusongo oolu, tulakonzya kumutondezya Jehova kuti bukombi bwakwe tububikkide mubusena bwakusaanguna mubuumi bwesu.—Mt. 6:19-21.
4 Ciindi cicisyeede kubukkale bwasunu oobu cili afwaafwi kumana. Aabo babikka ziyandika zya Bwami mubusena bwakusaanguna bayookkomana alimwi bayootambulwa a Leza. (Tus. 8:32-35; Jak. 1:25) Aboobo, atucibelesye kabotu ciindi ciyandika kapati ncotujisi.