Mbotukonzya Kucijatisya Ciindi
1 Tujisi maankamaanka akaambo kakuvwula kwazintu nzyotucita mumulimo wa Jehova! (1 Kor. 15:58) Tulabona mbociyandika kuliyiisya tobeni alimwi akubaa ciiyo camukwasyi, ikubala Bbaibbele abuzuba, kulibambila alimwi akujanika kumiswaangano yambungano alimwi akutola lubazu lyoonse mumuunda. Balangizi balijisi mikuli yabweembezi alimwi amilimo imwi yakulanganya ziyandika zyambungano. Bamwi bajisi mikuli milemu mumukwasyi naa milimo iindenyi-indenyi yeelede kucitilwa bantu bamwi. Ikutegwa zintu zicitwe bweelede, muntu uuli woonse weelede kuti kalibambila kabotu zintu zyoonse alimwi kabatemi.
2 Amuzibikke Atala Eezyo Ziyandika Kucitwa Cakufwambaana: Ikutegwa tuzwidilile ‘mukujatisya kapati ciindi cesu coonse,’ cilakonzya kucitika ikuti naa twabelesya bupampu alimwi akuzilanga bweelede zintu. (Ef. 5:15, 16) Tweelede kuti katukanzide “kusala ziyandika kapati” akuzyibikka atala lyazyeezyo ziyandika kucitwa cakufwambaana. (Bafi. 1:10, Ci) Bamwi banabukwetene bakabwaamba boobu buumi bwamukwasyi wabo wabunaleza ikuti: “Tulapona kweelana akasimpe . . . Kasimpe takali kacibeela cabuumi bwesu buyo pe, pele mbuumi bwesu buya. Ngomusemo wazintu zyoonse zili mumbali-mbali.” Ikubikka bukombi bwa Jehova alimwi amulimo wakwe mubusena bwakusaanguna mubuumi bwamuntu cilayandika.
3 Amuzizyibe Eezyo Zyimumanina Ciindi: Mumvwiki kuli mawoola aali 168, eelyo tweelede kucibelesya kabotu ciindi ncotujisi. Ikutegwa tujane ciindi cakucita zyabunaleza, tweelede kuzizyiba zitumanina ciindi. Ikuvwuntauzya kumwi kwakacitwa ku United States kwakayubununa kuti, ibunji bwabantu bapati balatola ciindi iciinda kumawoola aali 30 amvwiki kweebelela cipekupeku! Bamwi ciindi bacimanina mukubala mabbuku aakunyika. Bamwi balamana ciindi cinji kuzintu zyakumubili mbuli zyakucita-cita, kulikondelezya ambweni muzisobano zyamumuncini wakkompyuta. Tweelede kuzilanga-langa nzyotucita abuzuba akubona mbuli mbotukonzya kucibelesya kabotu ciindi cesu. Ikubaa busongo caamba kutaciindilizya kucita zintu zitayi akomoonga.
4 Amube Acilengwa Cibotu: Kufwumbwa naa bukkale bwesu buli buti, toonse tulakonzya kujana ciindi cakucita zintu zyakumuuya. Bamwi bakacibona kuti ikufwambaana kubuka buzubaa buzuba cilabagwasya kuzuzikizya zintu zinji. Ikuti katubelesya ciindi cinji kuya kumulimo naa kulindila bantu, ciindi cimwi tulakonzya kucibelesya kubala Bbbaibbele, kulibambila zyamiswaangano ambweni kuswiilila makkaseeti aapangwa aba Sosaiti. Mikwasyi ilagwasyigwa kapati kwiinda mukubikka ambali ciindi ceelede lyoonse cakwiiya antoomwe. Ikuti muntu amuntu wamumukwasyi katamuki kusika kuciiyo camukwasyi, cilakonzya kugwasya umwi aumwi wabo kubaa ciindi cinji.
5 Lyabbila buyo izuba, tweelede kuzyiba kuti “ciindi ncifwiifwi” cisyeede. (1 Kor. 7:29) Buumi bwesu bulajatikizyigwa ambotucibelesya ciindi citaliboteli cisyeede. Eelo kaka tuyoolelekwa ikuti twacijatisya ciindi ikutegwa tuzumanane kubikka Bwami mubusena bwakusaanguna!—Mt. 6:33.