Ikucibelesya Camaanu Ciindi Ncotujisi
1. Ncinzi citukulwaizya kucibelesya camaanu ciindi ncotujisi?
1 Ciindi cilayandika kapati. Mbubwenya mbuli mali, ciindi cilakonzya kunyonyoonwa naa kubelesyegwa camaanu. Ino mucibelesya buti ciindi? Mbotuli Banakristo, iluyando ndotujisi kuli Jehova, Jesu Kristo alimwi abantuma lweelede kutukulwaizya kucibelesya camaanu ciindi ncotujisi, ‘ikucijatisya loko ciindi coonse.’—Ef. 5:16.
2. Mbuti ikubelesya ciindi ncotujisi mbokutwaandaanya?
2 Mukucita boobo, ibukkale bwa Munakristo buliindene kapati aboobo butobelwaa bantu bayanda bweende obu bwakaindi. Jesu wakalizyi kuti ciindi cilakonzya kumaninwa kukulibilikila bukkale bwesu bwakumubili cakwiindilizya. (Lk. 12:16-21; 17:28, 30) Paulo wakasinsima kuti ibantu bakali kunoopona kumazuba aakumamanino bakali kunooli baabo “bayandisya misalo yaansi.” (2 Tim. 3:4) Sena cilamukatazya kutobela mulongo wazintu zyakumuuya lyoonse? Sena kuli nomulombozya kuti kubota mwakajisi ciindi cinji mumulimo? Mbuti mbotunga twacibelesya kabotu ciindi ncotujisi?—Int. 90:12; Flp. 1:9-11.
3. Nintaamu nzi zibeleka nzyotunga twabweza kutegwa tucite zintu zyakumuuya lutaanzi?
3 Zintu Zyakumuuya Lutaanzi: Kunyina Jesu naakacita kulya, kunywa naa misalo kuba zintu nzyabikkila maanu kapati mubuumi. Nokuba kuti wakali haazibwene, kunyina naakalekela kulibilikila zintu zyakumubili naa zyamukwasyi kumunyonganya. Muciindi caboobo, wakakkomanina kucita kuyanda kwa Bausyi. (Mt. 13:55; Lk. 9:58; Joh. 4:34) Kuli zintu zigwasya nzyotunga twacita ikutegwa ciindi ncotujisi tucibelesye camaanu. Inzila yomwe nkwiinda mukuba amulongo wazintu zyakucita uukonzyeka akutobeleka. Nokuba kuti mulongo ooyu ulakonzya kutuzumizya kulyookezya akusobana, zintu zyakumuuya nzyezyeelede kubikkwa kumbele. Weelede kubikkilizya kujanika kumiswaangano yambungano yoonse, kutola lubazu mumulimo wamumuunda alimwi akuba aciindi cakucita ciiyo ca Bbaibbele cesu tobeni kutegwa tuzumanane kweendelaamwi akasimpe.
4. Nkaambo nzi bazyali ncobeelede kubikkila maanu kumulongo wazintu zicitwa amukwasyi wabo?
4 Ibazyali bajisi mukuli uuyungizyidwe wakugwasya bana babo kusungwaalila zintu zyakumuuya. Ciyoobagwasya ikuba amulongo wazintu zyakumuuya uutobeleka kumukwasyi woonse. Nobacita boobo, batondezya kuti balabubikkila maanu kapati bukkale bwabana babo akuti bacibelesya camaanu ciindi ncobajisi.—Dt. 6:6-9; Ef. 6:4.
5, 6. Mbuti ikulibikkila mbaakani mumulimo wesu mbokutugwasya kucibelesya camaanu ciindi ncotujisi?
5 Kubikkila Maanu Kuciindi Azicitwa: Cilagwasya ikuba ambaakani kujatikizya mulimo wesu wamumuunda. Tulakonzya kusala kunoobeleka mawoola aagaminide mumulimo wamumuunda amwezi. Ibanji bajana kuti mulimo wabupainiya bwakugwasilizya naa bwaciindi coonse nimbaakani mbotu. Ikuti kamutakonzyi lino kuyungizya ciindi ncomubelesya mukukambauka akuyiisya, sena inga mwayaambele kujatikizya nzyomucita mumulimo? Mbuti mbomunga mwacibelesya kabotu ciindi ncomujisi mumulimo?
6 Sena inga mwayaambele mukucizyiba kuyiisya kwiinda mukubelesya ntalisyo ziindene-indene nomukambauka? (km 1/02 3) Sena inga mwayaambele mukweendelezya ziiyo zya Bbaibbele naa kuyaambele kujatikizya mbomugamika bantu bajisi luyandisisyo ku Jwi lya Jehova alimwi akumbunga yakwe? (km 6/96 14-16) Munoocibelesya camaanu ncobeni mumulimo ciindi ncomujisi naa mwacita oobo.
7. Mbuti mbotunga twajana ciindi cakubikkila maanu kuzintu zyakumuuya, alimwi ino tugwasyigwa buti twacita boobo?
7 Ikuti kakuli mbazu momweelede kucinca, amufwambaane kubweza ntaamu. Sena inga mwabikka ambali cisela cawoola abuzuba kuzwa kuzintu zimbi? Eeco nceciindi ncomulangilwa kutola ikubala Bbaibbele lyoonse mumwaka omwe. Mmasimpe eeco inga camugwasya kapati kaka kumuuya! (Int. 19:7-11; 119:97-100) Amubikke ziindi zigaminide zyakubala Bbaibbele, kulibambila miswaangano alimwi amulimo wamumuunda. (1 Kor. 15:58) Ikucibelesya camaanu ciindi ncomujisi kuyoomugwasya kuzumanana “kumvwisya mbulubede luyando lwa-Mwami.”—Ef. 5:17.