Bakubusi Balabuzya
Sena ndizyibide kubelesya cipekupeku, kkompyuta afooni yamumaanza?
Ino zyintu nzi zikozyene nzyobacita aaba bantu botatwe?
“Ndilayandisisya kapati kulemba tugwalo aafooni yamumaanza! Ndiyeeya kuti nceciinda kubota! Ndiyeeya kuti mulakonzya kwaamba kuti nciceendelezya buumi bwangu.”—Alan.a
“Baama bakanduulila cipekupeku camuŋanda mondoona, eelo kaka ndakakondwa kapati! Muciindi cakuunka mukoona, ndakali kumuka akaambo kakweebelela cipekupeku. Ndakasala kweebelela cipekupeku kwiinda kubandika abamukwasyi abeenzuma.”—Teresa.
“Kwaciindi cili mbocibede, kunyina nindakali kuunka kuli koonse naa kucita cimwi cintu kakunyina kuyeeya kuti ndiza umwi wanditumina cintu cimwi akkeyala yangu ya Intaneti. Ikuti naa ndabuka akati kamasiku, ndakali kulanga-langa aa Intaneti. Kufwumba ndajana ciindi, ndakali kubikka zyintu zipya aa Intaneti.”—Anna.
Nguuli akati kabakubusi botatwe baambwa atala aawa ngomukonzya kwaamba kuti wakazyibila kubelesya tuncini?
□ Alan □ Teresa □ Anna
CIINDI bazyali banu nobakali bakubusi, wailesi ngomuncini wakazyibidwe. Kaindi, mafooni akali cintu buyo cakwaambawida alimwi akali kugobekwa kubwaanda. Sena eeci cilimvwisya kuba cakaindi? Musimbi ulaazina lya Anna ulakonzya kwaamba kuti inzya. Anna wakaamba kuti: “Bazyali bangu baakomenena muciindi nokwakanyina tuncini mbuli mafooni amumaanza. Mazuba aano nobatalika kuzyiba kabotu mboibelesyegwa fooni yamumaanza.”
Mazuba aano mulakonzya kubandika, kuswiilila nyimbo, kweebelela filimu, kusobana cisobano cimwi, kulembela mweenzinyoko kagwalo, kufwotola, alimwi akubelesya Intaneti—kwiinda mukubelesya buyo fooni yamumaanza njomukonzya kubikka munkomo. Akaambo kakukomenena muciindi camakkompyuta, mafooni amumaanza, zipekupeku alimwi a Intaneti nozyavwula, mulakonzya kuyeeya kuti kunyina bubi kuzibelesya ciindi coonse. Pele bazyali banu balo balakonzya kuyeeya kuti mwakazibila. Kuti baamba mbobalimvwa, mutazisulaiki nzyobaamba akuyeeya kuti tazyibeleki akuti taali masimpe. Mwami Solomoni wakaamba kuti: “Na muntu wavuwa katana kumvwa, mbufubafuba bwakwe ansoni.”—Tusimpi 18:13.
Sena mulikazyi kaambo bazyali banu ncobalibilika? Amulibuzye mibuzyo iitobela kutegwa muzyibe naa mulaciindilizya kubelesya tuncini tumwi mbuli cipekupeku, kkompyuta afooni yamumaanza.
‘Sena ndakalizyibizya?’
Ibbuku limwi lipandulula mabala litegwa encyclopedia lyakapandulula kuti kulizyibizya caamba “kuba aciyanza cimwi muntu ncatakonzyi kuleka naa ncatayandi kuleka nokuba kuti ciletela mapenzi.” Kweelana abupanduluzi oobu, bakubusi boonse botatwe baambwa kumatalikilo aacibalo eeci balizyibide kubelesya tuncini mbuli cipekupeku, kkompyuta afooni yamumaanza. Ino nywebo mulimvwa buti? Amulange aansi aawa zibeela zisiyene-siyene zyabupanduluzi bwabbala lyakuti kulizyibizya. Amubale majwi aazubulwidwe akubona kuti naa mwakalaambide naa kucita cimwi cintu cikozyene. Mpoonya amulembe bwiinguzi bwanu.
Ciyanza citalekeki. “Ndakali kutola mawoola manji kusobana zisobano zijanika atuncini mbuli afooni yamumaanza. Zyakali kundimana ŋonzi alimwi ciindi coonse nzyezyintu nzyondakali kuyanda buyo kwaambila beenzuma. Ndakali kulizandula kumukwasyi wangu alimwi ciindi coonse cakali kuboola mumizeezo yangu zisobano nzyondakali kusobana.”—Andrew.
Mukuyeeya kwanu, ino nciindi cilamfwu buti ncomweelede kusobana zisobano zyaatuncini? ․․․․․
Ino nciindi cilamfwu buti bazyali banu ncobayanda kuti kamusobana zisobano zyaatuncini? ․․․․․
Ino nciindi cinji buti abuzuba ncomweelede kubelesya kulemba tugwalo twaafooni, kweebelela cipekupeku, kubikka zifwanikiso atwaambo a Intaneti, kusobana zisobano zyaatuncini alimwi azimwi? ․․․․․
Mwamana kulanga bwiinguzi bwanu atala aawa, sena inga mwaamba kuti mulaciindizya kutubelesya tuncini?
□ Inzya □ Peepe
Ncatakonzyi kuleka naa ncatayandi kuleka. “Bazyali bangu balandibona kandilemba tugwalo twaafooni akundaambila kuti ndilaciindizya. Pele kuti twalanga baabo bamisela yangu, tandisiki ali mbabo. Pele ndalanga bazyali bangu, ncobeni tabasiki ali ndime. Pele kucita tweezyanisya maapo amaolenji—balo bajisi myaka iili 40 mebo ndijisi buyo myaka iili 15.”—Alan.
Sena bazyali banu naa beenzinyoko kuli nobakamwaambilide kuti mutola ciindi cilamfwu nomubelesya tumwi tuncini?
□ Inzya □ Peepe
Sena cilamukatazya naa tamuyandi kucileka kubelesya kancini aako?
□ Inzya □ Peepe
Mapenzi aajanika. “Beenzuma balalemba tugwalo twaafooni ciindi coonse—noliba leelyo nobeenzya mootokala. Eelo kaka eeci ciletela ntenda!”—Julie.
“Ciindi nindakaula fooni yamumaanza, ndakali kwiide kutuma ciindi coonse naa kulembela umwi kagwalo kaafooni. Eeci ncondakali kucita lyoonse. Eeci cakanyonganya cilongwe ncendakajisi amukwasyi wangu alimwi abeenzuma bamwi. Mazuba aano twaunka mukweendeenda abeenzuma, ndatalika kubaambauzya lyoonse bandinjila mukanwa akundaambila kuti: ‘Kolindila. Ndiyanda kusandula kagwalo afooni.’ Nkakaambo kamwi kandipa kutayanzana abeenzuma bali boobu.”—Shirley.
Sena kuli nomubala naa kulemba tugwalo twaafooni ciindi nomweenzya mootokala naa nomuli mucikolo?
□ Inzya □ Peepe
Ciindi nomubandika abanamukwasyi naa beenzinyoko, sena muvwula kukosokezya mubandi kutegwa musandule tugwalo a Intaneti, mwiingule fooni naa tugwalo twaafooni?
□ Inzya □ Peepe
Sena kubelesya tuncini kumumanina ciindi cakoona naa cimupa kuti mutajani ciindi cakubala?
□ Inzya □ Peepe
Mbomukonzya Kuzilanga Zyintu Munzila Yeelede
Ikuti kamubelesya tuncini tumwi mbuli kkompyuta, fooni yamumaanza, naa tuncini tumwi buyo—amulibuzye mibuzyo yone iili aansi aawa. Kubelesya lulayo lwamu Bbaibbele akutobela zyintu nzyolyaamba kuti mucite kuyoomugwasya kulikwabilila alimwi akulyeendelezya.
1. Ino nzinzi zilimukati? Amuzuzye mizeezo yanu ‘azyintu zyamasimpe, zyintu zipegwa bulemu, zyintu ziluleme, zyintu zisalala, zyintu ziyandika, zyintu zili ampuwo mbotu, zyintu zili kabotu, alimwi azyintu zitembaulika, kamuzumanana kuziyeeyesya zyintu eezyi.’—Bafilipi 4:8.
Mweelede kuyanzana abeenzinyoko abanamukwasyi alimwi akubandika makani aayaka.—Tusimpi 25:25; Baefeso 4:29.
Tamweelede kwaamba zyakubeja kujatikizya bamwi, kutuminana tugwalo naa zifwanikiso zitapi bulemu, naa kweebelela mavidiyo atondezya zisapi.—Bakolose 3:5; 1 Petulo 4:15.
2. Ino ndilili nenditubelesya? “Zintu zyoonse zilijisi ciindi cazyo, amakani oonse aansi alijisi mazuba aao.”—Mukambausi 3:1.
Mweelede kulibikkila ciindi ncomweelede kubelesya kutuma akwiingula fooni akulemba tugwalo, kweebelela mavidiyo, naa kusobana zisobano zyaatuncini. Kuzima fooni ciindi nomucita zyintu ziyandika kapati mbuli miswaangano yabukombi citondezya bulemu. Mulakonzya kwiiyasya fooni mwamanizya.
Tamweelede kubelesya tuncini ciindi ncomwabikka ambali cakuba abeenzinyoko, abanamukwasyi, cakwiiya, naa cakucita zyintu zyakumuuya.—Baefeso 5:15-17; Bafilipi 2:4.
3. Ino mbaani mbondiyanzana limwi? “Muteenwi pe. Kuyanzana kubyaabi kunyonganya zilengwa zibotu.”—1 Bakolinto 15:33.
Mweelede kubelesya tuncini kuyumya cilongwe canu abantu bakonzya kumukulwaizya kuba azilengwa zibotu.—Tusimpi 22:17.
Tamweelede kulicenga pe—muyootobela bukkale, ŋambawido, alimwi akuyeeya kwabaabo mbomuyanzana limwi kwiinda mukubeebelela acipekupeku, a Intaneti, mukutuminana tugwalo a Intaneti aafooni.—Tusimpi 13:20.
4. Ino ndibelesya ciindi cilamfwu buti? “[A]musinizye zyintu ziyandika kapati.”—Bafilipi 1:10.
Mweelede kubalila ciindi ncomubelesya atuncini.
Tamweelede kusulaika nzyobaamba beenzinyoko naa malailile kuzwa kubazyali banu kuti naa baamba kuti musowa ciindi cinji nomubelesya tuncini.—Tusimpi 26:12.
Andrew wakaamba bubotu bwakubelesya tuncini, wakati: “Tuncini ntubotu, pele kwaciindi cisyoonto buyo. Lino tandizumizyi tuncini kunyonganya cilongwe cangu abanamukwasyi abeenzuma.”
[Bupanduluzi buyungizidwe]
a Mazyina amwi mucibalo eeci acincwa.
[Kabbokesi/Zifwanikiso izili apeeji 27]
NZYOBAAMBA BEENZINYOKO
“Bazyali bangu bakali kundaambila kuti, ‘Ciindi coonse inga wiide kubelesya fooni.’ Kumatalikilo ndakali kuyeeya kuti basobana buyo, pele mukuya kwaciindi ndakazyiba kuti bakali sinizyide ancobakali kwaamba. Mazuba aano, tandicilembi–lembi tugwalo afooni, alimwi ndilikkomene kapati.”
“Ndakali kulimvwa kuti lyoonse ndeelede kuba a Intaneti kufwumbwa kuti kailiko. Tiindakali kubikkila maano kumilimo yakucikolo iicitilwa aŋanda alimwi akubala. Lino akaambo kakuti ndacileka kubelesya Intaneti kwaciindi cilamfwu, cili mbuli kuti ndalemununwa mukuli ngondakatukkide. Ciyandika kapati nkutaciindizya.”
[Zifwanikiso]
Jovarny
Mariah
[Kabbokesi kali apeeji 28]
“NDAKALI KUBANDIKA KAPATI ABANTU A INTANETI”
“Myaka misyoonto yainda mukwasyi wesu wakalonga. Ndakali kuyanda kunookwabana abeenzuma muluwo alimwi bakandaambila kuti katutuminana zifwanikiso a Intaneti. Eeci cakali kulibonya mbuli kuti nenzila mbotu yakukwabana muluwo. Ndinoobandika buyo abantu mbondizyi kutali mbonditazyi pe. Aboobo, sena kuli cakali kukonzya kulubila?”
Kumatalikilo, zyoonse zyakali kweenda kabotu. Ndakali kwiinka a Intaneti ciindi comwe ansondo kuyoolanga zifwanikiso zya beenzuma akubatumina tugwalo alimwi akubala tugwalo tobakali kunditumina kujatikizya zifwanikiso zyangu. Mukuya kwaciindi ndakali kwiide kuyeeya buyo zya Intaneti. Kakutanainda ciindi cilamfwu, ndakali kujanika aa Intaneti ciindi coonse. Akaambo kakuti ndakali kujanika aa Intaneti lyoonse, bantu bakazyibene abeenzuma buyo bakatalika kundizyiba alimwi bakayanda kuti ndibe mulongwe wabo. Sena mulizyi mbocibede—mweenzinyoko wakwaambila kuti ooyu muntu uli kabotu, mpoonya anduwe wazumina. Muciindi cisyoonto buyo, ujisi beenzinyoko bali 50 aa Intaneti.”
“Kakutanainda ciindi, lyoonse ndakali kwiide kuyeeya zya kuunka aa Intaneti. Nokuba leelyo nindakali aa Intaneti, ndakali kuyeeya nendiyoopilukila aa Intaneti, alimwi kuti ndakali kuyanda kutuma zifwanikiso zipya aa Intaneti. Ndakali kubala tugwalo, kutuma tumavidiyo, kanditana ciyeeyela kwakali kujanika kuti mawoola manji ainda.
“Nikwakainda mwaka omwe acisela, nceciindi nindakazyiba kuti ndakali kuciindizya mukubelesya tuncini. Mazuba aano, tandiciindizyi nendibelesya Intaneti alimwi ndiyanda kutalika cilongwe abantu mbondibona alimwi mbondizyi kuti balalilemeka. Beenzuma bamwi tabazizumini nzyondicita , pele ndakayiya ciiyo.”—Ellen ujisi myaka ili 18.
[Kabbokesi kali apeeji 28]
INGA MWABABUZYA BAZYALI BANU
Ziindi zimwi mulakonzya kugambwa ciindi mwatalika mubandi abazyali banu kujatikizya zyakulikondelezya. Cheryl wakaamba kuti: “Ciindi cimwi bataata nobakali kuyeeyela kuti ndakajisi CD iijisi nyimbo zitali kabotu, ndakabalomba kuti tukkale aansi akwiiswiilila CD yoonse. Bakazumina mpoonya bakandaambila kuti kunyina nyimbo njobakajana iitali kabotu mu CD eeyi.”
Aansi aawa, kolemba mubuzyo ngoyanda kubuzya bazyali bako kujatikizya tuncini.
[Kabbokesi kali apeeji 29]
KUBAZYALI
Sena mwanaanu mukubusi utola ciindi cilamfwu naabelesya Intaneti, natuma akutambula tugwalo afooni, naa naabelesya kalimba kasyoonto kakumatwi (MP3 player) kwiinda ciindi ncabandika andinywe? Kuti kacili boobo, ino inga mwacita buti?
Nzila yomwe nkumunyanga eeco cimusowela ciindi mwanaanu. Pele mutayeeyi kuti tuncini toonse tuli boobu tatuli kabotu. Ambweni andinywe mulabelesya tuncini tumwi ntobatakajisi bazyali banu. Aboobo muciindi cakwiide kumunyanga kancini mwanaanu mukubusi kakunyina aakaambo kamvwika, mulakonzya kumuyiisya mbwayelede kubelesya tuncini ootu munzila iili kabotu alimwi akutaciindizya. Mbuti mbomukonzya kucita oobo?
Amukkale aansi akwaabandika makani antoomwe amwanaanu. Cakusaanguna, amumwaambile kaambo kamulibilisya kujatikizya mbwabelesya tuncini ootu. Cabili, amumuswiilile naambaula. (Tusimpi 18:13) Catatu, amujane nzila mbomukonzya kumugwasya. Mutayoowi kumukasya zyintu nzyateelede kucita, pele mutaciindizyi. (Bafilipi 4:5) Ellen waambwa kumatalikilo, wakaamba kuti: “Ciindi nindakajisi penzi lyakuyandisya kutuma tugwalo aafooni yamumaanza, bazyali bangu kunyina nobakandinyanga fooni yangu, pele bakandigwasyilizya. Bazyali bangu mbobakacita zyintu cakandigwasya kubona mbondeelede kubelesya fooni kutuma tugwalo nociba ciindi ncondatakali aabazyali bangu.”
Ino kuti mwanaanu wakazya kusola kulikwabilila? Mutayeeyi kuti mwanaanu takalutobeli lulayo lwanu. Muciindi caboobo, amukkazike moyo akumupa ciindi mwanaanu kuti aliyeeye kujatikizya makani aayo. Kulalangilwa kuti mwanaanu uyoocizumina aakale ncomumwaambila alimwi uyoocinca. Bakubusi banji balimvwa mbuli bwakaamba mukubusi wazyina lya Hailey ikuti: “Akusaanguna ndakanyema kapati ciindi bazyali bangu nibakandaambila kuti ndakalizyibizya kubelesya kkompyuta. Pele nokwakainda ciindi, ndakaliyeeya alimwi ndakabona kuti nzyobakali kundaambila zyakaliluzi.”
[Cifwanikiso icili apeeji 29]
Sena mulatweendelezya tuncini, naa tuncini ntotumweendelezya?