Mbuti Tekinoloji Mboikonzya Kujatikizya Zilongwe Zyanu?
Kulembelana tugwalo twaafooni, kutuminana ma email, kukwabana avidiyo (videoconferencing) alimwi akubelesya mawebbusaiti aakubandikila a Intaneti, kupa kuti bantu bobilo kabakonzya kubandika nokuba kuti umwi ukkala kubusena buli kule kapati. Bantu bali boobu, tekinoloji ilabagwasya kapati.
Nokuba boobo, bantu bamwi ibavwula kubelesya tekinoloji kuyumya zilongwe zyabo, balakonzya kuba amapenzi aali mbuli yaaya aatobela:
kutabikkila maano kujatikizya mbobalimvwa balongwe babo.
kulimvwa kulendelelwa alimwi akulimvwa kubula mpindu.
kulibikkila buyo maano lwabo kwiinda bamwi.
NCOMWEELEDE KUZYIBA
LWEETELELO
Kutegwa tuzyibe mbwalimvwa muntu uumwi, tweelede kuba aciindi cakuyeeya kujatikizya muntu ooyo. Pele eeci cilakonzya kukatazya kuti katujisi bubi kubala naa kutuma tugwalo alimwi akulanga amawebbusaiti aakubandikila a Intaneti.
Mukuya kwaciindi, ikuti kamujisi tugwalo tunji tuyandika kubala, ciyootalika kumukatazya kwiingula kagwalo kazwa kumulongwe wanu. Muyootalika buyo kuyanda kwiingula tugwalo twanu toonse cakufwambaana kakunyina akubikkila maano naa nkagwalo kayandika kapati naa pe. Alimwi eeci inga camupa kwaalilwa kuzyiba kuti mulongwe wanu umwi uyandika lugwasyo.
NCOMWEELEDE KUYEEYA: Ino inga mwatondezya buti kuti ‘mulabeetelela’ balongwe banu ciindi nomubelesya tekinoloji kubandika ambabo?—1 PETRO 3:8.
KULIMVWA KUBULA MPINDU
Basikuvwuntauzya bamwi bakajana kuti, bantu bakalimvwa bubi kapati nobakamana kubelesya mawebbusaiti aakubandikila a Intaneti. Basikuvwuntauzya aaba bakaamba kuti, kulanga mafwoto aatondezya nzyobacita bantu bamwi, kulakonzya kupa muntu “kulimvwa kuti walo kunyina cintu camaaneo ncaakacita.”
Kuyungizya waawo, kulanga mafwoto aakkomanisya ngobabikka bamwi, kulakonzya kupa muntu kulimvwa kuti buumi bwakwe tabukkomanisyi mbuli bwabeenzinyina. Cili boobu akaambo kakuti, mawebbusaiti aakubandikila a Intaneti apa kuti cilibonye mbuli kuti bantu bamwi lyoonse balo inga balikkomene, aboobo tulakonzya kulimvwa kuti swebo buumi bwesu tabukkomanisyi.
NCOMWEELEDE KUYEEYA: Ciindi nomubelesya mawebbusaiti aakubandikila a Intaneti, mbuti mbomukonzya kweeleba kulyeezyanisya abamwi munzila iitali kabotu?—BAGALATIYA 6:4.
KULIBIKKILA MAANO LWANU
Mwiiyi umwi wakalemba kuti basicikolo bakwe bamwi bakali kuliyanda alimwi bakali kuyanda buyo balongwe bakonzya kubagwasya.a Balongwe bali boobu babikkila buyo maano kujatikizya mbobakonzya kugwasyigwa balo kutali beenzinyina. Muntu ulakonzya kutalika kuyeeya kuti balongwe bakwe bali mbuli kkompyuta naa fooni njakonzya kusobanya kufwumbwa ayanda, mpoonya akuleka kwiibikkila maano zimwi ziindi.
NCOMWEELEDE KUYEEYA: Sena zintu nzyomubikka a Intaneti zitondezya kuti mujisi cilengwa cakuyanda kuzundana abamwi naa kulibikkila kapati maano lwanu?—BAGALATIYA 5:26.
NCOMUKONZYA KUCITA
AMULILINGULE KUJATIKIZYA MBOMWIIBELESYA TEKINOLOJI
Ikuti tekinoloji kamuyeendelezya muciindi cakuti kaimweendelezya njiyo, iyoomugwasya kunoobandika abalongwe banu alimwi akuyumya zilongwe zyanu.
NJIISYO YAMU BBAIBBELE: “Luyando . . . talubikkili buyo maano kuzintu nzyoluyanda.”—1 BAKORINTO 13:4, 5.
Amusale nzila nzyomuyanda kusola kubelesya, naa kulilembela mizeezo yanu.
Amusole kubandika abantu cantongolameso muciindi cakwiile kutuma buyo tugwalo twaafooni naa ma email.
Amwiibikke ambali fooni (naa kwiisetiŋa kuti kaitalili) ciindi nomubandika abamwi
Amucesye ciindi ncomubelesya kulanga zifwoto zyabamwi nzyobabikka a Intaneti, kubala nzyobalemba bamwi alimwi anzyobacita
Amube muswiilizi uuli kabotu
Amubandike amulongwe uuli mubukkale bukatazya
a Lipooti eeyi yakaambwa mubbuku litegwa Reclaiming Conversation.