Bana Alimwi a Social Media—Cibeela 2: Kuyiisya Mwanaanu Mbwakonzya Kwiibelesya Kabotu Social Media

Akaambo kakuti balizyi ntenda ziliko, bazyali banji tababazumizyi bana babo kubelesya social media. Nokuba boobo, ikuti mwanaanu mulamuzumizya kubelesya social media, mbuti mbomukonzya kumugwasya kweeleba zintu zitali kabotu alimwi akwiiya mbwakonzya kwiibelesya kabotu intaneti?

Mucibalo eeci tulanga-langa makani aatobela:

• Zintu ziyandika kapati kumwanaanu

• Mwanaanu mbwakonzya kujatikizyigwa mumizeezo

• Mwanaanu mbwanoocita zintu aintaneti

• Nzyomukonzya kubandika

Zintu ziyandika kapati kumwanaanu

Ncomweelede kuzyiba: Akaambo kakuti social media ilakonzya kuba cizibilizi, mwanaanu inga wayandika lugwasyo lwanu kutegwa kacikonzya kweendelezya ciindi ncanoobelesya nali aintaneti.

Njiisyo yamu Bbaibbele: ‘Amusinizye zintu ziyandika kapati.’—Bafilipi 1:10.

Ncomweelede kuyeeya: Sena mwanaanu uyandisya kubelesya intaneti ciindi nayelede koona, kucita milimo yakucikolo, naa ciindi nali antoomwe abanamukwasyi? Basikuvwuntauzya baamba kuti bakubusi beelede koona kwamawoola aasika ku 9, pele aabo batola ciindi cinji aintaneti inga boona buyo mawoola masyoonto aatasiki ku 7.

Ncomukonzya kucita: Amubandike amwanaanu kujatikizya zintu ziyandika kapati, alimwi amubandike kaambo ncociyandika kulibikkila ciindi ncatola nali aintaneti. Amumubikkile milawo, mbuli wakuti kunyina fooni naa muncini uli woonse ngwayelede kuba anguwo muluumu yakwe masiku. Mbaakani yanu njakuti mwanaanu kakonzya kulyeendelezya kabotu—oobu mbobube buyoomugwasya aakukomena.—1 Bakorinto 9:25.

Mwanaanu mbwakonzya kujatikizyigwa mumizeezo

Ncomweelede kuzyiba: Ciindi mukubusi nalanga mafwoto aabantu bamwi bakkomene alimwi azintu zibotu nzyobacita eeci cipa kuti alimvwe kulendelelwa akutyompwa.

Njiisyo yamu Bbaibbele: “Amuleke . . . munyono.”—1 Petro 2:1.

Ncomweelede kuyeeya: Sena social media iipa mwanaanu kulimvwa bubi kujatikizya mbwalibonya? Sena mwanaanu ulimvwa kuti buumi bwabantu bamwi bulakkomanisya kapati, pele bwakwe tabukkomanisyi?

Ncomukonzya kucita: Amubandike amwanaanu bubi buliko bwakulyeezyanisya abantu bamwi. Amuzyibe kuti bana basimbi balajatikizigwa kapati kwiinda bana basankwa, mbwaanga basimbi balabikkila kapati maano kujatikizya mbobalibonya. Mulakonzya kupa muzeezo wakuti mwanaanu kaleka kubelesya social media kwaciindi cili mbocibede. Mukubusi umwi wazina lya Jacob wakaamba kuti: “Ndakaidilita aapu ya social media kwaciindi cili mbocibede. Cakandigwasya kubikkila maano kuzintu ziyandika kapati alimwi akucinca mbondilibona alimwi ambondibabona bantu bamwi.”

Mwanaanu mbwanoocita zintu aintaneti

Ncomweelede kuzyiba: Kujanika a social media calakozyanisyigwa akuba kumbele lyabantu. Ncuuba-uba kuzwangana akutamvwana.

Njiisyo yamu Bbaibbele: “Amuzisowe zintu zyoonse eezyi, kulutila, bukali, kunyema, kubwenta alimwi amajwi aakusampaula . . . Pele amufwidilane luzyalo.”—Baefeso 4:31, 32.

Ncomweelede kuyeeya: Sena social media yapa kuti mwanaanu atalike kuvwiya, kutamvwana abamwi, naa kwaamba zintu zitali kabotu?

Ncomukonzya kucita: Amumugwasye mwanaanu kuba azilengwa zili kabotu ciindi nali aintaneti. Bbuku litegwa Digital Kids yaamba kuti: “Mulimo wesu mbuli bazyali wakubayiisya cakutainda mumbali bana besu kuti lunya taluyandiki, tacikwe makani naa mpaafooni naa ncacigaminina.”

Kamuyeeyede kuti social media tacili ncecintu ciyandika alimwi akuti tabali bazyali boonse bazumizya bana babo kwaabelesya. Ikuti mulamuzumizya mwanaanu kubelesya social media, mweelede kusinizya kuti ulisimide mumizeezo cakuti ulakonzya kulilesya caboola kuciindi ncabelesya, kuba abalongwe bali kabotu alimwi akweeleba zintu zibyaabi.