Ncinzi Ncondeelede Kucita Ikuti Bazyali Bangu Kabandikasya Kubelesya Social Media?

Kulibonya kuti balongwe banu boonse balaibelesya social media, alimwi balaamba kujatikizya njiyo ciindi coonse. Alimwi buya ambweni balamuseka akaambo kakuti nywebo tamwiibelesyi. Ino ncinzi ncomweelede kuzyiba mubukkale oobu? Alimwi ncinzi ncomukonzya kucita?

Ncomweelede kuzyiba

Tamuli nyolikke pe. Bazyali banji tababazumizyi bana babo kubelesya social media. Eeci cili boobo akaambo kakuti balizyi kuti kubelesya social media kujatikizya zintu eezyi zitobela:

• kutyompwa alimwi akunyongana mumizeezo.

• kutalika kweebelela zintu ziletela muzeezo wakoonana, kutuminana zintu ziletela muzeezo wakoonana, alimwi akucita luta kwiinda mukubelesya Intaneti.

• kutamvwana abantu bamwi.

Bunji bwabakubusi basala kuleka kubelesya social media. Bakalibonena lwabo beni kuti social media yali kubanyonganya. Amubone zikozyanyo zitobela zyakacitika ncobeni:

• Priscilla wakabona kuti wakali kutola ciindi cinji kubelesya social media kwiinda ciindi ncaakali kubelesya kucita zintu zigwasya.

• Jeremy tanaakazikkomanina zintu izyakali kuboola zitali kabotu zyalo nzyaatakali kukonzya kulesya.

• Bethany wakabona kuti cakali kumupa kubikkila kapati maano kuzintu nzyobakali kucita bantu bamwi.

“Ndakasala kwiigusya aapu iijisi social media, aboobo ndilikkomene kuti ndakacita oobo. Kunyina nondiiyeeya pe, alimwi ndilikkomene kuti ndijisi ciindi cinji cakucita zintu ziyandika kapati.”​—Sierra.

“Tiindakali kucikkomanina cizibilizi ca social media ncoyakali kundipa alimwi zimwi ziindi ndakali kulibilika bantu mbobakali kuzibona zintu nzyondakali kuposta. Tiicakali cuuba-uba kwiigusya aapu, pele nindakaigwisya ndakalimvwa kabotu mpoonya mpoonya. Lino ndijisi luumuno lunji.”​—Kate.

Ncomukonzya kucita

Amwaatobele malailile abazyali banu. Amubatondezye kuti mwakasima cakuti mulakonzya kupona kwiinda mukutobela malailile aabo kakunyina kunyema naa kutongooka.

Njiisyo yamu Bbaibbele: “Mufwubafwuba ulatondezya bukali boonse buli mumoyo wakwe, pele musongo ulakkazika moyo alimwi ulalijata.”​—Tusimpi 29:11.

Bamwi balakonzya kumukulwaizya kuti kamubelesya social media kabatazyi bazyali banu naa kujalula akkaunti njobatazyi. Ooko inga kwaba kulubizya! Ikuti kamutasyomeki mulakonzya kulibilika akulipa mulandu. Eeci cilakonzya kumunjizya mumapenzi cakuti bazyali banu balakonzya kuleka kumusyoma.

Njiisyo yamu Bbaibbele: “Tuyanda kuti katusyomeka muzintu zyoonse.”​—Bahebrayo 13:18.

Aabe makanze aanu. Mbuli bakubusi baambwa atala, mulakonzya kutalika kuyeeya twaambo tunji mbomukonzya kweeleba kubelesya social media. Ikuti kacisalede kuti kubelesya social media tacili cibotu kulindinywe, amuleke kwiibelesya ikutali akaambo kakuti nkusala kwabazyali banu pele akaambo kakuti ndinywe mwalisalila. Munzila eeyi ikuti balongwe banu bamubuzya, tamukalisendi pe kubaambila alimwi kunyina nobayoomuseka.

Masimpe ngakuti: Amumvwane abazyali banu, alimwi amujane cintu cimwi ncomukonzya kuzuminana kujatikizya social media, ikutegwa kusala kwabo kakukozyenye akusala kwanu. Mbubo, calino mulakonzya kukkala kakunyina social media.