Ikulyookezya Amukubikke Mubusena Bweelede
1 Muziindi eezi zikatazya, toonse tuyandika kupumuna ciindi aciindi. Ikulyookezya kuli mbokubede kuli mbokweelede. Nokuba boobo, kusowa ciindi cinji mukulyookezya, kulikondelezya alimwi akuyanzana kulakonzya kupilusya muntu musyule akutalika kubaa ciindi cisyoonto cakucita zintu zyakumuuya. Ikulyookezya tweelede kukubikka mubusena bweelede. (Mt. 5:3) Ino mbuti eeci mbocinga cakonzyeka? Nkwiinda mukutobela lulayo lujanika ku Ba-Efeso 5:15-17.
2 Amubikke Mbaakani: Paulo wakalemba kuti, Banakristo beelede ‘kucenjela loko’ kujatikizya mbobeelede kupona kabotu. Kucita zintu munzila yaakati-kati alimwi akulyeendelezya zilayandika mukucesya ciindi cakulyookezya kuzintu ziyandika kapati. Ncibotu kubikkila maanu kapati kunzila mbotubelesya ciindi cesu nokutakwe cakucita. Kulikondelezya kweelede kugwasya munzila imwi ikutali kwiide kutupa kulimvwa kuti twasowa buyo ciindi cesu akutupa kukatala kapati. Ikuti twasyaala katutakkomenyi, katutazulide alimwi akulimvwa kubaa mulandu notwamana kutola lubazu mumulimo umwi, eeci cilakonzya kutondezya kuti kucinca kweelede kucitwa kujatikizya nzila mbotubelesya ciindi cesu.
3 Amusongwaale: Paulo wakapa lulayo kujatikizya ‘kujatisya loko ciindi’ kuzintu ziyandika kapati mubuumi kutali “kufubaala” pe. Banakristo balyaabide tabeelede kubikkila maanu kapati kukulikondelezya mubuumi bwabo. Nokuba kuti kulyookezya kulakonzya kutukatalusya munzila yakumubili, nkuunguzu zyamuuya uusalala wa Leza ikuzwa nguzu zyakumuuya. (Is. 40:29-31) Tulatambula muuya wakwe kwiinda mumilimo yateokrasi, nkokuti kwiiya Bbaibbele, kujanika kumiswaangano yambungano, kutola lubazu mumulimo wamumuunda—kutali kwiinda mukulikondelezya.
4 Amubikke Zintu Ziyandika Kapati Ambele: Paulo wakalailila Banakristo kuzumanana “kumvwisya mbulubede luyando lwa-Mwami.” Jesu wakayiisya kuti, imilimo yesu yeelede kuyaamaa Bwami bwa Leza kabuli mbobubikkwa ambele mubuumi bwesu. (Mt. 6:33) Cilayandika kapati kuti tusaangune kucita zintu ziyootugwasya kupona kweelanaa kulyaaba kwesu kuli Jehova. Eelyo ciindi cakulyookezya cilakonzya kubikkwa mubusena bweelede. Kuti naa twacita oobo, ciyootuletela mpindu zibotu mubuumi alimwi tuyookkomana munzila iizwide.—Muk. 5:12.