Ino Ncinzi Ncomubikka Mubusena Bwakusaanguna?
1 Ino inga mwawiingula buti mubuzyo ooyu? Masimpe, toonse tulombozya kubikka ziyandika zya Bwami mubusena bwakusaanguna. (Mt. 6:33) Pele inga twalibuzya kuti, ‘Sena nzyondisala zitondezya kuti mbondicita oobo?’ Ibbaibbele litukulwaizya kuti: “Amulilingule nubeni.” (2 Kor. 13:5) Ino mbuti mbotunga twalilingula tobeni kubona kuti tubikka Bwami mubusena bwakusaanguna?
2 Mbotucibelesya Ciindi: Tulakonzya kutalika kwiinda mukulanga-langa mbotusala kucibelesya ciindi ncotujisi. (Ef. 5:15, 16) Ino ncilamfwu buti ciindi ansondo cisowelwa kukuyanzana, kweebela cipekupeku, kubelesya intaneti, naa kucita zintu nzyotuyandisya? Ikuti twabulemba bulamfwu bwaciindi ncotusowa kuzintu eezi alimwi akubweezyanisya aciindi ncotusowa kumilimo yakumuuya, inga twagambwa. Sena tusowa mawoola manji kumilimo kakunyina kubikkila maanu kumulimo uusetekene akaambo buyo kakuti tuyanda kujana zintu zyakulikondelezya? Ino mbunji buti bwaziindi nzyotutajaniki kumiswaangano naa mumulimo wakukambauka kutegwa tuunke kuyoocita zintu zyesu tobeni mumazuba aakumamanino aansondo?
3 Amubikke Ambele Zintu Ziyandika Kapati: Bunji bwesu tatujisi ciindi cinji cakucita zintu zyoonse nzyotuyanda. Aboobo, kutegwa tubikke ziyandika zya Bwami mubusena bwakusaanguna, tuyandika kulanga-langa zintu ziyandika kapati mpoonya tubikke ciindi cakucita “zintu ziinda kubota.” (Flp. 1:10) Eezi zibikkilizya kubala Jwi lya Leza, kutola lubazu mubukambausi, kulanganya mukwasyi alimwi akujanika kumiswaangano ya Bunakristo. (Int. 1:1, 2; Rom. 10:13, 14; 1 Tim. 5:8; Heb. 10:24, 25) Milimo imwi mbuli zisobano zyakoolola mubili alimwi akulikondelezya kuli kabotu, ilagwasya kapati. (Mk. 6:31; 1 Tim. 4:8) Pele zintu eezi zitayandiki kapati tazyeelede kunyonganya ziyandika zya Bwami.
4 Umwi mukwesu mukubusi wakayanda kubikka ziyandika zya Bwami mubusena bwakusaanguna kwiinda mukutola lubazu mumulimo waciindi coonse muciindi cakujana lwiiyo lwaatala mukulibambila mulimo wakumubili. Wakaiya mwaambo uumbi alimwi wakalongela kuyoobelekela kubusena bwakabulide kapati. Wakaamba kuti: “Ndilikkomene kapati okuno. Mulimo ulakatalusya kapati! Nicabota kuti mukubusi uuli oonse kacita cintu camusyobo ooyu akulimvwa mbondilimvwa. Kunyina cintu cibotu kwiinda kubelekela Jehova azintu zyoonse nzyotujisi.” Masimpe, kubikka Bwami mubusena bwakusaanguna kutuletela zilongezyo, pele cipati kapati, kulamukkomanisya Taateesu wakujulu, Jehova.—Heb. 6:10.