Sena Inga Mwagwasya?
1 Mwaapostolo Paulo wakalailila basimbungano kuti ‘bagwasyanye.’ (1 Kor. 12:25) Aboobo katubikkilana maanu alimwi katulisungula kugwasya nokwayandika lugwasyo. Mucikozyanyo, kuli bacizi bakumuuya akati kesu ibali mukukomezya bana babo mukasimpe kabali balikke buyo. Aaba bacizi bayumuna mukuli woonse wakuyiisya bana babo munzila yakumuuya. Masimpe bayandika kuti tubakulwaizye akubagwasya “mpobabulide.” (Baloma 12:13a, BT) Sena inga mwabagwasya?
2 Inzila Nzyomunga Mwagwasya: Ikubanyamuna amootokala kuya kumiswaangano yambungano alimwi amiswaangano mipati aabo ibabelesya zyakweendela zyabuleya inga mwabagwasya kutasowa mali manji. Ikumugwasya kulanga bana mutumbu ciindi camiswaangano inga capa kuti agwasigwe kapati apulogilamu. Kunze lyaboobo, ikulisungula kumugwasya naunka abana mumulimo wamumuunda inga camulemununa. Ikubabikkila maanu bana camoyo omwe—akubamba cilongwe ambabo—inga cabagwasya kapati bakubusi besu. Ikutamba mukwasyi wamuzyali uuli alikke kuciiyo camukwasyi muziindi zimwi inga cabayumya munzila yakumuuya.
3 Amucenjele: Atucenjele tutamusinikizyi kutambula lugwasyo muntu ndwatayandi. Nokuba kunjila mumakani aamukwasyi nomusola kupa lugwasyo luyandika. Aino, bacizi abanabukwetene mbobanga bayandika kapati kugwasya mucizi uuyandika lugwasyo.
4 Ibanakristo boonse bakulwaizigwa ‘kusamausyanya.’ (Rom. 12:13b) Ikugwasya bakwesu abacizi bakumuuya njenzila imwi yanzila zinji nzyotutondezyela luyando lwa Bunakristo ndotujisi akati kesu.—Joh. 13:35.