Amulilemenezye Izina lya Jehova Libotu
1 Saatani wakasampula zina lya Leza naakoongelezya bazyali besu bakusaanguna kuti babisye. Diabolosi mubucenjezu wakaamba kuti Jehova wakamucenga Adamu. (Matl. 3:1-5) Mbwaanga izina lya Leza kuli mboliswaangene anguzu zyakwe zyakuzuzikizya Jwi lyakwe kumubejelezya Saatani nkwaakamubejelezya kwakali kumusampaula kwini-kwini. Jehova walisalazya zina lyakwe kumasampu akulibotezya kwiinda mukuyabuzuzikizya makanze aakwe bucebuce.—Is. 63:12-14.
2 Iswebo ndendiswe bantu Jehova mbasalide “ibaitwaa zina lyakwe.” (Inc. 15:14, 17) Eeci citupa coolwe cakutondezya mbotulimvwa kujatikizya kusalazigwa kwandilyo. Izina lya Jehova lilatubotela cini-cini nkaambo liiminina zintu zyoonse zibotu azyabuuya azyaluyando azyaluse alimwi aziluleme. Ibupati bwazina lya Leza lyabulemu bulatukankamanisya. (Int. 8:1; 99:3; 148:13) Ino tweelede kukulwaizigwa kutyani?
3 Tusalazye Izina lya Leza: Izina lya Leza taakwe mbolikonzya kusalazigwa kwiinda mbolibede kale. Pele inga twatondezya kuti izina lya Leza tulalilemeka kapati kwiinda mubukkale bwesu busalala alimwi amukukambauka kwesu makani aa Bwami. Atoongolole kuti: “Amulumbe Jehova, amulemeke izina lyakwe. Amuzibye bantu milimo yakwe, amubazibalusye kuti izina lyakwe ndilemu.” (Is. 12:4) Ino inga twacita buti obo?
4 Inga twabelesya kufwumbwa ciindi ncotwabaaco ikukanana izina lya Jehova alimwi azintu zyoonse nzyoliiminina. Ikukambauka kwesu kulemenezya Jehova, kube kooko kwalyoonse naa kwamukwiizya, kube kwaŋandaaŋanda naa kwacintoolo acintoolo, kube kwamumugwagwa naa kwaaluwaile. Notwajana bantu bayandisisya kumvwa makani, tweelede kupangana ambabo bubambe bwini-bwini bwakuyoopilukila kubayiisya makani aambi aamba zya Jehova. Nkokuti tatweelede kwaalilwa kuzuzikizya cipangano cesu cakupilukila akusola mbuli mbotukonzya kutalisya ziiyo zya Bbaibbele. Mucoolwe, imyaanda yazyuulu zyabantu ili mukuziba akulemeka alimwi akusalazya izina lya Jehova libotu.
5 Lubazu ndotutola camoyo woonse mumulimo wakusalazya izina lya Leza lulatondezya caantangalala mpotwiimvwi kukaambo nkaakabusya Saatani mu Edeni. Ooyu ngomulimo wabulemu kwiinda milimo yoonse njotunga twacita. Izina lya Jehova ilibotu atulilemenezye akulitembaula cabusungu!—1 Mak. 29:13.