Ikuzyibya Izina lya Leza
1. Ino ikuzyiba izina lya Leza limugeme kubajatikizya buti bantu?
1 Mwakacita buti nomwakazyiba izina lya Leza iciindi cakusaanguna? Mbobalimvwa banji bulikozyenye ambuli ambwaakalimvwa mukaintu walo wakati: “Nondakalibona izina lya Leza mu Bbaibbele, ndakalila. Ndakakulwaizyigwa akaambo kakuzyiba kuti ndilakonzya kuzyiba izina lya Leza limugeme alimwi akulibelesya.” Kulinguwe ikuzyiba izina lya Leza cakamugwasya kapati mukuzyiba kuti Jehova muntu wini-wini alimwi ulakonzya kubamba cilongwe anguwe.
2. Ino nkaambo nzi ncotuyandika kufwambaana kuyiisya bantu kujatikizya Jehova?
2 Ino Nkaambo nzi Ncoleelede Kuzyibisyigwa? Ikuzyiba zina lya Leza kulabikkilizya akuzyiba ibube bwakwe, makanze alimwi amilimo. Alimwi tuleelede ikuzyiba izina lya Leza kutegwa tukafwutuke. Imwaapostolo Paulo wakalemba kuti, “umwi aumwi uulilila izina lya-Mwami ulafutuka.” Paulo wabuzya kuti, ino inga ‘bamulilila buti’? Ccita kuti bantu basaanguna kumuzyiba Jehova akuba alusyomo mulinguwe. Aboobo cilayandika ku Banakristo kufwambaana kulizyibya izina lya Leza kubantu alimwi ancolyaamba. (Rom. 10:13, 14) Nokuba boobo, kuli kaambo kapati ncoleelede kuzyibisyigwa izina lya Leza.
3. Ino nkaambo nzi kapati katupa kukambauka?
3 Muma 1920, ibantu ba Leza bakazyiba kuzwa mu Magwalo kujatikizya kaambo kabweendelezi bwakujulu aansi ikabikkilizya akusinizyigwa alimwi asalazyigwa kwazina lya Leza. Jehova katana nyonyoona bantu babyaabi akugusya kusampaulwa kwazina lyakwe kuvwulide, kasimpe kanguwe keelede ‘kuba aampuwo munyika yoonse.’ (Is. 12:4, 5; Ezk. 38:23) Aboobo ikaambo kapati ncotukambaukila nkakuyanda kulumbaizya Jehova kubuleya alimwi akusalazya izina lyakwe kubantu boonse. (Heb. 13:15) Akaambo kaluyando ndotujisi kuli Leza alimwi akuli basimukoboma, ciyootukulwaizya kutola lubazu kapati mumulimo ooyu wakapegwa a Leza.
4. Ino mbuti Bakamboni ba Jehova mbubakazyibwa azina lya Leza?
4 ‘Bantu Baitwa Azina Lyakwe’: Mu 1931 twakabwaza izina lyakuti Bakamboni ba Jehova. (Is. 43:10) Kuzwa leelyo, bantu ba Leza balizyibya izina lya Leza cakunga ibbuku lya Proclaimers apeeji 124 lyaamba kuti: “Munyika yoonse, muntu woonse uubelesya izina lya Jehova ulafwambaana kuzyibwa kuti ngumwi wa Bakamboni ba Jehova.” Sena andunywe oobo mbomuzyibidwe? Ikulumba kuli Jehova akaambo kabubotu bwakwe kweelede kutukulwaizya ‘kulumba izina lyakwe’ akulikanana kufwumbwa ciindi ncotwajana.—Int. 20:7; 145:1, 2, 7.
5. Ino mbuti kulilemeka kwesu mbokubikkilizyidwe mukwiiminina izina lya Leza?
5 Mbotuli ‘bantu baitwa azina lyakwe,’ tweelede kuzitobela zyeelelo zyakwe. (Inc. 15:14; 2 Tim. 2:19) Ziindi zinji icintu ncobasaanguna kubona bantu kuli Bakamboni ba Jehova nkulilemeka kwabo kubotu. (1 Pet. 2:12) Kunyina notuyanda kubisya izina lyakwe kwiinda mukusampaula zyeelelo zyakwe naa ikubikka bukombi mubusena bwabili mubuumi bwesu. (Lev. 22:31, 32; Malk. 1:6-8, 12-14) Muciindi caboobo, ibukkale bwesu abutondezye kuti tulaciyanda coolwe ncotupedwe cakwiiminina izina lya Leza.
6. Ino ncoolwe cili buti ncotujisi lino alimwi akumbele kukabe kutamani?
6 Sunu, tulakubona kuzuzikizyigwa kwaambilizya kwa Jehova kwakuti: “Kuzwa kumazwido aazuba akusikila kumabbililo aalyo izina lyangu lilalemekwa akati kabamasi.” (Malk. 1:11) Atuzumanane ikukazyibya kasimpe ka Jehova alimwi ‘atulumbe izina lyakwe lisalala lyoonse alyoonse.’ Int. 145:21.