Ibalemene—Pele Ibazyala Micelo
1 Ikuti kamuli akati ka Bakamboni ba Jehova banji ibalemene, mulakonzya kuba amulimo uuzyala micelo. Mubwini, bukkale bwanu bulakonzya kumupa coolwe cilibedelede cakukambuka alimwi akukulwaizya bambi.
2 Zyoolwe Zyakukambauka: Ibanji bali mukuliyumya akaambo kabulema bali mukujana ciindi cinji cakutola lubazu mumulimo. Mucikozyanyo, imucizi umwi watakali kucikonzya kweenda alimwi akukanana kabotu akaambo kakwaandulwa wakajana kuti wakali kukonzya kutola lubazu mumulimo wakumwaya mamagazini ikuti mulumaakwe wausiya mootokala mumbali lyamugwagwa imwakali kwiinda bantu banji. Iciindi cimwi, wakamwaya mamagazini aali 80 mumawoola obile buyo. Alimwi ibukkale bwanu bulibedelede bulakonzya kumupa kuswaangana abantu aabo bamwi mbobatakonzyi kusikila. Ikuti naa mbocibede oobo, bantu aaba amubabone kuti ncilawo canu cilibedelede.
3 Bukambausi bwanu bulakonzya kuzwidilila kapati! Bamwi mbobaya buzumanana kumulangilila mbomukanzide ambokali mukubucinca kabotu buumi bwanu kasimpe kamu Bbaibbele, balakonzya kukwelelezyegwa amulumbe wa Bwami. Kuyungizya waawo, nomuyaanina abantu ibali mukupenga akaambo kantenda, izintu nzyomwaswaangana azyalo mubuumi bwanu zilakonzya kumugwasya kubaumbulizya mu Jwi lya Leza.—2 Kor. 1:4.
4 Mulakonzya Kubayumya Bamwi: Sena tiimwakakulwaizyigwa acakuluula ca Laurel Nisbet wakakkala mumuncini wakali kumupa kuti kayoya kwamyaka iili 37 pele wakagwasya bantu bali 17 kuti bajane luzibo lwini-lwini lwakasimpe kamu Bbaibbele? Mbubwenya buyo, icikozyanyo canu cilakonzya kubakulwaizya basyominyoko kuti babeleke canguzu mumulimo wa Jehova.—g93 1/22 pp. 18-21.
5 Nokuba kuti bukkale bwanu tabumuzumizyi kuunka mumulimo kwaciindi cinji mbuli mbomuyanda, mulakonzya kubayumya bamwi. Mukwesu umwi wakaamba kuti: “Ndaiya kuti naba muntu uulemene kapati ulakonzya kubagwasya bamwi. Mebo amukaintu wangu twali musemu mukupa lugwasyo kubantu baindene-indene mumbungano. Akaambo kabukkale bwesu, lyoonse nkotuli kutegwa tupe lugwasyo.” Nokuba boobo, akaambo kabulema mbomujisi, masimpe ngakuti lyoonse tamukonzyi kubeleka kweelana abusungu bwanu. Pele kwiinda mukugwasyigwa, mulakonzya kujana ciindi cili mbocibede mumulimo. Aboobo, ikuti kamuyanda lugwasyo, mutawayiwayi pe kubazibya baalu naa bambi buyo mumbungano ibakonzya kumugwasya.
6 Jehova ulibwene zintu zyoonse nzyomucita ikutegwa mumubelekele, alimwi ulakkomana akaambo kamulimo wanu ngomubeleka camoyo woonse. (Int. 139:1-4) Mbomuya buzumanana ikusyoma, ulakonzya kumupa nguzu kutegwa muzyale micelo akugwasyigwa mumulimo.—2 Kor. 12:7-10.