Sena Mulaa ‘Bumvwa Mumubili?’
1 Tulayandisisya kuzuzikizya mulimo wesu wakukambauka makani mabotu kusikila mpotugolela. Pele, bakwesu abacizi bayandwa banji cilabayumina kutola lubazu cakumaninina akaambo kakuciswa-ciswa naa mapenzi amwi aakumubili aabakatazya, cipa kuti bajane buyumuyumu kubeleka mbuli mbobayanda. Inga cabakatazya kulikasya kutyompwa, ikapati nobabona bamwi kabali bankutwe kapati mumulimo.—1 Kor. 9:16.
2 Cikozyanyo Cakwiiya: Mwaapostolo Paulo wakajisi ‘bumvwa mumubili, Bt.’ Ziindi zyotatwe wakalomba Jehova kuti agusye penzi eli lyakali kumusinkilizya, ndyaakapandulula kuti “[m]mutumwa wa-Saatani” iwakazumanana kumupenzya. Pele, nokuba boobo, Paulo wakakakatila alimwi wakazumanana kuya kumbele mumulimo wakwe. Kwiina naakalyeetezya nokuba kutongauka cibyaabi. Wakacita mpagolela. Icakapa kuti azwidilile mukulwana penzi elyo cakali cisyomezyo cizwa kuli Leza cakuti: “Lulakuzulila luzyalo lwangu, nkaambo inguzu zyangu zilaswiililika loko mukati kabukompami.” Kukompama kwa Paulo kwakabaa nguzu ciindi naakaiya kuzumanana aciimo cakwe akusyoma muli Jehova amunguzu zyamuuya uusalala kutegwa azumanane.—2 Kor. 12:7-10.
3 Mbomunga Mwakakatila: Sena kukompama kwabuntunsi kumukasya kuucita kabotu mulimo ngomubelekela Leza? Ikuti naa kakuli boobo, amwiiye ciimo ca Paulo. Nokuba kuti bulwazi bwanu naa kukompama kwanu kwiinaa mbokucitwa mubweende bwazintu buno, mulakonzya kusyoma Jehova cakumaninina, walo uuzizyi kabotu zyoonse nzyomuyandika alimwi uukonzya kumupa “nguzu zigambya.” (2 Kor. 4:7) Amulutambule lugwasyo ndomukonzya kujana mumbungano, kutali kwiile kulipambukanya. (Tus. 18:1) Ikuti naa cilamuyumina kutola lubazu mumulimo wakumulyango amulyango, amujane nzila zimbi zibeleka mukucita bukambausi bwamukwiizya naa bwaaluwaile.
4 Nokuba kuti bumvwa buli mumubili bulakonzya kucesya mulimo ngomunga mwacita mumuunda, tamweelede kulimvwa kuti kwiina ancomucita mumuunda. Mbubwena mbuli Paulo, anywebo mulakonzya ‘kulungulula Makani Mabotu aaluzyalo lwa-Leza,’ kamucita mbomukonzya kweelana abukkale bwanu. (Inc. 20:24) Mbomuya busola kuzuzikizya mulimo wanu, amuzyibe kuti Jehova ulamukkomanina kapati nomucita obo.—Heb. 6:10.