Ncinzi Ncomunga Mwamwaambila Muntu Uutasyomi Muli Leza?
1 Haabupampu umwi wakazwa kucisi ca Poland wakaambila misyinali umwi wamu Afulika kuti, “Nsisyomi muli Leza mebo pe.” Nokuba boobo, imucizi oyu wakakonzya kubandika amukaintu oyo akumupa bbuku lya Life—How Did It Get Here? By Evolution or by Creation? Misyinali naakapilukila nsondo yakatobela, haabupampu oyu wakamwaambila kuti: “Nsicili muntu uutasyomi muli Leza lino!” Wakalibala bbuku lyoonse lya Creation akulomba kuti kayiisigwa Bbaibbele. Ncinzi ncomunga mwacita kutegwa muzwidilile mukupa bumboni kuli baabo baamba kuti tabasyomi muli Leza? Ikusaanguna amulange-lange twaambo twalo tupa kuti bantu kabaamba boobo.
2 Zintu Zipa Bantu Kutasyoma: Tabali boonse bantu batasyomi bakakomena amizeezo eeyo. Ibunji bwabo bakali kukomba alimwi bakali kusyoma muli Leza iciindi cimwi. Pele mapenzi aakuciswa-ciswa naa amumukwasyi antela zintu zimwi zyakabapenzya zyakapa kuti lusyomo lwabo luye ansi. Ibamwi lwiiyo ndobakayiisigwa kuzikolo zipati lwakapa kuti babule lusyomo muli Leza. Amubone zikozyanyo zitobela zyabantu batakali kusyoma muli Leza pele mukuya kwamazuba ibakabaa lusyomo muli Jehova Leza akuba Bakamboni bakwe.
3 Imukaintu umwi ku Paris wakazyalwa abulwazi butontozya mumafwuwa. Nokuba kuti wakali Katolika uubbapatizidwe, wakalyaamba kuti taakali kusyoma muli Leza. Naakabuzya bamasiite kuti bamupandulwide kaambo Leza ncaakazumizya kuti azyalwe kali mulema, bakamwiingula kuti: “Nkaambo kakuti Leza ulakuyanda.” Takwe nakaazumina makani aayo pe. Kuli aumwi musankwa wakucisi ca Finland walo wakajanwa abulwazi bwakwaanganya milambi butasilikiki elyo wakali kweendela buyo acuuno cakukuba cabalema. Banyina musankwa oyu bakamutola kumuntu umwi wacikombelo ca Pentekoste walo wakali kulyaamba kuti ulaponya bantu baciswa. Pele taakwe anaakaponesegwa kwiinda mumaleele. Eeci cakapa kuti musankwa oyu aleke kumubikkila maanu Leza akuba muntu uutasyomi.
4 Imwaalumi umwi wakucisi ca Honduras wakakomezyegwa kali Katolika, pele wakayiya njiisyo zyaci Socialist (izyaamba kuti lubono loonse mucisi lweelede kalweendelezegwaa mfwulumende) alimwi azyakutasyoma muli Leza. Kasyomede mulwiiyo ndwaakatola kuyunivesiti lwakuti muntu taakalengwa wakasanduka biya, wakaleka kusyoma muli Leza. Awalo mukaintu umwi waku United States wakakomezegwa mucikombelo ca Methodist. Naakaunka kukkoleji wakatola lwiiyo lwakwiiya mbwayeeya ambwalilemeka muntu. Ino lusyomo lwakwe lwakajatikizigwa buti? Wakati: “Lusyomo loonse ndondakajisi mubukombi lwakamana muciindi cisyoonto buyo.” Lusyomo lwakwe muli Leza lwakayumizigwa kwiinda muciiyo ca Bbaibbele alimwi buumi bwakwe bwakaba ampindu.
5 Amuzwidilile Mukugwasya Babombe Myoyo: Ibunji bwabantu baamba kuti tabasyomi muli Leza inga bakondwa kuziba naa kuli nzila ikonzya kumana mapenzi akuciswa-ciswa, mazwanga aamumukwasyi, kutalulama azimwi buyo. Balayandisisya kujana bwiinguzi kumibuzyo iili mbuli bwayeeyi: ‘Ino nkaambo nzi ncokuli cibi?’ ‘Ino nkaambo nzi zintu zibi ncozibacitikila bantu babotu?’ alimwi ‘Ino buumi bujisi mulimo nzi?’
6 Banabukwetene bobilo bakkala kucisi ca Switzerland bakakomezegwa kabali bantu batasyomi muli Leza. Nobakakambaukilwa kasimpe ciindi cakusaanguna bakakaka kuswiilila. Pele bakali amapenzi mapati mumukwasyi wabo alimwi bakali kuyanda kuti balekane. Bakamboni nobakabaswaya lwabili bakabatondezya banabukwetene aaba kuzwa mu Bbaibbele mbobanga baamana mapenzi aabo. Banabukwetene aaba bakagambwa kapati kujana lulayo lugwasya mu Magwalo. Bakazumina kuba aciiyo ca Bbaibbele. Ilukwatano lwabo lwakayumizigwa akuyaambele munzila yakumuuya alimwi bakabbapatizigwa.
7 Ncomukonzya Kumwaambila Muntu Uutasyomi Muli Leza: Ikuti muntu umwi wamwaambila kuti tasyomi muli Leza, amusole kumvwa kaambo kamupa kwaamba boobo. Sena nkwiiya nkwaakayiiya naa mapenzi akamucitikila antela nkuupaupa ameso kwabukombi alimwi anjiisyo zyakubeja nzyaakabona? Inga mwamubuzya kuti: “Sena mbomwali kulimvwa lyoonse obu?” naa “Ino nkaambo nzi ncomwaambila boobu?” Bwiinguzi mbwatiipe bulamugwasya kuziba ncomutiambe. Ikuti kakuyandika twaambo tuzulide tulimvwisya ambweni bbuku lya Is There a Creator Who Cares About You? inga twagwasya aciindi eco.
8 Mulakonzya kutalisya mubandi amuntu uutasyomi muli Leza kwiinda mukubuzya kuti:
◼ “Sena kuli nomwakalibuzyide mubuzyo ooyu: ‘Ikuti Leza kaliko, ino nkaambo nzi ncokuli mapenzi manji boobu alimwi akutalulama munyika?’ [Amulindile bwiinguzi.] “Mulayanda sena kuti ndimutondezye ncolyaamba Bbaibbele kumakani aaya?” Amubale Jeremiya 10:23. Mwamana kubala, amumubuzye mbwalimvwa kujatikizya lugwalo oolu. Mpoonya amumutondezye mapeeji 16 a 17 mubroshuwa yakuti Will There Ever Be a World Without War? Ambweni inga mwabelesya cibalo 10 mubbuku lya Creator. Amumubuzye naa inga mwamusiila bbuku akuti abale zili mukati.—Kutegwa mujane nzila zimbi amubone bbuku lya Kukambitsirana amapeeji 311-13.
9 Tabali boonse batasyomi muli Leza bayookazumina kasimpe. Pele nkobali banji bayanda kumvwa twaambo tumbi. Amubelesye maanu, akukulwaizya alimwi ikapati inguzu zya Jwi lya Leza ikubagwasya kuti bazyibe kasimpe.—Inc. 28:23, 24; Heb. 4:12.