Mulongo Wamiswaangano Yamulimo
MALAILILE: Kutalikila a Mulimo Wesu Wabwami ooyu, a Mulongo Wamiswaangano Yamulimo kunoobikkilizigwaa mulongo wamakani a Muswaangano Wamulimo wakusaanguna wamwezi utobela. Kucinca ooku kwacitwa akaambo kakuccelwa ikulangilwa kunoobako mukutumina Mulimo Wesu Wabwami akaambo kabubambe bupya bwakutumina mpasya.
Nsondo Iitalika mu December 6
Lwiimbo 1
10 min: Zyakwaambilizya zyambungano. Zyakwaambilizya zisalidwe mu Mulimo Wesu Wabwami. Alimwi acibeela ca “Tulikkomene Akuvwula Kwakacitwa.” Amubandike lipooti yamumuunda yamu August yacisi coonse alimwi ayambungano. Amubakulwaizye basikumwaya kuti bazumanane amakanze aabo aakutola lubazu lyoonse mumulimo wamumuunda alimwi akufwambaana kuleta malipooti aabo kumamanino amwezi uli woonse.
15 min: “Amwiiye Jehova Uutalangi Ciimo Camuntu.” Imajwi aanu aakutalisya aabe buyo masyoonto aatasiki kuminiti yomwe, mpoonya amuzumanane amubandi wakubuzya akwiingula. Amupandulule ncocaamba kutalanga ciimo camuntu ambwakutondezya Jehova alimwi ambotukonzya kukutondezya mumulimo wesu.—Amubone bbuku lya Insight, Volyumu 1, apeeji 1192 mincali 4-7.
20 min: “Sena Tatunazimvwide Zintu Eezyo?” Makani alimwi amubandi abaswiilizi. Amubatambe baswiilizi kuti baluule kwiinduluka-induluka zintu mbokwakabagwasya kumvwisya akuvwuzya luzibo lwabo kujatikizya kasimpe.—Amubone Ngazi Yamulindizi yamu Chichewa yamu July 15, 1995 amapeeji 21-2 alimwi a August 15, 1993 amapeeji 13-14, mincali 10-12.
Lwiimbo 29 amupailo wakujala.
Nsondo Iitalika mu December 13
Lwiimbo 28
10 min: Zyakwaambilizya zyambungano. Lipooti yamaakkaunti. Amupe nzila zitondezya mbotunga twaingula camaanu kukwaanzya kwamumazuba akulyookezya. Ikuti naa mbungano kaijisi mabbuku aa Muntu Mupati naa M’phunzitsi Wamukulu, amutondezye mbwaakonzya kubelesyegwa kabotu mumazubaa kulyookezya aa Kkilisimasi.
15 min: “Cikolo Camulimo Wateokrasi mu 2000.” Makani aayoobandikwa amulangizi Wacikolo Camulimo Wateokrasi. Amulange-lange kucinca ooku kwamulongo wamwaka mupya. Makani a No. 3 anoozwa mubbuku lya Kukambitsirana za M’malemba. Makani a No. 4 anoozwa mubbuku lyakuti Ibbuku Lyangu Lyamakani aa-Bbaibbele pele mumyezi yotatwe yakumamanino amwaka anooyoozwa mubbuku lya Kukambitsirana. Makani aabikkidwe mbaakani eyi (#) caamba kuti imakani aayo ayelede kukananwa amukwesu. Amubakulwaizye boonse kuti kabautobelezya mulongo wakubala Bbaibbele nsondo ansondo akusungwaala mukuzuzikizya mbazu zyabo zyamucikolo.
20 min: “Ncinzi Ncomunga Mwamwaambila Muntu Uutasyomi Muli Leza?” Kubuzya akwiingula. Amwiinduluke twaambo twiindene-indene ibanji ncobalekela kusyoma muli Leza. Amwaambe nzila zimwi mbotunga twabasikila kutegwa tubagwasye kubona kuti Leza nkwali ncobeni. Akucitwe citondezyo comwe naa zyobilo zifwaafwi. Kutegwa mujane twaambo tumbi amubone bbuku lya Kukambitsirana, amapeeji 306-13, alimwi alya Mankind’s Search for God cibalo 14.
Lwiimbo 2 amupailo wakujala.
Nsondo Iitalika mu December 20
Lwiimbo 11
10 min: Zyakwaambilizya zyambungano. Amubuzye basikumwaya baluule mubufwaafwi zyakabacitikila zyeelela mumulimo wamumuunda caino-ino.
15 min: Kuvwiila Bantu Ibakanzide Kukosola Mibandi. Mubandi abaswiilizi alimwi azitondezyo. Amubale kuzwa mubbuku lya Kukambitsirana aakatwe kakuti “Ndemanga” amapeeji 15-16. Amuzubulule twaambo tobilo naa totatwe twabantu “ibakanzide kukosola mibandi” kuzwa amapeeji 16-20 naa kubelesya twaambo tubandikwa kapati abantu bamucilawo canu. Amutulange-lange twaambo twabwiinguzi itupedwe akutondezya ncotuli twaambo tukonzya kubelesegwa cakuzwidilila ooko nkomuzwa. Amucite zitondezyo mubufwaafwi kujatikizya twaambo tumwi. Amulombe baswiilizi baluule bwiinguzi mbobakabelesya cakuzwidilila mukubandika aabantu.
20 min: Sena Ndiuzumine Mulimo Wakubelekela Mbunga Zyabukombi? Makani aabandikwaa mwaalu kuzwa mupepa lyamukati. Ibamwi bantu bakalinjilide mulimo uuli boobu pele mukwiinda kwaciindi bakajana kuti ncobakali kucita teecakali kweendelana anjiisyo zya Bbaibbele. Amulange-lange mibuzyo njotweelede kulibuzya notuyanda kusala kubeleka mulimo wakumubili uujatikizya bukombi. Amubakulwaizye boonse kusolekesya kutobela nzila iiyoosinizya cilongwe cibotu mumeso a Jehova.—2 Kor. 6:3, 4, 14-18.
Lwiimbo 15 amupailo wakujala.
Nsondo Iitalika mu December 27
Lwiimbo 9
10 min: Zyakwaambilizya zyambungano. Ikuti naa mbungano yanu iyoocinca ciindi camiswaangano mumwaka mupya, amubakulwaizye boonse kuzumanana kujanika lyoonse kumiswaangano aaciindi cazuminanwa ino. Amubazibye ibaiya Bbaibbele abaabo bajisi luyandisisyo kujatikizya kucinca kuli koonse ikuliko. Amubayeezye boonse kuleta malipooti aabo aamulimo wamumuunda aamwezi wa December.
15 min: Ziyandika zyambungano.
20 min: Kumwaya Mabbuku Aakaindi mu January. Makani alimwi azitondezyo. Amutondezye mabbuku obilo naa otatwe aamapeeji aali 192 aakaindi aakamwaigwa kautana mwaka wa 1986 ngoijisi mbungano, amubakulwaizye baswiilizi kuti babweze aakumwaya mumulimo wamumuunda. (Ikuti kakunyina aliko, amwaambe ceelede kwaabilwa mu January.) Amupandulule ncaacili mabotu mabbuku aaya aakaindi mukuvwuzya luyandisisyo mu Bbaibbele. Kuzwa mubbuku limwi alimwi, amwaambe twaambo alimwi azikozyanyo zikonzya kubelesegwa kutalisya mibandi. Amucitye citondezyo comwe naa zyobilo. Mulakonzya kubelesya broshuwa ya Ncayanda kutalisya ciiyo nomwajana muntu iwatondezya luyandisisyo.
Lwiimbo 28 amupailo wakujala.
Nsondo Iitalika mu January 3
MALAILILE: Mbungano tazyeelede kuucinca Muswaangano Wamulimo wansondo yamu January 3 kuti ucitwe cakufwambaana ccita kuti kabali amulangizi wabbazu.
Lwiimbo 3
8 min: Zyakwaambilizya zyambungano.
17 min: Amube Abusongo Bwakuvwiila Kabotu. (Kol. 4:6) Makani alimwi amubandi abaswiilizi. Ibbuku lya Kukambitsirana ncibelesyo cibotu cigwasya kujula mulyango wakuti twaambile bamwi kasimpe kamu Bbaibbele. Ikuti naa mwiniŋanda wabuzya mubuzyo kujatikizya zintu nzyotusyoma ambweni inga twabelesya cibeela caamba kuti “Pamene Munthu Anena Kuti—” icili kumamanino aamakani aamba zyamakani ayo aasyomwa. Amubandike makani aambwa kujatikizya Bbaibbele aali amapeeji 58-62 alimwi akulanga-langa ncocinga cagwasya ikubelesya bwiinguzi bwaambidwe ikutegwa tuzwidilile.
20 min: Sena Tulabagwasya Bantu Kuba Basikwiiya? Mulangizi wamulimo abandike twaambo tujanika mu Ngazi Yamulindizi yamu Chichewa yamu February 15, 1996, amapeeji 19-22 amukutausi omwe naa bobilo. Amutondezye twaambo twamu Magwalo ncotuyandika kuyandaula baabo beelede mucilawo cesu akubagwasya kuba basikwiiya. (Mt. 10:11) Aba mbaabo batongela akaambo kakuvwula kwabubi abukkale butali bwabunaleza izicitika mumeso aabo alimwi ibayandisisya kuti bamujane Jehova nobutanasika buzuba bwabukali bwakwe. (Ezk. 9:4; Zef. 2:2, 3) Akati kabo kuli baabo ‘ibasalilidwe buumi butamani.’ (Inc. 13:48) Mulimo wesu ngwakugwasya bantu kuba basikwiiya, kuyiisya bantu zintu zyoonse Jesu nzyaakalailila. (Mt. 24:14; 28:19, 20) Nokuba kuti tulakonzya kubusya luyandisisyo mubantu mbotukanana ambabo kuciindi cakusaanguna mumulimo waŋanda aŋanda, mubukambausi bwamukwiizya, amumulimo wamumugwagwa, imakanze eesu ngakugwasya bantu kuba basikwiiya mumulimo wakupilukila—alimwi amuziiyo zya Bbaibbele. Amutondezye nzila zibeleka mbocinga cacitwa eeci.
Lwiimbo 27 amupailo wakujala