Cikolo Camulimo Wateokrasi mu 2000
1 Cikolo Camulimo Wateokrasi cabagwasya kapati bantu ba Jehova. Mumyaka iili 50 yainda, tuulunzuma twabantu twagwasigwa kuciziba kwaambaula kabotu kubuleya alimwi akuyiisya kasimpe kamu Bbaibbele. (Int. 145:10-12; Mt. 28:19, 20) Tee mwabona mbocamugwasya cikolo? Mulakonzya kugwasigwa nomuba mumwaka wa 2000 kufwumbwa kuti mwatola lubazu mucikolo eci alimwi akutobela lulayo ndomupegwa.
2 Malailile aamakani aayookananwa alimwi amabbuku anoobelesyegwa nkwaali apeeji lyakusaanguna lyamulongo wacikolo wamu 2000. Iciindi cilipedwe cacibeela cimwi acimwi, muyoozwa makani, mbwaayelede kukananwa ikubikkilizya azimwi buyo nkozili mumulongo ooyu. Mwalombwa kuti mwaabale kabotu-kabotu malailile akwaatobela.
3 Kubala kwa Bbaibbele Kwansondo Ansondo: Kuli mapulogilamu obilo aabikkwa nsini mumulongo wacikolo aakubala kwa Bbaibbele kwansondo ansondo. Imwi njakubala kwalyoonse kwalo kujatikizya mapeeji aali musanu aa Bbaibbele. Makani aakunomoona twaambo tupati-pati twamu Bbaibbele azwa mukubala ooku. Ipulogilamu imbi yakubala njakuyungizya buyo yalo iilaa mapeeji asika kukkumi. Ikuti naa mwaitobela pulogilamu eeyi mulakonzya kulimana kulibala Bbaibbele mumyaka yotatwe buyo. Tulizi kwaamba kuti ibamwi balakonzya kubala zibalo zinji kwiinda zyabikkwa apulogilamu alimwi bamwi cilabayumina kutobelezya mulongo ooyu. Muciindi cakulyeelanisya abantu bamwi, amukkomane anzyomukonzya kucita. (Gal. 6:4) Ciyandika nkubala Jwi lya Leza buzuba abuzuba.—Int. 1:1-3.
4 Ikuti kamuyanda kulilembya mu Cikolo Camulimo Wateokrasi amumwaambile mulangizi wacikolo. Mwalombwa kuti kamuzuzikizya zibeela zyenu alimwi tamweelede kulovwa kakutakwe akaambo. Cikolo amucibone kuti ncipego kuzwa kuli Jehova. Amulibambile kabotu, amwaazibile makani ngomwapegwa akwaamba zintu kuzwa mumoyo wanu, mwacita boobo muyoogwasigwa kapati acikolo eeci cilibedelede.