Amulombe Lugwasyo
1 Majwi aakasololelwaa muuya aakuti “ziindi zikataazya” alaapandulula kabotu mazubaano ngotukkede. (2 Tim. 3:1) Aboobo, ncinzi ncomukonzya kucita ikuti mwajanika mumapenzi aakumuuya ngomubona kuti inga tamwaakonzyi kwaazunda?
2 Sena mulilibambilide kubandika aumwi wamumbungano uusimide munzila yakumuuya? Ibamwi balakonzya kweenkeenka kucita obo akaambo kakuti bafwa nsoni akuti tabayandi kukatazya bamwi naa kudooneka kuti taakwe uukonzya kubagwasya. Inzya, tweelede kusoleka canguzu kumanizya mapenzi eesu tobeni, pele tulaangulukide lyoonse ikulomba lugwasyo mumakani aajatikizya buumi bwesu munzila yakumuuya.—Gal. 6:2, 5.
3 Mbomunga Mwatalika: Ambweni inga mulakonzya kusikila mweendelezi waciiyo cabbuku wamukabunga kanu akumulomba kuti mukabeleke anguwe mumulimo wamumuunda. Eci ciyoomupa coolwe cakwaambaula anguwe kujatikizya mbomuyandisya kuyaambele munzila yakumuuya. Ikuti kali mukutausi, amumuzibye kuti muyanda muntu wakumugwasilizya munzila yakumuuya, aboobo walo uyoobazibya baalu mpoonya balo bayoomugwasya. Ambweni mulakonzya kusikila mwaalu uli oonse akumwaambila penzi ndyomujisi.
4 Ino ndugwasyo nzi ndomuyandika? Sena kuli cakamutolwaazya? Sena muli bazyali bali balikke basola kukwabilila bana benu kuti batazwi kumbungano? Sena muli bacembele naa badaala bayandika lugwasyo lumwi? Naa sena kuli penzi limwi limutyompya? Ibuumi bulakonzya kutuyumina muziindi eezi zikatazya—pele inga twacikonzya. Lugwasyo nkoluli.
5 Baalu Mbobagwasya: Ibaalu balatubikkila maanu kapati. Balilibambilide kuswiilila zintu zimukatazya. Ikuti naa mapenzi kaajatikizya basikumwaya bamwi, ibaalu bayoozibikkila maanu ezi nobeembela akuyiisya mbungano. Akaambo kakuti ‘nzitondezyo zyakutobela,’ baalu balilyaabide kubelekaa ndinywe cakukondwa. (1 Pet. 5:3) Ikubaswiilila bakwesu aaba bajisi luzibo lunji kababandika njiisyo zyamu Bbaibbele cilakonzya kumugwasya kuti musumpule mulimo wanu alimwi abukkale bwanu nobeni.—2 Tim. 3:16, 17.
6 Jesu watupa “zipego kubantu.” (Baefeso 4:8, BT) Nkokwaamba kuti baalu balilisungwide kumubelekela. Baliyandide kuti bamugwasye. Kayi ‘mbibanu.’ (1 Kor. 3:21-23) Aboobo muciindi cakwiile kuumuna, mulaangulukide kubaambila mbuli mbomulimvwa. Amulombe lugwasyo ndomuyandika.