Ikwiiya Businsimi bwa Daniele
1 Ikutalikila munsondo iitalika mu April 17, tuyootalika kwiiya bbuku lya Amububikkile Maanu Businsimi bwa Daniele! ku Ciiyo Cabbuku Cambungano. Ibanji bakalibala kale bbuku eli likondelezya, pele lino tulaa coolwe cakuyoogwasigwa andilyo kwiinda mukulibandika mukabunga. Basikumwaya boonse abaabo bayanda kasimpe kubikkilizyaa bana boonse balaangulukide kusika, inzya boonse bakulwaizigwa kunoojanika nsondo ansondo kuciiyo cabbuku lya Daniele lyamu Bbaibbele.—Dt. 31:12, 13.
2 Mulongo Waziiyo Alimwi Amalailile: Ooyu Mulimo Wesu Wabwami ulijisi mulongo woonse waziiyo zyamubbuku lya Businsimi bwa Daniele. Amubikke kkopi yamulongo ooyu mubbuku lyanu. Ooyu mulongo ulatondezya cibalo antoomwe amincali yamubbuku eli kubikkilizya atupango twamubbuku lya Daniele twalo tuyoobandikwa muciiyo cansondo imwi aimwi. Kagwalo kakunsi katondezya mbuli mboceelede alimwi anomweelede kwaalanga-langa makani amwi aali mubbuku eli. Kumamanino aciiyo cansondo imwi aimwi, sikucitya ciiyo antoomwe abamukabunga kakwe beelede kwiinduluka tupango tugaminide kuzwa mubbuku lya Daniele twalo tubikkidwe amulongo wansondo eeyo. Kweelana aciindi ncomujisi, mulakonzya kubala akutubandika tupango. Tupango tumwi tuyoozumanana amuciiyo cansondo iimbi nkaambo tunooyacilangwa-langwa mbuli mbotuyaabuzukizigwa.
3 Amulibambile Kabotu mu Ciiyo: Zibalo zyafwiinsigwa kutegwa kube ciindi cipati cakubandika makani anoolangwa-langwa nsondo ansondo. Zibalo zyone nzifwaafwi ncobeni kwiinda zimwi. Aboobo kumamanino aciiyo cansondo yamu June 5, sikucitya ciiyo ulakonzya kubikkilizyaa kwiinduluka bbuku lya Daniele 2:1-40. Munsondo yamu June 26, ulakonzya kwiinduluka bbuku lya Daniele 3:1-30. Munsondo yamu September 4 weelede kuziinduluka kabotu-kabotu zifwanikiso alimwi amagwalo aali apeeji 139. Muciiyo cansondo yamu October 2, kweelede kubandikwa ccaati iili amapeeji 188 a 189.
4 Amulibambile kabotu ciiyo cansondo iili yoonse akutola lubazu muciiyo. Amukukkomanine ikubaa coolwe cakuyanzanaa mbunga ya Jehova iiboneka alimwi aluzibo ndomwajana kubikkilizya abupanduluzi bulimvwisya mbwatupa kwiinda mubananike bakwe basyomeka. (Dan. 12:3, 4) Caluyando amubakulwaizye boonse ikunoojanika kuciiyo cabbuku lyoonse. Atulibikkile maanu jwi lya Leza lyabusinsimi liyubunwidwe mubbuku lya Daniele ligambya.—Heb. 10:23-25; 2 Pet. 1:19.