Tuyooliiya Bbuku Lya Lukkomano Mumukwasyi

Mulakkomana kuziba kuti ikutalika munsondo ya October 6, 1997, tuyootalika kubelesya bbuku lya Inzila Yakujana Lukkomano Mumukwasyi ku Ciiyo Cabbuku Cambungano. Kunyina uuyooyanda kwiindwa ciiyo cankamu cabusolozi obu bubeleka bwamukwasyi uukkomana bwamu Magwalo. Imulongo waziiyo uyoogwasya kulanga-langa kabotu-kabotu muncali omwe-omwe alimwi amagwalo aamu Bbaibbele aali mubbuku.

Icibalo coonse cakusaanguna ciyoolangwa-langwa munsondo yakusaanguna yaciiyo nkaambo cijisi buyo magwalo masyoonto aatazubuludwe. Nkakaambo nkakonya acalo cibalo 15 ncociyoocitilwa mucibeela comwe. Nokuba boobo, zibalo zimwi zyoonse ziyooandanizigwa muzibeela zyobile, cisela acimwi cacibalo kacicitwa nsondo ansondo. Aboobo kunooli ciindi cipati cakubala akubandika magwalo oonse aambidwe buyo antoomwe akulanga-langa kabotu-kabotu mbwaabeleka magwalo oonse aazubuludwe mumuncali omwe-omwe.

Icibeela ciyandika kapati caciiyo mmubandi wamakani aali mukabbokesi kakuyiisya kumamanino aacibalo comwe-comwe. Aboobo ciindi cipati ceelede kupegwa ikulanga-langa mibuzyo amagwalo aambidwe buyo aali mukabbokesi.

Beendelezi ba Ciiyo Cabbuku Cambungano bakulwaizigwa kubikkila maanu kapati kukulibambila ciiyo cabo alimwi akukulwaizya boonse bali munkamu yabo kubikkilizya abapya kulibambila kabotu-kabotu, kujanika lyoonse akutola lubazu.—om 74-6.