Ikwiiya Bbuku lya Amukombe Leza

Ibbuku lya Amukombe Leza Mwini-Mwini Uuli Alikke lyakabambilwa kuti kaliyiigwa abantu bamanizya kwiiya bbuku lya Luzibo. Ikwiiya bbuku eeli a Ciiyo Cabbuku Cambungano kuya kutupa kuti tukacikonzye kulibelesya kabotu mumuunda alimwi kuya kutugwasya kumuyandisya akumulumba Jehova ambunga yakwe. Ino ncinzi ncotweelede kucita kutegwa tugwasyigwe kapati kwiinda mukwiiya bbuku lya Amukombe Leza?

Kweendelezya Ciiyo: Akaambo kakuti tuna kwiiya cibalo coonse cabbuku eeli nsondo ansondo, balangizi baciiyo cabbuku bayooyandika kucibikkila maanu ciindi. Tabakasowi ciindi mumincali yakusaanguna ikutegwa bakabe aciindi cinji cakubandika makani aayandika kulanga cakusitikila alo bunji bwaziindi aajanika mumincali iili kumbele mucibalo. Ikuzibandika mubufwaafwi zili mukabbokesi kakwiinduluka kali kumamanino kwaciiyo acimwi, kuya kugwasya baabo bajanika aciiyo cabbuku kunooyeeya twaambo tupati-pati ntobaiya.

Mibuzyo iinjide mukati kululyo yakuzinzibala kuyeeya akubandika ilajanika muzibalo izitandila kucisela zyabbuku lya Amukombe Leza. Icikozyanyo caceeci cilajanika apeeji 48-9. Takuyandiki kuti mibuzyo eeyo ibalwe antoomwe amincali. Ciindi noilangwa-langwa akabunga, mulangizi weelede kubona kuti magwalo abikkidwe abalwa akubandikwa kweelanaa ciindi.

Kulibambilila Limwi: Kulibambila kabotu ciiyo kujatikizya zintu zinji kutali buyo kweenga bwiinguzi. Kuzinzibala kuyeeya caambwa mumagwalo aabikkidwe takukatugwasyi buyo kwiingula, pele ikapati kuya kutugwasya kupangika myoyo yesu. (Ezr. 7:10) Toonse inga twakkazikana myoyo kwiinda mukwiingula cakwaanguluka akubapa ciindi bamwi kutegwa abalo baingule.—Rom. 1:11, 12.

Kwiiya bbuku lya Amukombe Leza kuya kutugwasya kubaa cilongwe a Jehova alimwi kuya kupa kuti tucikonzye kubagwasya kabotu babombe myoyo kutusangana mukumukomba. (Int. 95:6; Jak. 4:8) Toonse atugwasyigwe kapati abubambe oobu bubotu bwakumuuya.