Amucikkomanine Ciiyo Cesu Cabbuku lya Ino Ncinzi Cini Bbaibbele Ncoliyiisya?
1 Cibeela cikkomanisya ca Miswaangano Yacooko ya “Atumumvwide Leza” kwakali kumwaigwa kwabbuku lya Ino Ncinzi Cini Bbaibbele Ncoliyiisya? Ino-ino tunoolibelesya kapati mumulimo wesu wamumuunda, ikwaambisya notweendelezya ziiyo zya Bbaibbele zyaaŋanda. Aboobo, tweelede kutuzyibila twaambo tuli mubbuku eeli lipya. Eeci ciyookonzyeka akaambo kakuti tunooliiya ku Ciiyo Cabbuku Cambungano kutalikila munsondo ya April 17, 2006.
2 Mulangizi wa Ciiyo Cabbuku Cambungano uyakubandika mibuzyo iili kumatalikilo aacibalo acimwi. Mpoonya ciiyo ciya kweendelezyegwa kwiinda mukubelesya mibuzyo iili aansi lyapeeji. Magwalo aajisi twaambo tupati-pati ayakubalwa akubandikwa, alimwi kabbokesi kakuti “Bbaibbele Ncoliyiisya” kali kumamanino aacibalo kaya kugwasya kapati mukwiinduluka ciiyo akaambo kakuti kabbokesi kajisi bwiinguzi bwamu Magwalo kumibuzyo yantalisyo yacibalo. Muyookukkomanina kupa bwiinguzi mbwaanga bbuku eeli lilabandika twaambo munzila iilimvwisya, nguba-uba alimwi iikkomanisya.
3 Makani aayungizyidwe aali mubbuku eeli alapa bupanduluzi kumakani aasiyene-siyene. Tuyookonzya kwaabelesya makani aaya ciindi mbotwiiya limwi Bbaibbele nobayanda twaambo tunji kukaambo kamwi. Zibeela zyamakani aayungizyidwe ziindi zimwi ziyakubandikwa lya Ciiyo Cabbuku Cambungano. Makani aayungizyidwe oonse aajatikizya kaambo kamwi ayakubalwa amubali waciiyo cabbuku, eelyo zibalo zilamfwu zilakonzya kubandikwa muzibeela. Mibuzyo yaciiyo tiiko mumakani aayungizyidwe. Pele mulangizi ulakonzya kubandika twaambo abaabo bajanika kwiinda mukubuzya mibuzyo iipandulula twaambo tupati-pati.
4 Ziiyo zili mubbuku lya Bbaibbele Ncoliyiisya ziya kuyiigwa cakubindaana ku Ciiyo Cabbuku Cambungano. Pele tatweelede kubindaana munzila yamusyobo ooyu notwiiya bbuku eeli abamwi, ikwaambisya ikuti naa kabajisi luzibo lusyoonto naa kabatajisi luzibo lwamu Bbaibbele. (Inc. 26:28, 29) Notweendelezya ziiyo zya Bbaibbele zyaaŋanda, tuyooyandika kwaabandika kabotu-kabotu magwalo, kupandulula zikozyanyo, azimwi buyo. Aboobo, ayibe mbaakani yenu yakunoojanika ansondo alimwi akutola lubazu lyoonse notunooiya bbuku lya Ino Ncinzi Cini Bbaibbele Ncoliyiisya?