Amwiiye Mwiiyi Mupati Nomubelesya Bbuku lya Bbaibbele Ncoliyiisya
1. Ino Jesu wakayiisya munzila iili buti?
1 Jesu, uuli ngo Mwiiyi Mupati, ciindi coonse wakali kupandulula zintu munzila nguba-uba alimwi iitakatazyi kumvwa. Kupa kuti bamuswiilila kabayeeya, ziindi zimwi wakali kusaanguna kubabuzya nzyobayeeya. (Mt. 17:24-27) Wakali kubatondezya ncolyaamba Jwi lya Leza. (Mt. 26:31; Mk. 7:6) Wakali kubikkila maanu kukutabaambila makani manji basikwiiya bakwe nkaambo wakalizi kuti bakali kuyoozumanana kwiiya. (Joh. 16:12) Alimwi Jesu wakali kubikkila maanu kubona kuti naa basikwiiya bakwe bakali kusyoma akumvwisya nzyaakali kubayiisya. (Mt. 13:51) Bbuku lya Bbaibbele Ncoliyiisya libambilidwe kutugwasya kuyiisya munzila iili boobu.
2. Muunzila nzi motukonzya kubelesya mibuzyo yantalisyo iili mucibalo acimwi?
2 Mibuzyo Yantalisyo: Nomutalika kwiiya mucibalo, cilagwasya kugamika uuli aŋanda kumibuzyo yantalisyo iili ansi aamutwe wamakani. Amubuzye mibuzyo munzila iipa kuyeeya kutegwa ngomwiiya limwi abe aluyandisyo. Ambweni inga mwamulomba kwaamba twaambo mubufwaafwi kujatikizya mibuzyo. Takuyandiki kubandika twaambo ntwaamba toonse naa kukazya kaambo kali koonse kalubide nkaamba. Inga mwamulumba akaambo kamizeezo yakwe alimwi akutalika kulanga-langa makani. Twaambo ntwaamba kumibuzyo yantalisyo tuyoomugwasya kuziba ikuti naa muyandika kubikkila maanu kapati kucibeela cimwi caciiyo.
3. Ino mbuti mbotukonzya kucuubya-ubya ciiyo lyoonse?
3 Magwalo: Ciiyo ceelede kuti kacizwa mu Magwalo. (Heb. 4:12) Nokuba boobo, takuyandiki kubala magwalo oonse aabikkidwe. Amukankaizye buyo Magwalo aayo aatondezya nzyotusyoma. Magwalo aagwasya buyo kumvwisya cakali kucitika inga taayandika kubalwa. Bbuku lya Bbaibbele Ncoliyiisya lilakapandulula kasimpe munzila nguba-uba. Kamucuubya-ubya ciiyo lyoonse. Amubikkile maanu kutwaambo tupati-pati, alimwi mutabi acilengwa cakubandika twaambo tunji naa kwiile kwaamba makani aatajatikizyi ciiyo mumubandi.
4. Ncinzi citupa kuziba ikuti naa tweelede kulanga-langa twaambo tuli mumakani aayungizyidwe ciindi caciiyo?
4 Makani Aayungizyidwe: Makani aayungizyidwe ajisi mitwe iili 14 iiyungizidwe kucibalo coonse. Kubandika mitwe eeyi ciindi caciiyo makani aakulisalila. Kujatikizya twaambo tumwi, inga mwasala kumukulwaizya ngomwiiya limwi kulibalila makani aayungizyidwe lwakwe mwini, kwaambisya ikuti naa ulamvwisya alimwi akuzumina twaambo tuli mucibalo coonse. Mucikozyanyo, ikuti naa sikwiiya ulasyoma kuti Jesu ngo Mesiya, inga tiikwayandika kubandika anguwe mutwe wakuti “Jesu Kristo—ngu Mesiya Wakasyomezyegwa,” nomubandika cibalo 4 caamba kuti, “Ino Jesu Kristo Nguni?” Zimwi ziindi, inga cagwasya kubandika makani aayungizyidwe naa cibeela camakani aayungizyidwe ciindi caciiyo.
5. Ino mbuti mbotukonzya kulanga-langa twaambo tuli mumakani aayungizyidwe ikuti naa twasala kucicita boobo?
5 Ikuti naa mwasala kubandika makani aayungizyidwe, inga mwalibambila mibuzyo kakucili ciindi alimwi akubala mincali antoomwe asikwiiya mbubonya mbomukonzya kucita nomulanga-langa cibalo coonse. Naa, ikweelana anzyayandika sikwiiya, mulakonzya kusala kwiinduluka twaambo anguwe ciindi caciiyo. Eeco ciyoomugwasya kubona masimpe kuti ulamvwisya twaambo ntwalibalila mukamwini.
6. Ino mbuti kabbokesi kakwiinduluka kali kumamanino aaciiyo acimwi mbokakonzya kubelesyegwa?
6 Kabbokesi Kakwiinduluka: Kabbokesi kali kumamanino aacibalo acimwi kajisi twaambo twiingula mibuzyo yantalisyo kanji-kanji. Mulakonzya kutubelesya twaambo ootu kwiinduluka twaambo tupati-pati tuli mucibalo. Basikumwaya bamwi bacibona kuti cilagwasya kapati kubalila antoomwe asikwiiya kaambo akamwi alimwi ambweni amagwalo aali kumamanino aakaambo. Mpoonya balamubuzya sikwiiya kupandulula mubufwaafwi magwalo mbwaakasalazya kaambo. Eeci cilamugwasya mwiiyi kubona ikuti naa sikwiiya ulatumvwisisisya twaambo tupati-pati tuli muciiyo, kubona twaambo ootu mbotusinizigwa mu Bbaibbele alimwi akuti naa ulatusyoma. Alimwi eeci ciyiisya sikwiiya kubelesya Bbaibbele mukupandulwida bamwi kasimpe.
7. Mbuti mbotukonzya kulibelesya bbuku lya Bbaibbele Ncoliyiisya mukuzuzikizya mulimo ngotwakapegwa?
7 Nzila mbotu yakuzuzikizya mulimo ngotwakapegwa wakuyiisya bantu alimwi akubagwasya kuba basikwiiya, nkwiiya nzila zyakuyiisya nzyaakali kubelesya Jesu. (Mt. 28:19, 20) Bbuku lya Bbaibbele Ncoliyiisya lilakonzya kutugwasya mukucita boobo. Amulibelesye kuyiisya bamwi kasimpe munzila iimvwika, nguba-uba, alimwi iikulwaizya.