Amuzibelesye Kabotu Zibeela Zili Mubbuku lya Bbaibbele Ncoliyiisya

Ciindi sikwiiya Bbaibbele naazyiba cini ncoliyiisya Bbaibbele alimwi akuzibelesya nzyaiya, ulakomena kumuuya akuzyala micelo. (Int. 1:1-3) Tulakonzya kubagwasya bantu mbotuyiisya Bbaibbele kuyaambele kumuuya kwiinda mukuzibelesya kabotu zibeela zimwi zili mubbuku lya Bbaibbele Ncoliyiisya.

Mibuzyo Iili Kumatalikilo Aacibalo: Cibalo cimwi acimwi cilatalika amibuzyo yiingulwa mucibalo. Mulakonzya kumubuzya mibuzyo eeyi sikwiiya kutegwa abe aluyandisisyo lwakubandika. Mulakonzya kumulomba kwaamba mbwayeeya mubufwaafwi kujatikizya mubuzyo umwi aumwi. Ikuti naa waamba muzeezo uutaluzi, takuyandiki kumululamika aciindi eeci. Bwiinguzi bwakwe inga bwamugwasya kuzyiba twaambo tuyandika kubikkilwa maano alimwi akukankaizyigwa.—Tus. 16:23; 18:13.

Makani Aayungizyidwe: Ikuti naa sikwiiya ulaamvwisya alimwi akwaazumina makani aali mumincali, inga mwamukulwaizya buyo kulibalila mwini makani aayungizyidwe aayeendelana acibalo. Aciiyo citobela, mweelede kuzandula maminiti masyoonto kutegwa mube masimpe naa wakacimvwisya cibalo cainda. Nokuba boobo, ikuti makani aayungizyidwe alakonzya kumugwasya sikwiiya, mweelede kujana ciindi cakubandika twaambo ooto naa cibeela cimwi kwiinda mukubala mincali alimwi akubuzya mibuzyo njomwakalibambilila limwi.

Kabbokesi Kakwiinduluka: Kabbokesi kakwiinduluka ikali kumamanino aacibalo cimwi acimwi kajisi twaambo twiingula mibuzyo iili kumatalikilo aacibalo. Mulakonzya kubelesya cibeela eeci kutegwa musinizye kuti sikwiiya wacimvwisya cibalo alimwi akuti ulakonzya kutupandulula twaambo tupati-pati. Amubale antoomwe kaambo kamwi akamwi cakupozya kubikkilizya amagwalo aali woonse aabikkidwe. Mpoonya amumulombe sikwiiya kubelesya magwalo kutegwa apandulule twaambo ooto ncotuli twamasimpe.—Mil. 17:2, 3.