Amugwasyigwe Mukwiiya Bbuku lya Amubaa Cilongwe a Jehova
1 Ku Muswaangano Wacooko wa “Basikwaambilizya Bwami Ibasungu,” twakakkomana kutambula bbuku lyakuti, Amubaa Cilongwe a Jehova. Ibanji bakalibala bbuku eeli mpoonya-mpoonya. Alimwi bambi banji cakutadooneka bakakulwaizyigwa kulibala alugwalo lwamwaka wa 2003 lwakuti: “Amuswenenene kuli-Leza, elyo alakwe ulamuswenenena.”—Jak. 4:8.
2 Mu March tuyootalika kwiiya bbuku lya Amubaa Cilongwe a Jehova ku Ciiyo Cabbuku Cambungano. Mbuti mbotunga twagwasyigwa kapati kuciiyo cesu? Kulibambila kulayandika kapati. Cibalo acimwi cinooyiigwa kwamvwiki zyobile, eelyo mincali iinooyiigwa amvwiki tiinooli minji pe. Eeci ciyoopa kuti mube aciindi cibotu cakwiingula camoyo woonse kweelana amakani alimwi akuzinzibala kuyeeya nkomwacita. Kunze lyaboobo, kunooli mincali misyoonto mumvwiki zinooyiigwa cibeela cacibalo camamanino, ikutegwa cikonzyeke kulanga-langa zili mucibeela cabbuku caalubazu.
3 Kutalikila mucibalo 2, kuli kabbokesi munsi-munsi akumamanino kwacibalo ikajisi mutwe wakuti: “Mibuzyo Yakuyeeya Cakuzinzibala.” Mwaakumana kubandika muncali wamamanino mucibalo, mulangizi waciiyo cabbuku uyoobandika kabbokesi aako akakamu. Uyookulwaizya boonse mukakamu ikwaamba mbobayeeya, ikujana twaambo tubotu ntobajisi mukuzinzibala kuyeeya kwabo ku Magwalo. (Tus. 20:5) Kunze lyamibuzyo iili mukabbokesi, zimwi ziindi uyoobuzya mibuzyo mbuli yakuti: “Ino makani aaya amwaambila nzi kujatikizya Jehova? Ino abujatikizya buti buumi bwanu? Ino inga mwaabelesya buti kugwasya bamwi?” Imakanze aakwe anooli aakukulwaizya kwiingula camoyo woonse, ikutali kusunka bali mukakamu kujatikizya twaambo tutali tupati.
4 Ibbuku lya Amubaa Cilongwe a Jehova liliindene amabbuku aambi aayiigwa. Nokuba kuti mabbuku aa “muzike musyomesi uucenjede” oonse alemeka Jehova, imakanze aabbuku eeli ayeeme buyo aakubandika bube bwa Jehova. (Mt. 24:45-47) Elo taciliboteli coolwe eeci ncotulindila! Tuyoogwasyigwa kapati akwiiya kusitikide kwabube bwa Jehova. Iciiyo eeci acitugwasye kuba acilongwe ciyumu a Taateesu wakujulu, alimwi atuyaambele mukucizyiba kugwasya bambi kucita mbubwena.