Sena Mulaa Muuya Wakulyaaba?
1 Ikubona Jesu Kristo mbwaakacitila bantunsi munzila yakutaliyanda ceelede kutukulwaizya toonse kulyaaba alimwi akubeleka canguzu. Magwalo alatukulwaizya kuti: “Mutuule mibili yanu, ibe cipaizyo cuumi, cisalala, ciyandisi kuli-Leza.” (Rom. 12:1) Ikulilingula tobeni ciindi aciindi kuyoopa kuti mubone naa mulatondezya muuya ooyu bweelede kweelanaa bukkale bwanu.
2 Mukuzumananaa Luzibo lwa Bbaibbele: Sena mulaa bubambe bwakubala Bbaibbele lyoonse? Sena mulabutobela bubambe oobu? Sena nciyanza canu ikulibambila kabotu miswaangano yambungano? Kuti kamuli basilutwe bamukwasyi, sena mulacita ciiyo ca Bbaibbele lyoonse amukwasyi wanu? Ikutegwa muzicite ezi, kuyandika kwaabanya ciindi ncomubelesya kulangilila cipekupeku naa kubelesya kkompyuta naa kucita zintu zimwi. Nokuba boobo, tamumani pe ciindi eelyo nomucibelesya ikubala Jwi lya Leza nkaambo mulizi kuti liyoomusololela kubuumi butamani!—Joh. 17:3.
3 Mukufwundisya Bana Banu: Iciindi cibotu cakwiiya kulyaaba ndileelyo muntu nacili muniini. Amubayiisye kuti kuli ciindi cakusobana, acakubeleka alimwi aciindi camilimo yateokrasi. (Ef. 6:4) Amubape mulimo ulaampindu wakucita aŋanda. Amube abubambe bwakutola lubazu lyoonse ambabo mumulimo. Amube cikozyanyo cibotu kutegwa baatobele kabotu malailile aanu.
4 Mumilimo ya Mbungano: Imbungano ilayumizigwa kuti naa boonse bali mulinjiyo kabalisungude akulyaaba mukucita milimo iigwasya. (Heb. 13:16) Sena mulacikonzya kumana ciindi cilamfwu mumulimo wakukambauka Bwami alimwi akugwasya bamwi kuba basikwiiya? Sena mulakonzya kulisungula kugwasya balwazi naa bacembeede antela kubagwasya a cakweendela kuya kumiswaangano?
5 Katanaaba buumi bwakwe bwabuntunsi, Jesu wakalaya basikwiiya bakwe kuti beelede kubikka maanu aabo kuzintu zya Bwami cakusaanguna eelyo zyakumubili mubusena bwabili. (Mt. 6:33) Ikuzumanana amuuya wakulyaaba kuyootuletela lukkomano kapati mbotuyaabuyaambele kubelekela Jehova cakukondwa.