Sena Mulaansoni?
1 Tacigambyi pe notubona mwana muniini kasondela nabbedwe abanyina naa nanyamudwe abausyi. Muntu uli woonse ulaansoni nacili mwana. Noliba leelyo nobakomena, ibanji inga bacilaansoni zyakuzyalwaazyalo. Ikuti kacimukatazya kutola lubazu mumulimo akaambo kansoni, ncinzi ncomukonzya kucita?
2 Mbomunga Mwamanizya Nsoni: Ncintu ciyandika kapati ikubikkila maanu ‘kumoyo wamukati.’ (1 Pet. 3:4) Amuyumye luyando lwanu kuli Jehova alimwi abasimukobonyoko. Amusinizye camoyo woonse kuti ikubeleka mulimo wakukambauka nenzila imwi iiyandika kapati motunga twatondezya luyando lwesu lwakulyaaba. Amube abubambe bubotu bwaciiyo canu nobeni alimwi akujanika lyoonse kumiswaangano. Amulupailile lyoonse lugwasyo lwa Jehova. Ilusyomo luyumu mulinguwe luyoomugwasya ikuliyumya alimwi “akuba akaanzambwene kakwaamba makani aa-Leza cakutayoowa.”—Flp. 1:14.
3 Amukuzunde kulimvwa mbuli kuti taakwe ncomunga mwacita. Cilibonya kuti eci ncaakeelede kucita Timoteo. Paulo wakamukulwaizya Timoteo kuti “kutabi uubaula bwanike bwa[kwe],” akumuyeezya kuti “Leza takatupede muuya wabukandu, pe, wakatupa muuya wanguzu.” (1 Tim. 4:12; 2 Tim. 1:7) Jehova wakamubelesya kapati Timoteo, alimwi andinywe uyoomubelesya ikuti naa mwazumanana ikuyaambele kamujisi lusyomo muli Nguwe.—Int. 56:11.
4 Ikunzinzibala kuyeeya lugwalo lwamu Bbaibbele mbuli lwa Matayo 10:37, kwakamugwasya mucizi umwi wakali mukandu eeco cakamupede kuti kamuyoowa kapati mulumi wakwe iwakali kumukazya. Akaambo kakukakatila kwakwe, cakamuubaubila kutola lubazu mumulimo, mpoonya mukuya kwaciindi mulumaakwe, banyina alimwi abanabokwabo basankwa boonse bakatalika kwiiya kasimpe!
5 Ikulibambila Ncintu Ciyandika Kapati: Muyooba basicamba ikuti naa kamulibambila kabotu eelyo nomutola lubazu mumulimo. Amusale nzila imwi nguba-uba mbomukonzya kusikila bantu kuzwa mukabbuku ka Mboitalikwa Akuzumananwa Mibandi ya Bbaibbele naa mumakkopi aamusyule aa Mulimo Wesu Wabwami, mpoonya amwiibikke mumizeezo akwiinduluka-induluka. Muciindi cakulibilika, amube alusyomo. Amube basicamba kwiinda mukubelekela antoomwe abamwi. Amuyeeye kuti ibantu banji mbomunoojana mumaandaabo abalo mbakandu mbuli ndinywe. Boonse buyo beelede kuumvwa mulumbe wa Bwami.
6 Ikuti kamulaansoni, mutatyompwi pe. Ikuti mwasola canguzu, Jehova uyoomugwasilizya ikuba mukambausi wamakani mabotu uuzwidilila. Aboobo muyoojana lukkomano mumulimo wanu.—Tus. 10:22.