Miswaangano Ilabagwasya Bakubusi
1 Umwi musimbi mukubusi wakaamba kuti: “Zimwi ziindi ndiyeeya kuti bakubusi mbabajisi buyumuyumu kapati mubuumi. Tulizingulukidwe abantu baamu, ibanywa misamu iikola alimwi abadakwi.” Sena obo mbomulimvwa? Ikuti naa mbomulimvwa andinywe obo, ino muyeeya kuti ncinzi ciyoomugwasya kukazya kuyungwa mumicito mibi eeyi? Muyandika kubaa lusyomo luyumu munzila ziluleme zya Jehova, nkaambo ibuyo-buyo “tacikonzeki kukonda Leza.” (Heb. 11:6) Ikujanika kumiswaangano yambungano kuyoomugwasya ikuyumya lusyomo lwanu lwa Bunakristo alimwi akulisungula kuzumanana kweeleba zibi.
2 Miswaangano Ilamugwasya Munzila Zinji Kapati: Ncinzi cimupa kukondwa eelyo nomulya cakulya cinona abeenzinyoko? Sena teensi zintu zyoonse zyobile, icakulya cibotu alimwi abulongwe bukondelezya bwaluumuno? Mbubwenya buyo, akwalo kumiswaangano yesu tulajanika abukkale bukondelezya munzila yakumuuya.
3 Zintu zibandikwa kumiswaangano zilakulwaizya kapati, eezi zibikkilizya makani aajatikizya mapenzi aatucitikila buzubaa buzuba alimwi akwiiya businsimi bukondelezya bwamu Bbaibbele. Malailile ngomupegwa agwasya kumuyiisya nzila yabukkale bulaampindu alimwi ambomukonzya kulwana mapenzi aakonzya kumucitikila. Kumiswaangano kujanika balongwe bainda kubota balo mbomutakonzyi kujana kumbi kuli koonse alimwi mujana bukkale bukondelezya munzila yakumuuya alimwi buli kabotu. (Int. 133:1) Anu mukubusi umwi ncaakati: “Abuzuba nduunka kucikolo, elyo eci cilandityompya kapati akaambo kakuti ndeelede kukazya ziyanza zibi lyoonse. Pele imiswaangano ili mbuli kasensa kamaanzi mucimpayuma kwalo nkondikatalusigwa kutegwa ndicikonzye kuliyumya kucikolo buzuba butobela.” Aumwi wakati: “Ndajana kuti ikubaa bulongwe bubotu abantu bamuyanda Jehova kundigwasya ikukakatila kulinguwe.”
4 Kwiinda mukulilembya mu Cikolo Camulimo Wateokrasi mulakonzya kwiiya mbomunga mwajana akulibambila makani aamu Bbaibbele alimwi akwaabandika kubaswiilizi ku Ŋanda ya Bwami. Amuyeeye buyo mpindu yakujana luzibo lwambokuyiisigwa kasimpe kamu Jwi lya Leza kafwutula buumi! Nkuli kumbi ibakubusi nkobakonzya kujana lwiiyo luli boobu iluyandika kapati?
5 Mbomunga Mwagwasigwa Kapati a Miswaangano: Kutegwa mugwasigwe kapati amiswaangano, kuli zintu zyotatwe ziyandika kapati nzyomweelede kucita. Zintu eezi zibikkilizya kulibambila, ikutola lubazu alimwi akucita nzyomwiiya.
6 Amulibambile Miswaangano: Amujane ciindi cakulibambila miswaangano lyoonse. Mutazumizyi milimo yakucikolo naa mulimo wakaindi kasyoonto buyo antela kulikondelezya kuti kumusowele ciindi ncomuyandika ikutegwa mulibambilile limwi makani aayoobandikwa kumuswaangano uli woonse. Cilagwasya kapati ikubaa bubambe bubotu. Cakusaanguna, amuzumanane kweendelaamwi amulongo wakubala Bbaibbele kwansondo ansondo kwamu Cikolo Camulimo Wateokrasi. Ciyanda kutola buyo maminiti masyoonto abuzuba ikubala alimwi akuzinzibala kuyeeya azyaandaano zibikkidwe. Amubikke ciindi cakulibambila Ciiyo Cabbuku Cambungano alimwi a Ciiyo ca Ngazi Yamulindizi. Ibamwi balalibambila kakucili buzuba bomwe naa obilo kuti kukacitwe miswaangano eyi. Kufwumbwa kuti kacikonzeka, amucite mbubwenya azibeela zibikkidwe mu Muswaangano Wamulimo wamvwiki imwi aimwi.
7 Amutole Lubazu Amiswaangano: Ibbaibbele lyaamba kuti Jesu naakali aamyaka yakuzyalwa iili 12 wakajanwa mutempele kaswiilila, akubuzya mibuzyo alimwi akupa bwiinguzi. (Lk. 2:46, 47) Atwaambe kuti, wakali kutola lubazu. Muyoogwasigwa kapati amiswaangano elyo nomusoleka kapati ikutola lubazu mulinjiyo.—Tus. 15:23.
8 Mweelede kubikkila maanu kapati kuli zyeezyo zili mukuyiisigwa kumiswaangano. Zimwi ziindi, cilauba-uba kwaakanana makani kwiinda kuswiilila buya. Nkaambo nzi? Nkaambo kakuti mizeezo yanu ilakonzya kusakana ciindi nomuswiilila umwi kakanana. Ino mbuti mbomukonzya kuzunda cilengwa eci? Nkwiinda mukulemba twaambo tumwi. Amutulembe twaambo tuyandika kapati ooto twalo ntomuyanda kuti mukatubale alimwi ciindi cimbi. Ikulemba twaambo kuyoomugwasya kugamika mizeezo yanu kupulogilamu. Amwaalange magwalo alimwi akumutobelezya mwaambi elyo nali mukwaabala.
9 Kunze lyaboobo, aibe mbaakani yanu ikutola lubazu mumubandi uli woonse wakubuzya akwiingula kumiswaangano. Muyoogwasigwa kapati ikuti mwaciyeeyela limwi kabotu eco ncomuyanda kwaamba. Ibbuku lya Tusimpi 15:28 lyaamba kuti: “Moyo wamululami ulayeeya kabotu mbweelede kuvuwa.”
10 Amuzicite Ezyo Nzyomwiiya: Ntaamu yamamanino njakubona kuti ezyo nzyomwiiya zili “anguzu zyakubelekabeleka mumyoyo yanu.” (1 Tes. 2:13) Ikuti naa mwatubelesya twaambo tubotu ntomwiiya kumuswaangano umwi aumwi, muyoojana kuti muyooswenenena afwaafwi a Jehova Leza. Uyooba muntu wini-wini kulindinywe alimwi muyookkomana kapati elyo ‘nomuzumanana kweenda mulusinizyo,’ ikulucita kuti lube lwanu nobeni.—3 Joh. 4.
11 Nobakwesu abacizi bakubusi, nomulibambila miswaangano lyoonse amutole lubazu mulinjiyo alimwi amuzicite ezyo nzyomwiiya, elyo muyooikkomanina kapati miswaangano. Alimwi muyoogwasigwa kapati anjiyo. Lusyomo lwanu luyooyumizigwa alimwi aluyando lwanu lwakuba bantu basyomeka kuli Uso wanu wakujulu Jehova.—Int. 145:18.