Lyoonse Amumuyoowe Jehova
1 “Kulemeka Jehova matalikilo aabusongo.” (Int. 111:10) Kulatukulwaizya kucita milimo mibotu alimwi kutugwasya kutantamuka kububi. (Tus. 16:6) Kuyoowa ooku mbulemu bupati mbotujisi ku Mulengi wesu bwalo butukulwaizya kulikasya kutamukkomanisya alimwi akutamumvwida. Kuyoowa ooku ncintu ncotweelede kubaancico alimwi akucitondezya lyoonse.—Tus. 8:13.
2 Ibuzubaa buzuba, muuya wanyika ya Saatani ulatusungilizya kapati ikutobela ziyanza zyawo zibi. (Ef. 6:11, 12) Imibili yesu iitalondokede ilikompeme, aboobo lyoonse inga iyanda kucita zintu zibi. (Gal. 5:17) Aboobo, ikutegwa tutobele milawo ya Jehova, akuba bantu bakkomene alimwi akuti tukajane buumi, tweelede kumuyoowa lyoonse.—Dt. 10:12, 13.
3 Mubbuku lya Ba-Hebrayo 10:24, 25, tulaililwa kuti katuswaangana antoomwe kutegwa katucenjezyanya twaambo ‘katucita oobu lyoonse’ kuciindi ecino ncotukkede. Ikujanika lyoonse kumiswaangano kulayandika kapati ikuti naa katuyanda kufwutuka mumazubaano aamamanino. Ikuyoowa kutamukkomanisya Leza kulatukulwaizya kuti katujanika kumiswaangano lyoonse alimwi kutondezya kuti tulailemeka kapati miswaangano. Aabo ibamuyoowa Leza balakubikkila maanu ikutola lubazu mumiswaangano ya Bunakristo akwiibona kuti ncoolwe cisetekene.
4 Ikutobela malailile aakukambauka makani mabotu aa Bwami ninzila imwi yakutondezya mbotumuyoowa Leza. (Mt. 28:19, 20; Inc. 10:42) Imbaakani yesu mpati mumulimo wakukambauka njakugwasya bamwi ikuyoowa Jehova alimwi akulibombya kumakanzaakwe. Tulacita oobu kwiinda munyendo zyakupilukila, ikusoleka kutalisya ziiyo zya Bbaibbele zyaaŋanda, akuyiisya bamwi milawo ya Leza yoonse. Kwiinda mukucita boobu, tutondezya kuti tulamuyoowa Jehova alimwi aluyando ndotujisi kuli basimukoboma.—Mt. 22:37-39.
5 Aabo ibatamuyoowi Leza tabatondezyi kuti balazibikkila maanu zintu zyakumuuya, pele balalibombya kumuuya mubi wanyika naa miyeeyo yanyika. (Ef. 2:2) Ikusala kwesu kweelede kuba kooko ‘kwakumanina Leza milimo mibotu yakumubotezya cakulemeka acakuyoowa.’ (Heb. 12:28) Twacita boobo tuyoobaa zilongezyo zijisi baabo ibayoowa Jehova lyoonse.