Ipulogilamu Mpya ya Muswaangano Wabbazu
Ibupanduluzi bumwi bwabbala lyakuti kuyoowa bwaamba kuti “nkupa bulemu bweelede, ikapati kuli Leza.” Eeci cipandulula kuyoowa kuli kabotu kwaambwa mu Magwalo kwalo kuli “[nga]matalikilo aabusongo.” (Int. 111:10) Mukwiimpana, kuli kuyoowa kumbi kuli munyika ya Saatani eeyi iituzingulukide. Ino mbuti mbotukonzya kweeleba kulimvwa ooku kutali kabotu kumwi katusumpula kulemeka Jehova kwini-kwini? Ipulogilamu mpya yamuswaangano wabbazu mumwaka wamulimo wa 2002 ilawiingula mubuzyo ooyu. Imutwe wamakani waamba kuti, “Amuyoowe Leza Akumupa Bulemu.” (Ciy. 14:7) Tuyoomvwisya inzila zinji kuyoowa Jehova mbokugwasya umwi aumwi wesu kubikkilizyaa mbunga yoonse.
Nokuba kuti kuyoowa kulakonzya kwaamba kulibilika, kubula camba alimwi akuyowa-yowa mukulanganaa zintu zikatazya, Ibbaibbele lyaamba kuti: “Ngusicoolwe uuyoowa Jehova.” (Int. 128:1) Ipulogilamu yamuswaangano iyootondezya mbotunga twazwidilila mukulwana buyumuyumu mbotujana kubukombi bwakasimpe. Tuyoobona mbotukonzya kugwasya bapya kusumpula kuyoowa Leza ooku kuli kabotu, kwalo kuyoobakulwaizya cini-cini kuyanda kumubelekelaa moyo wabo woonse, muuya, miyeeyo alimwi anguzu. (Mk. 12:30) Ibuzuba bwakusaanguna buyoomanaa makani kuzwa kumulangizi wacooko aakuti “Amuswenenene Aafwaafwi Kuli Baabo Mbomuyanda.” Uyoopandulula mbotukonzya kupakamana kukusola-sola kwa Diabolosi kuti atugwisye kuzwa kuli Jehova, kumikwasyi yesu alimwi akubakwesu Banakristo.
“Amuyoowe Jehova, Ikutali Bantu” ngomutwe wamakani aakusiilana aali muzibeela zyone anooli mubuzuba bwabili. Ayoopandulula ikaambo alimwi ambotukonzya kuzunda kuyoowa koonse kutaluzi kwalo kutusinkilila kuzwa kukuzuzikizya mulimo wesu, ikuzumanana kusyomeka alimwi akubaa manjezeezya aasalala kucikolo alimwi akubusena nkotubelekela. Imakani aabuleya aakuti, “Amuyoowe Leza Akubamba Milawo Yakwe” ayeeme azintu zitobelene zyaambidwe kubbuku lya Ciyubunuzyo caandaano 14. Imuswaangano wabbazu uyoomanaa makani aakulwaizya aakuti, “Amuzumanane Kweenda Cakuyoowa Jehova.”
Icikolo Camulimo Wateokrasi, Muswaangano Wamulimo wacitondezyo, makani alubbapatizyo alimwi akufwiinsya Ciiyo ca Ngazi Yamulindizi nzibeela zimwi zyapulogilamu nzyomutakayandi kwiindwa. Amubatambe aabo mbomwiiya limwi Bbaibbele kutegwa mukajanike moonse. Boonse aabo bayanda kuyoobbapatizigwa beelede kuzibya mulangizi weendelezya cakufwaambana. Toonse tuyooyanda kutondezya kuyoowa Jehova kuli kabotu alimwi akupa bulemu kulinguwe kwiinda mukutayindwa kucibeela cili coonse capulogilamu mbotu eeyi!