Ipulogilamu Mpya ya Muswaangano Wabbazu

‘Amubambe Milawo ya Leza Kuti Mupone’ ngomutwe wapulogilamu yamuswaangano wabbazu wamazuba obile kutalikila mu September. (Tus. 4:4) Uyooambisya kaambo ikutobela milawo ya Leza ncoutali mukuli uuminya. Kunze lyaboobo, uyootondezya kucita kuyanda kwa Leza mbokukkazika moyo akuletela lukkomano lwini-lwini kubikkilizya abulangizi bwakumbele.—Mt. 11:28-30; Joh. 13:17.

Aabo ibayelela kuyoobbapatizigwa kumuswaangano mukutobela mulawo wa Kristo beelede kwaambila mulangizi weendelezya, elyo walo uyoocita bubambe bweelede.—Mt. 28:19, 20.

Makani aakusiilana ayootondezya kabotu-kabotu inzila mbotunga twatondezya luyando kuli Leza akubakwesu. (Joh. 13:34, 35; 1 Joh. 5:3) Lulayo lukulwaizya kuzwa ku Intembauzyo 19 a 119 luyoobikkilizigwa mupulogilamu. Nokuba kuti malailile aakazwa kuli Leza aali muntembauzyo ezi akalembwa tuulunzuma twamyaka twainda tulimbotubede, tuyoobona mbuli mbwaakonzya kugwasya omwe-omwe wandiswe sunu.

Makani aakubuleya aayoopegwaa mulangizi wacooko alaamutwe wakuti ‘Amulemeke Leza Akubamba Milazyo Yakwe.’ (Muk. 12:13) Imakani aamamanino aamulangizi wabbazu ayootondezya bakubusi mbobanga bajana lukkomano mubukkale ono alimwi ambobanga basyoma mubukkale bwakumbele butamani. Mulangizi wacooko uyooimanizya pulogilamu kwiinda mukundandamika zintu zibotu zinji muntu nzyakonzya kujana kwiinda mukutobela bukkale bwa “mulao wa-Mwami” waluyando. (Jak. 2:8) Ncobeni, eeyi nipulogilamu yamuswaangano umwi aumwi wandiswe njatakayandi kwiindwa!