Ipulogilamu Mpya ya Muswaangano Wabbazu

‘Muziindi zino zikatazya,’ tuyandika busongo bwa Leza kutegwa katukkomaninwa lyoonse a Jehova. (2 Tim. 3:1) Ipulogilamu yamuswaangano wabbazu yamumwaka wamulimo wa 2005, iya kutupa lulayo lugwasya alimwi akutukulwaizya kwanoobandikwa mutwe wamakani wakuti: “Amusololelwe a ‘Busongo Buzwa Kujulu.’”—Jak. 3:17.

Makani aakusiilana aakusaanguna aakuti, “Kutondezya ‘Busongo Buzwa Kujulu’ Mubuumi Bwesu,” aya kutugwasya kuteelela cijatikizyidwe mukuba bantu basalala, basiluumuno, batontozi alimwi babombede. Mpoonya mulangizi wabbazu uya kubikkila maano kuzibeela zimwi zyotatwe zyabusongo bwakujulu. Kumamanino abuzuba bwakusaanguna, mulangizi wacooko uya kumanizya akutondezya mbuli babelesi Banakristo mbobalibambide kukanana zyabusongo bwa Leza nekuba kuti bamwi bababona kuti “mbantu buyo abatakaiya.”—Inc. 4:13.

Mubuzuba bwabili, makani aakusiilana aakuti, “Amucite Zintu Zikulwaizya,” aya kutugwasya kuzyiba alimwi akutantamuka zintu zikonzya kututyompya kumuuya. Alimwi tuya kugwasyigwa kubona mbotunga twabakulwaizya bantu lyamiswaangano yambungano, mumulimo wamumuunda alimwi amumukwasyi. Makani aabuleya aajisi mutwe wakuti, “Busongo bwa Leza Mbobutugwasya,” aya kuyungizya kulumba nkotujisi kububotu mbotujana mukutobela njiisyo zizwa kuli Leza mubuumi bwesu. Imakani aamamanino aakuti, “Kutobela Busongo bwa Leza Kulatukwabilila,” aya kutuyumya-yumya mumakanze eesu aakulingula busongo bwa Jehova lyoonse mumazubaano aakumamanino.

Cibeela cipati camuswaangano aumwi nkubbapatizyigwa kwabasikwiiya bapya. Cikolo ca Mulimo Weendelezyegwa a Leza alimwi a Ciiyo ca Ngazi Yamulindizi cansondo eeyo ziyooba azyalo mupulogilamu. Jehova uyanda kuti toonse tujane mpindu kubusongo mbwatupa. Tuya kuba bavwubi kumuuya akaambo kalulayo alimwi akukulwaizyigwa nkotulindila kumuswaangano wesu wabbazu.—Tus. 3:13-18.