Muswaangano Wabbazu Uuyootugwasya Kukwabilila Cilongwe Cesu a Leza
1. Ino ncaabilo nzi cizwa kuli Jehova icitugwasya kuzuzikizya mulimo ngotupedwe wakukambauka makani mabotu?
1 Jehova ulatwiisya akutuyumya-yumya kutegwa katutola lubazu mumulimo ngwatupede wakukambauka makani mabotu. (Mt. 24:14; 2 Tim. 4:17) Muswaangano wabbazu uucitwa amwaka nenzila imwi njabelesya kutuyiisya alimwi akutukulwaizya. Pulogilamu mpya yamuswaangano wamumwaka wa 2010 ijisi mutwe wakuti, “Amukwabilile Cilongwe Cenu a Leza,” uuzwa kulugwalo lwa Ba-Roma 8:5 a Juda 17-19. Miswaangano eeyi yabbazu iyootalika munsondo ya August 31, 2009.
2. (a) Ino mmuunzila nzi muswaangano wabbazu mbouyootugwasya? (b) Ino miswaangano yabbazu yakacitwa musyule yakamugwasya buti mumulimo wenu?
2 Muswaangano Wabbazu Mbouyootugwasya: Muswaangano ooyu uyootugwasya kuzyiba ntenda alimwi azyintu zikonzya kutumanina ciindi ncotweelede kubelesya ikucita zyintu ziyandika kapati. Tuyooiya mbotukonzya kulwana muuya wanyika uukulwaizya bantu kuti kabacita kufwumbwa ncobayanda alimwi tuyoozyiba ncocaamba kuba muntu uubikkila maano kuzyintu zyakumuuya. Makani aakusiilana aayoopegwa mu Nsondo ayootondezya umwi aumwi alimwi abanamukwasyi mbobakonzya kuyumya cilongwe cabo a Jehova nokuba kuti mapenzi alimwi amasunko aabacitikila aajatikizya lusyomo ayaabuvwula. Pulogilamu iyootugwasya kubona mbotukonzya kukwabilila myoyo yesu, kuzumanana kuba acilongwe ciyumu a Jehova alimwi akuyeeya zilongezyo zibambilidwe baabo ibabikkila maano kuzyintu zyakumuuya.
3. Ino muswaangano wenu wabbazu unooli lili, alimwi ino ncinzi ncomweelede kukanza kucita?
3 Kufwumbwa buyo mwaakubuzyiba buzuba alimwi abusena nkouyoobeda muswaangano wabbazu, amukatalike kulibambila kuti mukajanike alimwi akuswiililisya kuzibeela zyoonse zyamuswaangano. Amuzyibe kuti, Jehova ulaalongezya makanze aabasungu.—Tus. 21:5.
4. Ino ncinzi ncotulangila kuyootambula kumuswaangano wabbazu uuboola?
4 Masimpe, Jehova Nguutwaabila cipego eeci cibotu. Pulogilamu iibambidwe aciinga camuzike musyomesi iyootugwasya kuti tuzumanane kuba basimilimo Banakristo. Tulamulumba Jehova akaambo kazyintu nzyatwaabila zyalo izitugwasya kuti “tujatisye buzumino bwabulangizi bwesu, kuti kutabi notuzungaana.”—Heb.10:23-25; Jak. 1:17.