Bubambe Bugwasya Babelesi Banakristo
1. Ino mbubambe nzi bupya ibwakabikkwa mumwaka wa 1938 alimwi ino bwakabikkilwa nzi?
1 Mumwaka wa 1938, imbunga ya Jehova yakabikka bubambe bupya. Mbungano zyakatambwa kumiswaangano yabbazu. Kuya kucita nzi? Imulimo Wesu wa Bwami wamu January 1939 wakaingula kuti: “Miswaangano eeyi ncibeela ca Mbunga yeendelezyegwa a Jehova cikonzya kutugwasya kubeleka mulimo wa Bwami. Malailile ngotupegwa alayandika kapati kutegwa aumwi aubeleke kabotu mulimo ngwapedwe.” Twalanga mbobavwula basikukambauka ba Bwami, mumwaka wa 1938 bakali buyo 58,000, pele kusika mu 2009 bakainda ku 7,000,000. Eeci citondezya kuti miswaangano yabbazu ilabagwasya bakambausi “kubeleka milimo njobapedwe”!
2. Ino makani nzi ayakubandikwa kumuswaangano wabbazu mumwaka wamulimo mupya?
2 Mutwe Wamuswaangano Wamwaka Uuboola: Ipulogilamu yamiswaangano yabbazu iyootalika mu September. Ijisi mutwe wamakani wakuti “Tamuli Bayeeyi Inyika” kuzwa kulugwalo lwa Johane 15:19. Ino makani nzi amwi ayakwaambwa ayakugwasya babelesi Banakristo? Mu Mujibelo tuyakumvwa makani aakuti “Mulimo Waciindi Coonse Ulatukwabilila—Munzila nzi?” Alimwi tuyakukkomana kuswiilila makani aakusiilana ajisi zibeela zyotatwe aakuti “Mutasofwaazyigwi aa . . .” “Cinyama,” “Sikuvuula Mupati” alimwi a “Basambazi.” Mu Nsondo tuyooswiilila makani aakusiilana ajisi mutwe wakuti “Amuyande Jehova, Ikutali Nyika.” Makani aamwi ajisi mitwe yakuti “Bwami bwa Kristo ‘Tabuli Bwayeeyi Nyika,’” “Amuzumanane Kuba Mbuli ‘Bazwamasi Abeenzu’” alimwi aakuti “Amuyume! Mulakonzya Kwiizunda Nyika.”
3. Ino inga twagwasyigwa buti ikuti twajanika kumuswaangano wabbazu?
3 Mucizyi umwi iwakajanika kumuswaangano wabbazu caino-ino alimwi iwatakali musungu mumulimo wakukambauka wakalemba kuti: “Ipulogilamu yakandigwasya kulanga-langa bukkale bwangu alimwi akubeleka mulimo wakukambauka kakunyina kwaamba twaambo twakulitamizya!” Cakutadooneka, muswaangano wabbazu wamwaka wamulimo mupya uyakutugwasya toonse kumuyanda Jehova ikutali nyika. (1 Joh. 2:15-17) Amukajanike kububambe oobu bugwasya babelesi Banakristo!