Amubambe Mizeezo Yanu

1. Ino muswaangano wabbazu wamwaka wamulimo wa 2013 ujisi mutwe nzi, alimwi uyootugwasya buti muswaangano ooyu?

¹ Jesu wakalailila basikwiiya bakwe kuyanda Jehova amoyo wabo woonse, buumi bwabo boonse, alimwi amizeezo yabo yoonse. (Mt. 22:37, 38) Miswaangano yacooko yamwaka uno alimwi amiswaangano yabbazu ayaalubazu yabambilwa kutugwasya kuyumya buntu bwesu bwamukati. Mbuli mbomuzyi, mutwe wamuswaangano wacooko ngwakuti “Bamba Moyo Wako!” Pulogilamu yamuswaangano waalubazu yamwaka wamulimo wa 2013 ijisi mutwe wakuti “Amwaakwabilile Manjezyeezya Aanu.” Alimwi miswaangano yabbazu iitalika mwezi uuboola inoojisi mutwe wakuti “Amubambe Mizeezo Yanu,” uuyeeme aalugwalo lwa Matayo 22:37. Pulogilamu eeyi ibambilidwe kutugwasya kulanga-langa mizeezo yesu kutegwa kaimukkomanisya Jehova.

2. Mibuzyo nzi njotweelede kulangila kwiingulwa kumuswaangano wabbazu?

² Makani Ayoobandikwa: Twanooswiilila kumuswaangano wabbazu, atukayandaule bwiinguzi kumibuzyo iitobela, yalo iiminina twaambo tupati-pati:

• Ncinzi ncotweelede kucita kutegwa tutabi aamizeezo ‘yabuntu’?

• Ino inga twagwasya buti kugwisya mudima woofwaazya mizeezo yabantu batasyomi?

• Ino tuyanda kuba amizeezo iili buti?

• Ino kuzinzibala kuyeeya kuli kabotu kutugwasya buti?

• Ino inga twamuzumizya buti Jehova kuti ayendelezye mizeezo yesu?

• Ino bamaalumi, bamakaintu, bazyali, alimwi abana inga bagwasyilizya buti kutegwa kube lukkomano mumukwasyi?

• Mbuti mbotukonzya kulibambila buzuba bwa Jehova?

• Ino caamba nzi kulibambila mumizeezo yesu kutegwa tucite milimo canguzu?

• Ino mbubotu nzi buboola kulibaabo babelesya nzyobaiya?

3. Nkaambo nzi ncociyandika kuti tukajanike mazuba oonse obilo, tukabikkile maano, alimwi akubelesya nzyotuyakwiiya?

³ Saatani ulwana mizeezo yesu kutegwa ainyonganye. (2 Ko. 11:3) Aboobo, tweelede kwiikwabilila mizeezo yesu akweendelezya nzyotuyeeya. Tweelede kuzumanana kuba amizeezo ya Kristo alimwi akutantamuka kuyungwa kutali kabotu kwanyika eeyi. (1 Ko. 2:16) Aboobo, amulibambile kutegwa mukajanike kumuswaangano wabbazu mazuba oonse obilo. Mukabikkile maano. Kubelesya twaambo tuyakuyiigwa kuyootugwasya kulibambila mumizeezo kutegwa tuubeleke canguzu mulimo wa Bwami.—1 Pe. 1:13.