Ijwi lya Leza Lilagwasya Mukuyiisya

1. Ino muswaangano wabbazu wamwaka wamulimo wa 2014 ujisi mutwe nzi, alimwi mubuzyo nzi uyooyingulwa?

¹ ‘Mwiiyi wesu Mupati,’ Jehova, ngomwiiyi uubainda boonse kuyiisya mububumbo boonse. (Is. 30:20, 21) Pele, ino Jehova utuyiisya buti? Watupa bbuku liinda mabbuku oonse—Ijwi lyakwe lyakasololelwa amuuya, Bbaibbele. Ino lwiiyo lwa Leza inga lwatugwasya buti kumubili, mumizeezo, alimwi akumuuya? Bwiinguzi kumubuzyo ooyu buyoopegwa kumuswaangano wesu wabbazu wamwaka wamulimo wa 2014. Mutwe wamuswaangano ooyu wakuti “Ijwi lya Leza Lilagwasya Mukuyiisya,” uyeeme alugwalo lwa 2 Timoteyo 3:16.

2. Ino mibuzyo nzi iijisi bwiinguzi buyookankaizya twaambo tupati-pati?

² Amulangile Twaambo Ootu Tupati-pati: Twaambo tupati-pati twamuswaangano ooyu tuyookankaizyigwa mubwiinguzi bwamibuzyo eeyi iitobela:

• Ino lwiiyo luzwa kuli Leza lubujatikizya buti buumi bwesu? (Is. 48:17, 18)

• Kuti twasoleka kucinca bukkale bwesu kutegwa tubelekele Jehova mumulimo waciindi coonse, ino ncinzi ncotuyoojana? (Malk. 3:10)

• Ino tweelede kucita nzi kuti twajana ‘njiisyo zyeenzu’? (Heb. 13:9)

• Mbuti mbotukonzya kwiiya “mbwaakali kuyiisya” Jesu? (Mt. 7:28, 29)

• Nkaambo nzi aabo bayiisya mumbungano ncobeelede kuliyiisya beni? (Lom. 2:21)

• Ino Jwi lya Leza ligwasya buti? (2 Ti. 3:16)

• Ino bantu bajatikizyigwa buti ‘akuzungaanizyigwa’ kwazisi? (Hag. 2:6, 7)

• Ino Jehova ujisi lusyomo nzi mulindiswe? (Ef. 5:1)

• Nkaambo nzi ncotweelede kubeleka canguzu kutegwa tuzumanane munjiisyo zya Jehova? (Lk. 13:24)

3. Nkaambo nzi ncociyandika kuti tukajanike akubikkila maano kumuswaangano ooyu wabambwa aciindi ceelede?

³ Mulugwalo lwa 2 Timoteyo caandaano 3, Paulo katanalemba majwi aayeeme mutwe wamuswaangano, wakapandulula ziindi zikatazya zitondezya kuti tuli kumazuba aamamanino. Wakalemba kuti: “Bantu babyaabi abasilweeno bayoobija akubijila limwi, banooena bamwi alimwi akweenwa lwabo beni.” (2 Ti. 3:13) Eelo kaka cilayandika kapati kuti katuswiilila alimwi akutobela nzyotuyiisyigwa a Leza kutegwa tuteenwi! Aboobo, aabe makanze eesu aakuyoojanika alimwi akubikkila maano kumuswaangano ooyu wabambwa aciindi ceelede.