Ijwi lya Leza Lilaanguzu
1. Ino muswaangano waalubazu wamwaka wamulimo wa 2014 ujisi mutwe nzi?
1 Mukwiimpana acintu cili coonse icizwa kubantu batalondokede, Bbaibbele lilijisi nguzu zyakutucinca, akupa kuti mizeezo yesu amicito kazyeendelana akuyanda kwa Leza. Ino Jwi lya Leza lijisi nguzu zili buti? Ino inga twazibelesya buti nguzu eezyi mubuumi bwesu? Mbuti mbotukonzya kubelesya nguzu eezyi mukugwasya bamwi? Tulasyoma kuti twaambo ootu twaakulangwa-langwa kumuswaangano waalubazu wamwaka wamulimo wa 2014, boonse bayooyumizyigwa kumuuya. Muswaangano ooyu unoojisi mutwe wakuti “Ijwi lya Leza Lilaanguzu,” kuzwa mulugwalo lwa Bahebulayo 4:12.
2. Tweelede kujana bwiinguzi kumibuzyo iili?
2 Amukajane Bwiinguzi Kumibuzyo Eeyi: Mwanooswiilila makani aamuswaangano ooyu, amukajane bwiinguzi kumibuzyo eeyi iilembedwe ansi aawa.
• Nkaambo nzi ncotweelede kulisyoma Jwi lya Jehova? (Int. 29:4)
• Mbuti mbotukonzya kulibonena nguzu nzyolijisi Jwi lya Leza mubuumi bwesu? (Int. 34:8)
• Ino inga mwazitondezya buti nguzu nzyolijisi Jwi lya Leza mumulimo wanu? (2 Ti. 3:16, 17)
• Mbuti mbotukonzya kweeleba kucegwa mukakole kanguzu zyalweeno zyanyika ya Saatani? (1 Jo. 5:19)
• Nobakubusi, ino inga mwazwidilila buti muzyintu zyakumuuya? (Jer. 17:7)
• Mbuti mbotukonzya kuba anguzu noliba leelyo notutajisi nguzu? (2 Ko. 12:10)
• Ncinzi ciyandika kutegwa tuzumanane kucinca mubuumi bwesu, nokuba kuti tucijisi zilengwa zitali kabotu? (Ef. 4:23)
3. Kunze lyakuswiilila kupulogilamu, munzila nzi imbi motukonzya kugwasyigwa amuswaangano waalubazu?
3 Eelo kaka tuyoogwasyigwa kapati kuswiilila makani aaya aayandika! Kuyungizya waawo, muswaangano waalubazu uyootupa coolwe cakuyanzana abakwesu alimwi abacizyi batali bamumbungano yesu mbuli mbotucita kumuswaangano wabbazu awacooko. (Int. 133:1-3; 2 Ko. 6:11-13) Aboobo, amujane ciindi cakuyanzana abalongwe bakaindi, alimwi akujana balongwe bapya. Ikuti kumuswaangano wanu waalubazu kakuli mwaambi uuswaya mbuli mulangizi wacooko naa mukwesu uuzwa ku Bbeteli, mulakonzya kumutamba walo alimwi amukaintu wakwe. Ncobeni, tulijisi twaambo tunji ncotweelede kulangila kumuswaangano waalubazu uuboola!