‘Cilyo Cipegwa Aciindi Ceelede’
1. Ino mbuti nywebo abantu bamwi mbomwakagwasyigwa amuswaangano waalubazu?
1 Twazwa kumuswaangano waalubazu, ziindi zinji twaamba kuti, “Ooyu muswaangano waboola aciindi ceelede alimwi watugwasya kapati.” Mulangizi wabbazu umwi wakaamba kuti nibakaswiilila pulogilamu yamuswaangano, bamwi mubbazu lyakwe bakatondezya kuti bayanda kuyungizya ciindi ncobabeleka mumulimo wakukambauka. Mulangizi weendeenda umwi wakaamba kuti: “Muswaangano ooyu watuyeezya kuti tupona mumazuba aamamanino akuti katusala kabotu zyintu nzyotucita mubuumi.” Aumwi wakaamba kuti, “Basikumwaya banji bakaamba kuti muswaangano wakapa kuti babikkile maano kucintu ciyandika kapati mubuumi, nkokuti mulimo wakukambauka.” Ino nywebo mwakagwasyigwa buti amuswaangano waalubazu?
2. Ino makani nzi aayakubandikwa kumuswaangano waalubazu mumwaka wamulimo uuboola?
2 Awalo muswaangano wamumwaka wamulimo uuboola uyootugwasya kapati. Ujisi mutwe wakuti “Kuyubila Muli-Jehova,” uzwa kulugwalo lwa Intembauzyo 118:8, 9. Makani aamwi ayakubandikwa ngakuti: “Jehova Mbwakonzya Kuba Maccijilo Eesu Muziindi Zyamapenzi,” “Amubagwasye Bamwi Kukwabililwa a Jehova,” “Amumwiiye Jehova Mukukwabilila Bamwi,” “Nobakubusi, Amumusyome Jehova!” aakuti “Paradaiso Yesu Yakumuuya—Bubambe Mbwabikkide Jehova Bwakutukwabilila.”
3. Ino ncinzi ncotweelede kucita kutegwa tugwasyigwe twajanika kumuswaangano?
3 Mbomukonzya Kugwasyigwa: Mbobayakwambilizya buyo buzuba bwamuswaangano, amukatalike kulibambila akubatamba mbomwiiya limwi Bbaibbele kutegwa mukajanike. Ikutegwa ‘tuzyale micelo’ cakuliyumya, tweelede kujatisya nzyotumvwa. (Lk. 8:15) Aboobo, amubikkile maano kumapulogilamu alimwi amulembe mubufwaafwi twaambo tupati-pati amalailile ngomuyanda kuyakubelesya mubuumi bwanu amumulimo wakukambauka. Wamana muswaangano amubandike abamukwasyi akulanga mbomukonzya kuzibelesya nzyomwakaiya.
4. Ino nkaambo nzi ncotweelede kuulangila muswaangano waalubazu?
4 Mbubwenya mbuli cakulya cinona alimwi cijisi busani, muswaangano waalubazu wamwaka uno wabambilwa kuti ukatugwasye kapati. Jehova amuleleke nomulibambila kutegwa mukajanike akugwasyigwa ‘acilyo cipegwa aciindi ceelede’ cakabambilwa babelesi Banakristo.—Mt. 24:45.