Bubambe Bupya Bwakwiinduluka Mapulogilamu aa Miswaangano Yamubbazu
Inyika ya Saatani mboiya bwiindilila kubija, Jehova utuyumya-yumya “kukazya kasampusampu azisusi zibi zyaansi ano, tuleelede kukala cakulibatamika acakululama acakulemeka Leza muciindi ecino casunu.” (Tit. 2:12) Akati kabubambe mbwabamba kwiinda mu “muzike musyomesi uucenjede,” nipulogilamu yamiswaangano wabbazu awaalubazu iicitwa amwaka. (Mt. 24:45) Elo kaka kubungana kwakumuuya kuli boobu kulagwasya!
Ikutegwa katuzyiyeeya akuzyibelesya nzyotwiiya, bubambe bupya bwakwiinduluka pulogilamu yamiswaangano eeyi buya kubelesyegwa mumwaka wamulimo wa 2005. Apeeji 5 a 6 mupepa eeli lyamukati, kuli zibalo zitondezya ziya kuyiigwa alimwi amibuzyo yakwiinduluka pulogilamu yamuswaangano aumwi. Basimbungano baya kulanga-langa makani aaya lya Muswaangano Wamulimo nokwacaala mazuba maniini aakuunka kumuswaangano alimwi anibajoka. Ino ooku inga kwalibambilwa buti?
Kakuceede nsondo yomwe naa zyobilo mbungano kaitanaunka kumuswaangano wabbazu, makani aamaminiti aali kkumi ayeeme amutwe wakuti, “Ipulogilamu Mpya ya Muswaangano Wabbazu” aya kulangwa-langwa lya Muswaangano Wamulimo kutegwa tukayumizyigwe kububambe oobo buboola. Alimwi mwaambi uya kubikkila maano kumibuzyo yakwiinduluka akukulwaizya boonse kulemba twaambo ikulibambila kwiinduluka kuya kuccilila kwainda buyo nsondo ziniini kuzwa kumuswaangano.
Munsondo buyo ziniini wainda muswaangano, kwamaminiti aali 15 kuya kuba kwiinduluka pulogilamu yabuzuba bwakutaanguna bwamuswaangano lya Muswaangano Wamulimo. Nsondo iiccilila, maminiti aali 15 aya kubelesyegwa kwiinduluka pulogilamu yabuzuba bwabili. Mibuzyo yakwiinduluka iili mupepa eeli lyamukati, iya kubelesyegwa mumubandi ooyo wakwiinduluka. Ikwiinduluka kweelede kubikkila maano mukubona makani mbwaagwasya. Baalu balakonzya kusala kufwiinsya, kugusya naa kuzyibikka mubuzuba bumwi zibeela zya Muswaangano Wamulimo kutegwa kwiinduluka ooku kucitwe.
Bubambe oobu buya kuccililwa apulogilamu yamuswaangano waalubazu, kwiindana buyo kuliko nkwakuti walo ujisi buyo cibeela comwe camaminiti aali 15 aakwiinduluka muswaangano oonse. Toonse atuliyobole kabotu pepa eeli akuya kulibelesya kutegwa tukagwasyigwe kapati kumalailile Jehova ngapa.—Is. 48:17, 18.