Pulogilamu ya Muswaangano Waalubazu Wamu 2010
1. (a) Ino mitwe nzi yamiswaangano yaalubazu njotwakalanga-langa mumyaka yainda? (b) Sena kuli twaambo ntomwakaiya kumiswaangano yaalubazu yainda itwamugwasya mumulimo wenu wakukambauka?
1 “Amusalulule Zyintu Ziinda Kubota,” “Amwiime nji Mutanga Lyomwe,” “Amuzumanane Kulungulula Bwini” alimwi “Tuli Bulongo—Jehova Mubumbi Wesu.” (Flp. 1:9, 10, 27; Joh. 18:37; Is. 64:8) Eeyi ili akati kamitwe yamiswaangano yaalubazu yamyaka yainda. Sena mulilibambilide kuyoojanika kumuswaangano waalubazu wamumwaka wamulimo wamu 2010? Muswaangano ooyu uyoopandulula mutwe wakuti: ‘Ciindi Casyaala Ncifwiifwi,’ kuzwa kulugwalo lwa 1 Ba-Korinto 7:29.
2. Ino mbuti mbomukonzya kutalika kulibambila kuyoojanika kumuswaangano waalubazu?
2 Mbobuya kwaambilizyigwa buyo buzuba bwamuswaangano waalubazu mumbungano yanu, amukatalike kubandika zyamuswaangano ooyu calukkomano. Bazyali bamwi balabagwasilizya bana babo kulangila muswaangano kwiinda mukulemba buzuba akkalenda, kubikkilizya azyintu aumwi nzyayandika kumuswaangano alimwi akutalika kubona mazuba aasyeede kuti muswaangano ube. Mubuzuba bwanu bwa Kukomba Mumukwasyi, inga mwalanga-langa twaambo ntomwakali kulemba kumiswaangano yaalubazu yainda. Kulanga-langa twaambo tuli mubbuku lya Amugwasyigwe Alwiiyo Lujanwa mu Cikolo Camulimo Weendelezyegwa a Leza, mapeeji 13-16, inga kwamugwasya kulibambila muswaangano ooyu kutegwa nywebo alimwi amukwasyi wanu mukagwasigwe “kucenjela mbomumvwa.”—Lk. 8:18.
3. Ino mbuti mbomukonzya kugwasyigwa kapati amakani aatikakananwe lyamuswaangano?
3 Amuzibelesye Nzyomwiiya: Muswaangano wamana buyo, bantu banji baamba kuti, “Elo kaka pulogilamu eeyi yali mbotu!” Aaya masimpe nkaambo Jehova nguutubambila miswaangano eeyi. (Tus. 10:22) Ikuti kamuyanda kugwasyigwa atwaambo ntomwaiya, mweelede kuzinzibala kuyeeya kutegwa mutatulubi. (Lk. 8:15) Nomuya kuŋanda wamana muswaangano, amubandike zyintu nzyomwaiya abanamukwasyi naa abantu bamwi mbomuli limwi. Aumwi ulakonzya kwaamba mbaakani nzyajisi alimwi atwaambo tukonzya kumugwasya mumulimo wakukambauka. Ikucita boobu kulakonzya kupa kuti muzumanane kugwasyigwa atwaambo ooto kwaciindi cilamfwu wainda muswaangano.—Jak. 1:25.
4. Ino muswaangano ooyu uyootugwasya buti?
4 Lyoonse tulakkomana notutambula cipego cikonzya kutugwasya. Sena tulilibambilide kuyooswiilila nzyatubambilide Jehova kumuswaangano waalubazu uuboola? Tusyoma kuti muswaangano ooyu uyootugwasya kapati. Tulakonzya kulangila kuti Taateesu wakujulu, Jehova, uyootupa cipego ceelede kwiinda mukutukulwaizya alimwi akutuyiisya mbotukonzya kuubeleka mulimo ngwaakatupa kuti tucite.—2 Tim. 4:2; Jak. 1:17.