Pulogilamu Mpya Yamuswaangano Waalubazu

“Amusime Mukuyeeya Kwanu” ngomutwe wapulogilamu yabuzuba bwamuswaangano waalubazu kutalikila mu September 2000. (1 Bako. 14:20, Ci) Nkaambo nzi ncotuyandika kuyoojanika? Tukkede munyika iizwide bubi. Kutegwa tuzyeelebe zintu ezi, tweelede kusima mukuyeeya kwesu munzila yakumuuya kutegwa tuzunde bubi kwiinda mukucita bubotu. Eeci nceciyootugwasya kucita pulogilamu yamuswaangano waalubazu.

Mucibeela cakusaanguna, mulangizi wabbazu uyoobandika “Zibelesyo Zigwasilizya Kusima Mukuteelela Bbaibbele.” Uyootutondezya mbotunga twaima nji mulusyomo lwa Bunakristo. Mwaambi mweenzu uyookankaizya mbokuyandika kubelesya njiisyo zyamu Bbaibbele mukuyungizya luzibo mumakani aamutwe wakuti “Amulikwabilile Munzila Yakumuuya Kwiinda Mukuyiisya Miyeeyo Yanu.”

Bakubusi abalo beelede kusima mukuyeeya kwabo. Eeci ciyoobandikwa muzibeela zyamitwe yakuti “Ncotweelede Kuba Bavwanda Caboola Kukubisya” alimwi a “Bakubusi Ibajana Luzibo Lino.” Amukajanike mukamvwe ncobacita bakubusi kutegwa balikwabilile munzila yakumuuya akuti balyeendelezye kumakani aakuyandisya kuziba zintu zibyaabi zyanyika alimwi akweeleba mapenzi.

Ino mbuti mbotunga twajana lukkomano lunji mubuumi? Mwaambi mweenzu uyoopandulula mumakani aamamanino aakuti “Amugwasigwe Kwiinda Mukubelesya Njiisyo Zyamu Bbaibbele Caluzibo.” Uyoopa zikozyanyo kutondezya kubelesya Jwi lya Leza mbokutugwasya kulanganya mapenzi mukusala zyakucita alimwi akugwasigwa kapati kuzintu nzyali mukutuyiisya Jehova.

Abo bayanda ikulyaaba kuli Leza kwiinda mukubbapatizigwa mumeenda amuswaangano waalubazu beelede kufwambaana kumuzibya mulangizi weendelezya. Mboiyooambilizigwa buyo deeti yamuswaangano waalubazu, amukailembe aakkalenda yanu alimwi akulibambila kabotu-kabotu kutegwa mukagwasigwe apulogilamu mbotu eyi. Mutakaindwi cibeela cili coonse camuswaangano waalubazu! Muyookulwaizigwa kuzumanana kuliyumya mubweende bwazintu obu bubyaabi alimwi akuzumanana kusyomeka kuli Jehova.