Ipulogilamu Mpya ya Muswaangano Waalubazu

Imutwe wapulogilamu mpya yamuswaangano waalubazu wabuzuba bomwe wamwaka wamulimo mupya wakuti: “Amulibombye Kuli Leza—Amumukazye Saatani,” ujisi kaambo kabotu kamu Magwalo. (Jak. 4:7) Oobu mbusolozi bubotu mumazubaano aakatazya! Imilawo ya Leza njotutobela itupa kuti Saatani atulwane cacigaminina. Ipulogilamu iyootuyiisya mbotunga twaima nji mukulwana makanze aa Diabolosi aanyonyoona lusyomo. Ino nzintu nzi zimwi ziyandisi munzila yakumuuya nzyotuyootambula kumuswaangano ooyu?

Mulangizi wabbazu uyootondezya mbuli “Kutondezya Kulibombya Kuli Leza kwa Banamukwasyi” mbokukulwaizya mikwasyi kuliyumya mubuyumuyumu buletwaa nyika eeyi. Imakani aakusaanguna aayookananwaa mwaambi mweenzu mubuzuba oobu aakuti “Ncocipandulula Kukazya Diabolosi,” ayoopandulula ikaambo alimwi ambotuyandika kutola ntaamu zyeelede kutegwa tukazye makanze aa Saatani aakutunyonyoona munzila yakumuuya. Zibeela zyobile zibambilidwe bakubusi kubagama, abalo ibeelede kupakamana kutukole twa Diabolosi. Banakristo banji balo lino bali mbapati bakakaka kutobela zilengwa zyanyika nobakali bakubusi. Tuyookkomana kuswiilila zyakuluula zimwi kujatikizya zyakabacitikila.

Kulibombya kubweendelezi kulayandika kulibaabo boonse bali muciinga cabantu. Aboobo, makani aamamanino aamwaambi mweenzu ayootondezya mbazu zyone mwalo motuyandika kutondezya kulibombya kwesu kuli Leza: (1) kumfwulumende, (2) mumbungano, (3) mumilimo yakumubili alimwi (4) mumukwasyi. Elo kaka inooli pulogilamu iigwasya!

Aabo bayanda kuyoobbapatizigwa mubuzuba oobo bwamuswaangano waalubazu, beelede kuzibya mulangizi weendelezya cakufwambaana. Toonse tweelede kulemba deeti lyamuswaangano ooyu aamakkalenda eesu alimwi akulibambila kuyoojanika kupulogilamu yoonse. Izilongezyo nzyotuyootambula zinooliko mane kukabe kutamani mbotuyaabuzumanana kulibombya kuli Jehova.